އާރްސީސީގެ ވޭނެއްގައި ބަނގުރާ އުފުލުން ބަލައި ނުގަނެވޭ ކަމަށް ދަނގެތީ ދާއިރާގެ މެންބަރު އަދި ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑް (އާރްސީސީ)ގެ ޗެއާމަން ކާނަލް މުހައްމަދު ނާޒިމް ވިދާޅުވެއްޖެއެވެ.

ނާޒިމް މިފަދައިން ވިދާޅުވެފައި މިއަދު ހުޅުމާލޭއިން އާރްސީސީގެ ވޭނަކުން ބަނގުރާ ފުޅިތަކަކާއި ދަޅުތަކެއް އަތުލައިގެންފައިވާތީއެވެ.

ފުލުހުން ބުނީ ހުޅުމާލޭގައި މިއަދު ދުއްވާފައި ދިޔަ ވޭންއަކާ މެދު ތުހުމަތުތަކެއް ކުރެވިގެން އެ ވޭން ބަލާ ފާސްކުރުމުގެ ތެރޭގައި ބަނގުރާ ފުޅިތަކަކާއި ދަޅުތަކެއް ފެނިފައިވާ ކަމަށާއި އެ މައްސަލައާ ގުޅިގެން ބިދޭސީ ފިރިހަނަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. އަދި އެ މައްސަލަ ތަހުގީގުކުރަމުންދާ ކަމަށް ވެސް ފުލުހުން ވަނީ ބުނެފައެވެ.

ނާޒިމް ވިދާޅުވީ އާރްސީސީ ކުންފުނީގެ ވޭނެއްގެ ތެރެއިން ބަނގުރާ ފުޅިތަކެއްް ފެނުނު މައްސަލައަކީ ކުންފުނިން ނުހަނު ކަންބޮޑުވާ ކަމެއް ކަމަށާއި އެކަމާ ގުޅިގެން ކުންފުނީގެ އެތެރޭގެ ތަހުގީގެއްކޮށް ފުލުހުންގެ ތަހުގީގަށް ކުންފުނިން އެއްބާރުލުން ދޭނެ ކަމަށެވެ.

ދިވެހި ގާނޫނުތަކާއި ހިލާފު އެއްވެސް ކަމެއްް އާރްސީސީ ކުންފުނިން ނުކުރާނެ ކަމަށާއި ކުރާކަށް ހިއްވަރެއްވެސް ނުދޭނެ ކަމެއް ވެސް ނާޒިމް ވަނީ ވިދާޅުވެފައެވެ. އަދި އެކަން ހިނގި ގޮތް ބަލައި އެކަމުގެ ތަފުސީލުތައް ހިމެނޭ ބަޔާނެއް މިއަދުގެ ފަހުގެ ވަގުތެއްގައި ނެރުއްވާނެކަމަށް ނާޒިމް ވިދާޅުވިއެވެ.