މާލޭގެ މަގުތަކުގައި ކުނި ގިނަވެ، އާންމުންނަށް އުނދަގޫވަމުން ދާތީ، ސިޓީ ކައުންސިލުން މާލެތެރެ ސާފުކުރުމަށް އެންވަޔަރަމަންޓަލް ޕްރޮޓެކްޝަން އޭޖެންސީ (އީޕީއޭ) އިން އިލްތިމާސްކޮށްފިއެވެ.

މާލެ އާއި ވިލިމާލޭގެ މަގުތަކުން ކުނި ނެގުމާއި މަގުތައް ސާފުކުރަން ކައުންސިލާއި ވެމްކޯ އާ ދެމެދު ހަދާފައިވާ އެއްބަސްވުމުގެ މުއްދަތު ހަމަވީ މިދިޔަ އާދީއްތަ ދުވަހަށެވެ. އެއާއެކު ވެމްކޯ އިން ވަނީ މާލޭގެ މަގުތަކުން ކުނި ނެގުން ހުއްޓާލައިފައެވެ. ނަމަވެސް ގޭގެއިން އުކާލާ ކުނި އުކާލުމަކީ ވެމްކޯގެ ޒިންމާ އެއް ކަމަށް ކައުންސިލުން ބުނެއެވެ.

އީޕީއޭ އިން ކުރި އިލްތިމާސްގައި ބުނީ، ސިޓީ ކައުންސިލާއި ވެމްކޯ އާ ދެމެދު ވެފައިވާ އެއްބަސްވުމުގެ މުއްދަތު ހަމަވުމުން މާލޭގެ މަގުތަށް ސާފުކުރުން ހުއްޓި، ގިނަވުމުގެ ސަބަބުން އާންމުންނަށް އުނދަގޫތައް ވަމުންދާ ކަމަށެވެ.

އެހެންކަމުން މާލޭގެ މަގުތައް ސާފުކޮށް ބެލެހެއްޓުމުގެ ޒިންމާ އާ މިހާރު ހަވާލުވެފައިވާ ސިޓީ ކައުންސިލުން އެ މަސައްކަތް ލަސްނުކޮށް ކުރިއަށް ގެންދިއުމަށް އިލްތިމާސްކުރާ ކަމަށް އެ އޭޖެންސީން ބުންޏެވެ.

ވެމްކޯ އާ އެކު ވެފައިވާ އެއްބަސްވުން އާ ނުކުރަން ސިޓީ ކައުންސިލުން ނިންމާފައި ވަނީ މާލެ އާއި ވިލިމާލޭގެ މަގުތަކާއި އާންމު ތަންތަން ސާފުކުރުމުގެ މަސައްކަތް އެ ކުންފުނިން ގަވައިދުން ނުކުރާ ކަމަށް ބުނެއެވެ. ކައުންސިލުން ބުނާ ގޮތުގައި ކުނި ނަގައި މަގުތައް ސާފުކުރުމުގެ މަސައްކަތް އެ އިދާރާ އިން ކުރަންޏާ، އެ މަސައްކަތަށް މިހާރު ކުރާ ހަރަދުތައް ބޮޑުތަނުން މަދުވާނެއެވެ.

ހަބަރު އީޕީއޭ މާލެ ސިޓީ ކައުންސިލް