ވަކީލުންނާ ޒާތީވި މިހާރުގެ ޑްރަގް ކޯޓުގެ ގާޒީ ސަމީރަށް ފިޔަވަޅު އަޅަން ޖޭއެސްސީއިން ނިންމައިފިއެވެ.
ޖޭއެސްސީއިން މިއަދު ބުނީ ކްރިމިނަލް ކޯޓުގައި އޮތް ޝަރީއަތުގެ އަޑުއެހުމެއްގައި އެ ގަޒިއްޔާގައި ދައުވާލިބޭ ފަރާތުގެ ގާނޫނީ ވަކީލުންގެ ފަރާތުން ޖޭއެއްސީއަށް ގާޒީ ސަމީރުއާ ގުޅޭގޮތުން ޝަކުވާ ހުށަހަޅާފައިވާ ކަމަށެވެ. އަދި އެ ޝަކުވާއާ ގުޅިގެން ވާހަކަދައްކާފައިވާއިރު ދިފާއީ ވަކީލުން ކުށްވެރިކޮށް އެ ވަކީލުންނާމެދު ޒާތީ ތައައްސުބެއް އޮތްކަން ހާމަވާފަދަ ގޮތަކަށް ގާޒީ ސަމީރު އަމަލުކޮށް ވާހަކަދައްކާފައިވާ ކަމަށް ޖޭއެސްސީއިން ބުނެއެވެ.
ގާޒީ ސަމީރުގެ އެ އަމަލަކީ ދިވެހިރާއްޖޭގެ ފަނޑިޔާރުންގެ ގާނޫނޫ ގެ 7 ވަނަ މާއްދާއާއި އެ ގާނޫނުގެ 32 ވަނަ މާއްދާގެ (3) ވަނަ ނަންބަރާއި 33 ވަނަ މާއްދާގެ (ށ)އާއި ފަނޑިޔާރުންގެ ސުލޫކީ މިންގަނޑުގެ 2.1 ވަނަ ނަންބަރާއި 2.2 ވަނަ ނަންބަރާއި 3.1 ވަނަ ނަންބަރާއި އަދި 4.10 ވަނަ ނަންބަރާއި ހިލާފަށް ކޮށްފައިވާ އަމަލުތަކެއް ކަމަށް ޖޭއެސްސީއިން ވަނީ ބުނެފައެވެ.
ޖޭއެސްސީއިން އިތުރަށް ބުނީ ޖުޑީޝަލް ސަރވިސް ކޮމިޝަންގެ ގާނޫނުގެ 1-32 ވަނަ މާއްދާގެ (ހ)ގެ (1) ވަނަ ނަންބަރުގެ ދަށުން ނަސޭހަތް ދިނުމާއެކު ކޮމިޝަނުން ކަނޑައަޅާ ތަމްރީނު ޕްރޮގްރާމެއް ފުރިހަމަކުރުމަށް އެންގުމުގެ ފިޔަވަޅު އެޅުމަށް ފެންނަ ކަމަށް މި މަހުގެ 19 ވަނަ ދުވަހު ބޭއްވި އެ ކޮމިޝަނުގެ މިއަހަރުގެ 73 ވަނަ ޖަލްސާގައި ނިންމާފައިވާ ކަމަށެވެ.
