ގދ. ހޯނޑެއްދޫގައި ހިންގި އޮޕަރޭޝަނެއްގައި އިއްޔެ ހައްޔަރު ކުރި އަބްދުﷲ ރަޝީދު، ފުލުހުންގެ ބެލުމުގެ ދަށުގައި ހުއްޓާ މަރުވި މައްސަލަ އިންސާފުވެރި ކަމާއެކު ތަހުގީގު ކުރުމަށް ޕީޕީއެމް އިން ގޮވާލައިފިއެވެ.
ޕީޕީއެމް އިން ބުނީ، އެޕާޓީގެ ހޯޑެއްދޫ ސްޓިއަރިން ކޮމިޓީގެ ރައީސް އަބްދުﷲ ރަޝީދު މަރުވީ، ފުލުހުން އޭނާ ހައްޔަރު ކޮށްގެން ގެންގޮސް ލޯންޗެއްގައި ފުލުހުންގެ ބެލުމުގެ ދަށުގައި ހުއްޓާކަމަށް އާއިލާއިން މައުލޫމާތުދޭ ކަމަށެވެ. އަދި އޭނާ ހައްޔަރު ކޮށްގެން ގެންދިޔަ އިރުވެސް އޭނާގެ މެޔަށް ތަދުވާކަމަށް ބުނަމުން ދިޔަ ކަމަށާއި އެހެންނަމަވެސް ފުލުހުން އެކަމަށް އެއްވެސް ވަރަކަށް ސަމާލުކަން ދީފައި ނުވާކަން ފާހަގަ ކުރެވިފައި ވާ ކަމަށް ޕީޕީއެމް އިން ވަނީ ބުނެފައެވެ.
އަދި އެތައް އިރެއްގެ ފަހުން އޭނާ މަޑަވެއްޔަށް ގެންދިޔައިރުވެސް މަރުވެފައި ވާކަމާއި، ފުލުހުން މިމައްސަލައިގައި އަމަލުކޮށްފައި ވަނީ ވަރަށް ޒިއްމާދާރުކަން ކުޑަކޮށްކަން ވެސް ޕީޕީއެމް އިން ބުނެއެވެ.
ޕީޕީއެމް އިން ބުނީ، ދިވެހި ފުލުހުންނަކީ ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށް ހުވާކޮށްގެން ތިބި ބައެއް ކަމަށެވެ.
އެހެންކަމުން ފުލުހުންގެ މި އަމަލު ވަރަށް ހަރުކަށި އިބާރާތުން ކުށްވެރިކޮށް މިމައްސަލަ ވީހާވެސް އަވަހަކަށް މިނިވަންކަމާއި އިންސާފުވެރި ކަމާއެކު ތަހުގީގު ކުރުމަށް ޕީޕީއެމް އިން ވަނީ ގޮވާލާފައެވެ.
މިކަމުގައި އިހުމާލު ވެފައިވާ ފަރާތްތަކާމެދު ފިޔަވަޅު އަޅާ، އިންސާފު ހޯދައިދިނުމުގެ މަސައްކަތް އަވަސް ކުރުމަށް ވެސް ޕީޕީއެމް އިން ވަނީ ގޮވާލާފައެވެ.
އިއްޔެ ފުލުހުންގެ ބެލުމުގެ ދަށަށް ގެންދިޔަ މީހަކު މެޔަށް ތަދެއް އަރައި، ފިޓް ޖެހެން އުޅޭ ފަދަ އަލާމާތްތަކެއް ފެނުމާ ގުޅިގެން ގދ. މަޑަވެލި ހެލްތް ސެންޓަރަށް ގެންދިޔަ އިރުވެސް އޭނާ ވަނީ މަރުވެފައި ކަމަށް އެ ސެންޓަރުން އެމީހާ ބެލި ޑޮކްޓަރުން ބުނެފައިވާ ކަމަށް ފުލުހުން މައުލޫމާތު ދެއެވެ.
މި ހާދިސާ އާ ގުޅޭ މައުލޫމާތު ނެޝަނަލް އިންޓެގްރިޓީ ކޮމިޝަނަށާއި ހިއުމަން ރައިޓްސް ކޮމިޝަނަށް ހިއްސާ ކޮށްފައި ވާ ކަމަށާއި މި ހާދިސާ ތަހުގީގުކޮށް ދިނުމަށް ވެސް އެދިފައިވާ ކަމަށް ފުލުހުން ބުނެއެވެ.
އެ މީހާ ފުލުހުން ހައްޔަރު ކުރީ ކޮން މައްސަލައަކާ ގުޅިގެން ކަން އަދި ހާމަ ކޮށްފައެއް ނުވެއެވެ.
މައުލޫމާތު ލިބިފައިވާ ގޮތުގައި އެމީހާ އަކީ މިއަދު މެންދުރު ފުލުހުންގެ ޑްރަގް އެންފޯސްމެންޓް ޑިޕާޓްމެންޓުން ހިންގި އޮޕަރޭޝަނެއްގައި ގދ. ހޯޑެއްދޫއިން ހައްޔަރު ކުރި މީހެކެވެ. އަދި އިއްޔެ ހަވީރު ފުލުހުންގެ ލޯންޗެއްގައި އެމީހާ ވަނީ މަޑަވެއްޔަށް ގެންގޮސްފައެވެ. މަޑަވެއްޔަށް ލޯންޗް ގާތްކުރި އިރު ވެސް އެ ރަށު ޖެޓީ ކައިރިއަށް އެމްބިއުލާންސް ގާތްކޮށްފައި އޮތް ކަމަށާއި އެމީހާ އެމްބިއުލާންސްގައި ގެންދިޔައީ ސިއްހީ މަރުކަޒަށެވެ.
