ޒުވާނުންގެ މެދުގައި މަގްބޫލު ނެޓްފްލިކްސް ސީރީޒް "ނެވާ ހޭވް އައި އެވާ" ގެ ހަތަރު ވަނަ ސީޒަންގެ ޝޫޓިން ނިންމާލައިފިއެވެ.
މިދިޔަ އޯގަސްޓް މަހު ސީރީޒްގެ ޝޫޓިން ނިންމާލިއިރު މި ސީޒަން ވެގެންދާނީ މި ސީރީޒްގެ އެންމެ ފަހު ސީޒަނަށެވެ. ހަތަރު ވަނަ ސީޒަނުގައި ޖުމްލަ 10 އެޕިސޯޑެއް ފެނިގެންދާއިރު ސީޒަން ތިނެއް ނިމުނީ ތިނެސްކަން ލޯބީގެ ވާހަކައަކުންނެވެ. އެމެރިކާގައި ދިރިއުޅޭ އިންޑިއާ ދަރިކޮޅުގެ ޓީނޭޖް އަންހެން ކުއްޖެއްގެ ހަޔާތުގައި ދިމާވާ ކަންތައްތަކެއްގެ މައްޗަށް ބިނާކޮށް އުފައްދާފައިވާ ސީރީޒްގެ މެއިން ކެރެކްޓާ "ދޭވީ"ގެ ރޯލުން ފެނިގެންދަނީ ކެނެޑާއަށް ނިސްބަތްވާ، ތަމަޅަ ނަސްލުގެ އެކްޓްރެސް މެއިޓްރެޔީ ރާމަކްރިޝްނަންއެވެ.
އަންނަ އަހަރުގެ ކުރީކޮޅު ފަހު ސީޒަން ސްޓްރީމްކުރަން ތައްޔާރުވަމުން އަންނައިރު މިފަހަރުގެ ސީޒަންގައި ވެސް ޝައުގުވެރި ގިނަ މަންޒަރުތަކެއް އެކުލެވޭނެއެވެ. ދޭވީ ލޯބީގެ ގޮތުން ގުޅޭނީ ބެން ނޫނީ ޕެކްސްޓަން އާ ތޯ ބަލަން ގިނަ ބަޔަކު ތިބީ އިންތިޒާރުގައެވެ. ފެންނަ ކޮންމެ ރީތި ފިރިހެނަކަށް ހިތް ކިޔާ ދޭވީ އަކީ އޭނާގެ ދިރިއުޅުމުގައި ވަރަށް މައްސަލަތައް ދިމާވާ ކުއްޖެކެވެ. ބައްޕަ ނިޔާވުމަށްފަހު އޭނާގެ މެންޓަލް ހެލްތުގެ ބައި ވަރަށް ބޮޑަށް ދަށްވެ އަބަދުވެސް ފެނިގެންދަނީ ކޮންމެވެސް ކަހަލަ ބޮޑު މައްސަލަގަނޑެއްގެ ތެރޭގައި އުޅޭ މަންޒަރެވެ.
ނެވާ ހޭވް އައި އެވާ އުފެއްދީ ކޮމޭޑިއަން އަދި ޕްރޮޑިއުސަރު މިންޑީ ކޭލިންގް އެވެ. ސީރީޒުން ފެނިގެންދާނެ ބައެއް ތަރިންނަކީ ޕޫރްނާ ޖަގަނާތަން، ސެންތިލް ރާމަމޫރުތީ، ޑެރެން ބާނެޓު، ލީ ރޮޑްރިގޭޒް އަދި ޖެރެން ލިއުސަން އެވެ. ނެވާ ހޭވް އައި އެވާ ގެ ފުރަތަމަ ސީޒަނެއް 2020 ވަނަ އަހަރު އައި އިރު ދެވަނަ ސީޒަން ނުކުތީ 2021 ވަނަ އަހަރުގައެވެ. އަދި ތިން ވަނަ ސީޒަން ވަނީ މިދިޔަ އޯގަސްޓް މަހު ނެޓްފްލިކްސްގައި ސްޓްރީމް ކޮށްފައެވެ.
