ކޮވިޑް-19 ގެ ދުވަސްވަރު ސިފައިން ކޮށްދިން ހިދުމަތްތަކުގެ އަގުވަޒަން ކުރުމުގެ ގޮތުން "އިންސާނީ ހިދުމަތުގެ މެޑަލް-ކޮވިޑް19" ގެ ނަމުގައި މެޑަލެއް ދިނުމަށް ނިންމާފައިވާ ކަމަށް، ރައީސް އިބްރާހީމް މުހައްމަދު ސޯލިހު ރޭ ވިދާޅުވެއްޖެއެވެ.
ސިފައިންނަށް 130 އަހަރު ފުރުން ފާހަގަކުރުމަށް ބޭއްވި ރަސްމިއްޔާތުގައި ރައީސް ވިދާޅުވީ، ދިވެހި ސިފައިންނަކީ އަސްކަރީ ވާޖިބުތަކުގެ އިތުރުން، ބައިވަރު މަދަނީ ހިދުމަތްތަކެއް ވެސް ފޯރުކޮށްދޭ ބައެއް ކަމަށެވެ. އޭގެ ތެރޭގައި ރައީސް ފާހަގަކުރެއްވި ބައެއް ކަންކަމަކީ:
- ދިވެހި މަސްކަނޑުތައް ހިމާޔަތްކުރުމާއި، މަސްވެރިން ހާލުގައި ޖެހުމުން އެހީތެރިކަން ފޯރުކޮށްދިނުން
- ކަނޑުމަތީގެ ހާދިސާތަކުގައި މީހުންގެ ފުރާނަ އާއި މުދާ ސަލާމަތް ކުރުން
- ވައިގެ މަގުންނާއި ކަނޑު މަގުން އެކި ތަންތަނަށް ބަލިމީހުން އުފުލައިދިނުން. އެގޮތުން މިދިޔަ އަހަރު އެކަނިވެސް، މެޑިކަލް އިވެކުއޭޝަންގެ 16921 އޮޕަރޭޝަނެއް ހިންގާފައިވޭ
- އަލިފާނުގެ ހާދިސާތަކުން މީހުންގެ ފުރާނަ އާއި މުދަލާއި ގެދޮރު ސަލާމަތްކުރުން
- އުދަ އާއި ވާރޭ ވެހިގެން ކުރިމަތިވާ ފެން ބޮޑުވުމުގެ ހާދިސާތަކުގައި، މީހުންގެ ފުރާނަ އާއި މުދަލާއި ގެދޮރު ސަލާމަތްކުރުން
އެއަށްފަހު ރައީސް ފާހަގަކުރެއްވީ ކޮވިޑުގެ ބަލިމަޑުކަމުން ސަލާމަތްވުމަށް ސިފައިން ކުރި ބުރަ މަސައްކަތެވެ. ރައީސް ވިދާޅުވި ގޮތުގައި، އެއްވެސް ވަރުބަލިކަމެއް ނެތި ސިފައިން ވަނީ ވާޖިބު އަދާކޮށްފައެވެ. އެކަމަށްޓަކައި ރައީސް ވަނީ ސިފައިންނަށް ތައުރީފް ކުރައްވައިފައެވެ.
އެ މޭރުމުން ވާހަކަފުޅު ދައްކަވަމުން، އެމްއެންޑީއެފްގެ ސެނަހިޔާ ހޮސްޕިޓަލުން ހިންގި ފްލޫ ކްލިނިކާއި، "ކޮވިޑް-19 ދިފާއު" ވެކްސިން ޕްރޮގްރާމަށް ސިފައިން ފޯރުކޮށްދިން އެހީތެރިކަން ވެސް ރައީސް ފާހަގަކުރެއްވިއެވެ.
އެމަނިކުފާނު ވިދާޅުވީ، ކޮވިޑުގެ ދުވަސްވަރު ސިފައިން ކޮށްދިން ހިދުމަތްތައް ބަޔާންކޮށްދޭން ވެސް ދަތި ކަމަށެވެ. އެހެންވެ، އެ ހިދުމަތްތަކުގެ އަގުވަޒަންކޮށް، "އިންސާނީ ހިދުމަތުގެ މެޑަލް-ކޮވިޑް19" މެޑަލް ދިނުމަށް ވާނީ މީގެ ކުރިން ވެސް ނިންމާފައި ކަމަށް، ރައީސް ވިދާޅުވިއެވެ.
އަޅުގަނޑު މިހެން ދެންނެވިޔަސް، ކޯވިޑުގެ ތެރޭގައި ދިވެހި ސިފައިން ރައްޔިތުންނަށް ކޮށްދެއްވާފައިވަނީ، ބަޔާންނުކުރެވޭހާ ފުރިހަމަ އިންސާނީ ހިދުމަތެއް." ރައީސް ވިދާޅުވިއެވެ.
ސިފައިންނަށް އެކަނިތޯ މެޑަލް ހައްގުވަނީ ކޮބައިތޯ ފުރާނަ އަތްމައްޗައްލައިގެން އެކި ދާއިރާތަކުގަ މަސައްކަތްކުރި ނަރުހުން. އެމީހުންނަކަށް ހައްގެއް ނޫންތޯ ކޮބައިތޯވޮލަންޓިޔަރ ކޮށް މަސަކަތްކުރި ކޮމިއުޓީ ނަރުހުން