ހުއްދަ ނެތް ކާކުލަ އެއް އަޅައިގެން އުފައްދާފައިވާ އައިސްކްރީމް ޕައުޑަރުގެ ބާވަތެއް ވިއްކުން މަނާކޮށް، އޭގެ ރައްކާތެރިކަން ހުރި މިންވަރު ދެނެގަތުމުގެ މަސައްކަތް ފަށައިފިއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ނެރުނު ބަޔާނުގައި ބުނީ ހުއްދަ ނެތް ކާކުލަ އެއް އަޅައިގެން އުފައްދާފައިވާ "ސްޓެއްލާ" ބްރޭންޑުގެ އައިސްކްރީމް ޕައުޑަރެއް އެތެރެކުރި ކަމުގެ މައުލޫމާތު، ޔޫރަޕްގެ ރެޕިޑް އެލާޓް ސިސްޓަމް ފޯ ފުޑް އެންޑް ފީޑް (ރެސްފް) އިން އެ އޮތޯރިޓީ އަށް އަންގާފައިވާ ކަމަށެވެ.
އެ މައުލޫމާތާ ގުޅިގެން، އެ އުފެއްދުމުގެ ސަބަބުން ކާބޯތަކެތީގެ ރައްކާތެރިކަން ހުރި މިންވަރު ދެނެގަތުމުގެ މަސައްކަތް ކުރަމުންދާ ކަމަށް، އެމްއެފްޑީއޭ އިން ބުންޏެވެ.
ވިއްކުން މަނާ، ސްޓެއްލާ ބްރޭންޑުގެ ބާވަތުގެ މައުލޫމާތު
- ބާވަތް: އައިސްކްރީމް ޕައުޑަރު
- ބެޗް ނަންބަރު: އެލް-3105210523
- މުއްދަތު ހަމަވާ ތާރީހު: މޭ 2023
އެހެންކަމުން، ރައްކާތެރިކަމުގެ ފިޔަވަޅުގެ ގޮތުން، ސްޓެއްލާ ބްރޭންޑުގެ އައިސްކްރީމް ޕައުޑަރު އެތެރެނުކުރުމަށާއި، ނުވިއްކުމަށާއި، ބޭނުންނުކުރުމަށް އެ އޮތޯރިޓީން ވަނީ އަންގައިފައެވެ.
