ރައީސް އިބްރާހިމް ސޯލިހުގެ ރިޔާސީ ވައުދެއް ކަމަށްވާ ގޭދޮށު މަސް ފެކްޓްރީގެ ތެރެއިން 4 މަސް ފެކްޓްރީއެއް ހެދުމުގެ މަސައްކަތް ކުރަމުންދާ ކަމަށް ފިޝަރީޒް މިނިސްޓަރު ޑރ.ހުސެއިން ރަޝީދު ހަސަން ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ ގޭދޮށު މަސް ޕްލާންޓު މިހާތަނަށް ގާއިމުކޮށް ހިންގަމުން ދޭތޯ މަޖިލީހުގެ މިއަދުގެ ޖަލްސާގައި އުނގޫފާރު ދާއިރާގެ މަޖިލިސް މެންބަރު މުހައްމަދު ވަހީދު (ވައްޑެ) ކުރެއްވި ސުވާލަކަށް ޖަވާބު ދެއްވަމުންނެވެ.
މިނިސްޓަރ ހުސެއިން ވިދާޅުވީ ގޭދޮށު މަސްފެކްޓްރީގެ 3 ތަނެއް އައްޑޫ ސިޓީގައި ހެދުމަށް މަސައްކަތް ކުރައްވަމުން އަންނަ ކަމަށާއި ނ. ކެނދިކުޅުދޫގައި ވެސް އެފަދަ ޕްލާންޓެއް ގާއިމްކުރުމުގެ މަސައްކަތް ކުރަމުންދާ ކަމަށެވެ.
އެފަދަ ފެކްޓްރީތައް ގާއިމު ކުރަން ބޭނުންވާ ފަރާތްތަކަށް އެކަން ކުރުމަށް ބޭނުންވާ ހުއްދަ ދިނުމަށް ކަމާބެހޭ އިޖުރާއަތްތައް ހިމެނޭ އުސޫލުތަކެއް ގާއިމުކޮށްފައިވާ ކަމަށްވެސް މިނިސްޓަރު ވަނީ ވިދާޅުވެފައެވެ.
