ދައުލަތުގެ ހިންގުމުގެ ނިޒާމަށް ރައްޔިތުންގެ އިތުބާރު ހޯދުމަށް އެސެޓް ރިކަވަރީގެ ހަރުދަނާ ނިޒާމެއް އޮންނަން ޖެހޭކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.
އަމީރު މިހެން ވިދާޅުވީ، އެންޓި-ކޮރަޕްޝަން ކޮމިޝަނުން އިސްނަގައިގެން އެސެޓް ރިކަވަރީގެ ގައުމީ ނިޒާމު ގާއިމްކުރުމާގުޅޭ މަސައްކަތު ބައްދަލުވުން ފެށުމަށް މިއަދު ބޭއްވި ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަގައެވެ.
ދައުލަތަށް އަނބުރާ ހޯދަން ޖެހޭ ފައިސާ އާއި މުދަލުގެ ގިނަކަން ފާހަގަކުރައްވަމުން އަމީރު ވިދާޅުވީ 2009 ވަނަ އަހަރާ 2020 ވަނަ އަހަރާ ދެމެދު ކޮރަޕްޝަންގެ ކުށްތަކުން އެކަނިވެސް 1.9 ބިލިއަން ރުފިޔާ ދައުލަތަށް ގެއްލިގެން ގޮސްފައިވާ ކަމަށާއި، އޭސީސީ އިން އިސްނަގައިގެން މިއަދު މިފެށި މަސައްކަތް މުހިންމުވަނީ އެ ސަބަބައްޓަކައި ކަމަށެވެ.
މިފަދަ ނިޒާމެއް ގާއިމުވެގެން ދިއުމަކީ ދައުލަތުގެ އިދާރާތަކާއި ދައުލަތުގެ ހިންގުމުގެ ނިޒާމަށް ރައްޔިތުންގެ މެދުގައި އޮންނަ އިތުބާރާއި ޔަގީންކަން އިތުރުވެގެންދާނެ ކަމެއް ކަމަށް އަމީރު ވިދާޅުވިއެވެ. އަދި ކޮރަޕްޝަން ފަދަ ކުށްތަކަށް އަރައިގަންނަން އޮންނަ ޝައުގު ކުޑަކޮށް، ނައްތާލަން އެޅޭނެ ހަރުދަނާ ފިޔަވަޅެއް ކަމަށާއި މިއީ ނަޒާހަތްތެރި މުޖުތަމައެއް ބިނާކުރުމަށް އަޅުގަނޑުމެން އެންމެން މި ކުރާ މަސައްކަތަށް ލިބިގެންދާނެ ބޮޑު ކުރިއެރުމެއްކަމަވެސް މިނިސްޓަރު ވިދާޅުވިއެވެ.
އަމީރު އިތުރަށް ވިދާޅުވީ، ކޮރަޕްޝަނަށް ހުޅުވިފަ ހުރި ދޮރުތައް ބަންދުކުރުމާއެކު، ކޮރަޕްޝަނާއި ކުށްކޮށްގެން ހޯދާ ފައިސާ އާއި މުދާ ހޯދޭނެ ހަރުދަނާ ނިޒާމެއް ބޭނުންވާ ކަމަށާއި، އުންމީދުކުރަނީ މި ފެށިގެންދާ މަސައްކަތުގެ ތެރެއިން މިފަދަ ނިޒާމެއް ރާއްޖޭގައި ގާއިމުކުރަން ކުރަންޖެހޭ މަސައްކަތްތައް ދެނެގަނެވި، މި ނިޒާމު ގާއިމުކުރަން އެކްޝަން ޕްލޭނެއް އެކުލަވާލެވިގެން ދިއުމަށް ކަމަށެވެ.
އަދި އެކްޝަން ޕްލޭނާ އެއްގޮތަށް މަސައްކަތް ކުރިއަށް ގެންގޮސް، ދުރު ނޫން މުސްތަގުބަލެއްގައި މި ނިޒާމުގެ ތެރެއިން މަސައްކަތް ކުރަން ފެށިގެންދާނެކަމަށް މިނިސްޓަރު ވިދާޅުވިއެވެ.
މި ރަސްމިއްޔާތުގައި އޭސީސީގެ ރައީސް އާދަމް ޝާމިލް ވިދާޅުވީ ކޮރަޕްޝަނުގެ ކުށުން ދައުލަތުން ގެއްލިގެންދާ ފައިސާގެ އަދަދު ވަރަށް ބޮޑުކަން ދިރާސާތަކުން ހާމަވާ ކަމަށެވެ. އެގޮތުން އެއީ ކޮންމެވެސް ރަށެއްގައި ސުކޫލެއް، ހޮސްޕިޓަލެއް، ނުވަތަ ބަނދަރެއް އެޅުމަށް ބޭނުންކުރެވިދާނެ ފަދަ ފައިސާގެ އަދަދުތަކެއްކަމަށައި، އެކަމުން އެނގިގެންދަނީ ކޮރަޕްޝަނުގެ ކުށުގެ ގެއްލުމުގެ ބޮޑު މިންވަރު ކަމަށް ޝާމިލް ވިދާޅުވިއެވެ.
ދައުލަތުގެ ކަމާގުޅިންހުރި އިދާރާތައް ބައިވެރިކޮށްގެން ކުރިއަށްގެންދާ 3 ދުވަހުގެ މި މަސައްކަތު ބައްދަލުވުމުގެ މައިގަނޑު މަގްސަދަކީ، ދިވެހިރާއްޖޭގައި ކުށްކޮށްގެން ހޯދާ މުދަލާއި ފައިސާ އަދި ކުށްކުރުމަށް ބޭނުންކުރި މުދަލާއި ފައިސާ ދަޢުލަތަށް ނެގޭނެ ހަރުދަނާ އަދި ވަށާޖެހޭ ނިޒާމެއް ގާއިމްކުރުމަށް ކުރަންޖެހޭ މަސައްކަތްތައް ދެނެގަނެ، މި މަސައްކަތްކުރުމަށް އެކުލަވާލަންޖެހޭ މަގުޗާޓު އެކުލަވާލުން ކަމަސް އޭސީސީން ބުނެއެވެ.
އޭސީސީން ބުނީ މި މަސައްކަތު ބައްދަލުވުމުގައި އޭސީސީގެ އިތުރުން ރައީސުލްޖުމްހޫރިއްޔާގެ އޮފީސް، މިނިސްޓްރީ އޮފް ފައިނޭންސް، އެޓާނީ ޖެނެރަލްގެ އޮފީސް، ޕްރޮސިކިއުޓާ ޖެނެރަލްގެ އޮފީސް، އޮޑިޓާ ޖެނެރަލްގެ އޮފީސް، ދިވެހި ފުލުހުންގެ ހިދުމަތް، މިނިސްޓްރީ އޮފް ޓޫރިޒަމް، މިނިސްޓްރީ އޮފް ފޮރިން އެފެއަރޒް، އެމްއެމްއޭގެ ފައިނޭންޝަން އިންޓެލިޖެންސް ޔުނިޓް، މޯލްޑިވްސް އިންލެންޑް ރެވެނިއު އޮތޯރިޓީ، ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން އަދި ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން މަސްލަހަތުވެރިންގެ ގޮތުގައި ބައިވެރިވާ ކަމަށެވެ.
