މ. ދިއްގަރުގެ ސިއްހީ މަރުކަޒު ހޮސްޕިޓަލަކަށް ބަދަލުކޮށްދޭން އެ ރަށު ކައުންސިލުން ރައީސް އިބްރާހީމް މުހައްމަދު ސޯލިހުގެ އަރިހުގައި އެދިވަޑައިގެންފިއެވެ.
މިރޭ ދިއްގަރު ސްކޫލްގައި ރައީސް އިބްރާހީމް މުހައްމަދު ސޯލިހާ ބައްދަލުކޮށް، އެ ރަށުގެ ކައުންސިލާއި އަންހެނުންގެ ކޮމިޓީން ވަނީ ރަށުގެ އާންމުންނަށް ދަތިވެފައިވާ ކަންކަމާ ގުޅޭގޮތުން މަޝްވަރާކޮށްފައެވެ.
އެގޮތުން ދިއްގަރު ސްކޫލްގައި ޖާގައިގެ ދަތިކަން ހުރި ކަމާއި، ނަރުދަމާގެ މައްސަލަ އާއި، ރަށުގައި ދުވާލެއްގެ މައްޗަށް ފެން އުފެއްދޭ މިންވަރު މަދުކަން ކައުންސިލަރުން ފާހަގަކޮށްފައިވެއެވެ. ހަމަ އެއާއެކު، ދިއްގަރުގެ ސިއްހީ މަރުކަޒު ހޮސްޕިޓަލަކަށް ބަދަލުކޮށްދޭން އެދިފައިވާއިރު، އެ ރަށުގައި ހައުސިން މަޝްރޫއެއް ހިންގަން ބޭނުންވާ ކަމަށް ކައުންސިލަރުން ބުންޏެވެ.
އޭގެ އިތުރުން، ދިއްގަރުގައި އޭޓީއެމްގެ ހިދުމަތް ގާއިމްކުރަން ބޭނުންވާ ކަމާއި، ބިން ހިއްކުމުގެ މަޝްރޫއު އަވަހަށް ނިންމަން ބޭނުންވާ ކަން ވެސް ކައުންސިލަރުން ފާހަގަކޮށްފައިވެއެވެ.
ރައީސް ވިދާޅުވި ގޮތުގައި، ދައުރުގައި ބާކީ އެއް އަހަރު އެބައޮތެވެ. އަދި ސަރުކާރުން ކުރަން ބޭނުންވާ ބައިވަރު ކަންތައްތައް ވެސް އެބަ ހުއްޓެވެ. އެމަނިކުފާނު ވިދާޅުވީ، ރަށްރަށުގެ ކައުންސިލްތަކާއި ބައްދަލުކޮށް މަޝްވަރާ ކުރުމުގެ ބޭނުމަކީ ރައްޔިތުން އެންމެ ބޭނުންވާ ކަންކަން ބައްލަވައި، ރަށްރަށުގައި ހިންގާ ތަރައްގީގެ މަޝްރޫއުތައް ތަރުތީބު ކުރެއްވުން ކަމަށެވެ.
ދެ ދުވަހުގެ މުއްދަތަކަށް މ. އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގައި ރައީސް ވަނީ މިއަދު މަޑުއްވަރީގެ އިތުރުން ރަތްމަންދުއަށް ވަޑައިގެން، އެ ރަށްރަށުގެ ކައުންސިލްތަކާއި، އަންހެނުންގެ ކޮމިޓީތަކާ އެކު މަޝްވަރާ ކުރައްވައިފައެވެ. މާދަމާ މުއްޔަށާއި ވޭވަށަށް ރައީސް ވަޑައިގަތުމަށް ވަނީ ހަމަޖެހިފައެވެ.
