މ. މަޑުއްވަރީގެ ބަނދަރު ހަދާނީ އެ ރަށު ރައްޔިތުން ބޭނުންވާ ގޮތަށް ކަމަށް، ރައީސް އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ރަސްމީ ދަތުރުފުޅެއްގައި މަޑުއްވަރި އަށް ވަޑައިގެން ރައީސް ވިދާޅުވީ، އެ ރަށުގެ ބަނދަރުގެ މައްސަލަ އާއި ރަށް ގިރުމުގެ މައްސަލަ، ރަށު ކައުންސިލުންނާއި އަންހެނުންގެ ކޮމިޓީން ވެސް ފާހަގަކޮށްފައިވާ ކަމަށެވެ.
އެ މަސައްކަތް އެމްޓީސީސީ އާ ހަވާލު ކުރެވިފައިވާ ކަމަށާއި، ބަނދަރުގެ ކޮންސެޕްޓް ފައިނަލްވިހާ އަވަހަށް އަމަލީ މަސައްކަތް ފެށިގެން ދާނެ ކަމަށް ރައީސް ވިދާޅުވިއެވެ. މަޑުއްވަރީގެ ބަނދަރު ހެދުމުގެ މަސައްކަތުގެ ތެރޭގައި ރަށް ގިރާ ސަރަހައްދު ހިމާޔަތް ކުރުމުގެ މަސައްކަތް ވެސް ހިމެނެއެވެ.
ރައީސް ވިދާޅުވި ގޮތުގައި، ބަނދަރު ހެދުމަށް ޕްލޭނިން މިނިސްޓްރީން ހަދާފައިވާ ޑިޒައިނާ ގުޅޭ ގޮތުން މަޑުއްވަރީގެ އާންމުންނަށް މައުލޫމާތު ދިނުމަށް މި ފެށޭ މަހު އެ މިނިސްޓްރީގެ ޓީމެއް އެ ރަށަށް ގޮސް މަޝްވަރާކުރާނެއެވެ.
އަދި ބަނދަރު ހަދާނީ އާންމުންނާ މަޝްވަރާކުރުމަށް ފަހު އާންމުން ބޭނުންވާ ގޮތަށް ކަމުގެ ޔަގީންކަން ރައީސް ވަނީ މަޑުއްވަރީގެ އާންމުންނަށް ދެއްވައިފައެވެ.
ބަނދަރުގެ އިތުރުން މަޑުއްވަރީގައި ކުރަން ހަމަޖެހިފައިވާ ބައެއް މަސައްކަތްތައް ރައީސް ފާހަގަކުރެއްވިއެވެ. އެ ކަންކަމަކީ:
- މަޑުއްވަރީގައި މޮބައިލް ލެބޯޓްރީގެ ހިދުމަތް ފެށިގެން ދިއުން
- އެ ރަށު ޒުވާނުންގެ މަރުކަޒުގެ މަސައްކަތް ފެށިގެން ދިއުން
މ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ރައީސް ވަނީ ރަތްމަންދުއަށް ވަޑައިގެން، އެ ރަށުގައި ސަރުކާރުން ހިންގަމުންދާ މަޝްރޫއުތަކާއި، ކުރިއަށް ހުރި މަޝްރޫއުތަކާ ބެހޭ ގޮތުން އާންމުންނަށް މައުލޫމާތު ދެއްވައިފައެވެ. އަދި އެމަނިކުފާނު ވަނީ ދިއްގަރަށް ވަޑައިގެންފައެވެ.
އެ އަތޮޅަށް ކުރައްވަމުން ގެންދަވާ ދަތުރުފުޅު ނިންމަވާލެއްވުމަށް ފަހު، ރައީސް މާދަމާ މާލެ ވަޑައިގަންނަވާނެއެވެ.
