ހުން އައުމުން ހއ. ހޯރަފުށި ސިއްހީ މަރުކަޒަށް ދިޔަ އެއް އަހަރުގެ ކުޑަކުއްޖަކަށް ފަރުވާ ދޭން ދެކޮޅު ހަދައި، ނިދާފައި އޮންނަ ޑޮކްޓަރު ސަސްޕެންޑު ކޮށްފައިވާ ކަމަށް، އެ ތަނުން ބުނެފިއެވެ.
"ދަ ޕްރެސް" އަށް މައުލޫމާތު ދެއްވަމުން ހޯރަފުށި ސިއްހީ މަރުކަޒުގެ މެނޭޖަރު އިބްރާހީމް ރަޝީދު ވިދާޅުވީ، ހެލްތު މިނިސްޓްރީން ޑޮކްޓަރު މަގާމުން ވަކިކުރަން ދެން ސަސްޕެންޑުކޮށްފައިވާ ކަމަށެވެ.
އޭނާ ވިދާޅުވި ގޮތުގައި ޑޮކްޓަރުގެ ޝަކުވާ ލިބެމުންދާތާ ދުވަސްތަކެއް ވެއްޖެއެވެ. ޑޮކްޓަރާ ވަކިން ބައްދަލުކޮށް، އެކި ފަހަރު މަތިން ނަސޭހަތް ދީފައިވާނެ ކަމަށް ވެސް ވިދާޅުވިއެވެ.
ހެލްތު މިނިސްޓްރީން ބުނީ، ނައިޖީރިއާ އަށް ނިސްބަތްވާ އެ ޑޮކްޓަރުގެ އަހްލާގީ މައްސަލަތައް މިނިސްޓްރީގެ އެޗްއާރް ޑިޕާޓްމަންޓުން ބަލަމުންދާ ކަމަށެވެ. އަދި އެ ހާދިސާ ހިނގައިޔަ ގޮތުގެ ރިޕޯޓެއް ފޮނުވުމަށް ހޯރަފުށި ހެލްތު ސެންޓަރަށް އަންގާފައިވާނެ ކަމަށާއި އެ ރިޕޯޓަށް ބެލުމަށް ފަހު ޑޮކްޓަރާ މެދު ފިޔަވަޅު އަޅާނެ ކަމަށް ވެސް މިނިސްޓްރީން ބުންޏެވެ.
ޑޮކްޓަރު ނިދާ މައްސަލަ މިދިޔަ ހޯމަ ދުވަހު ފެންމަތިވިއިރު، އޭނާ އެކި ދުވަސްމަތިން ޑޮކްޓަރު ކޮޓަރީގައި ހުންނަ މޭޒުގައި ބޯ ޖަހައިގެން ނިދާފައި އޮންނަ ފޮޓޯތަކެއް ސޯޝަލް މީޑިއާގައި ވަނީ އާންމުވެފައެވެ. އެ ފޮޓޯތަކުން ފެންނަ ގޮތުގައި ބަލި މީހަކު ޑޮކްޓަރު މޭޒު ކައިރީގައި އިންނަ އިރު ވެސް އެ ޑޮކްޓަރު ބޯއަޅާލައިގެން އޮންނަ މަންޒަރު ފެނެއެވެ.
އެ މައްސަލަ ފެންމަތިކޮށްފައި ވަނީ ހުން ގަދަވެގެން ޑޮކްޓަރަށް ދައްކަން ދިޔަ އެއް އަހަރުގެ ކުއްޖާގެ ބައްޕައެވެ. ފޭސްބުކްގައި ކުރި ޕޯސްޓެއްގައި އެ ކުއްޖާގެ ބައްޕަ ބުނީ، ޑޮކްޓަރުގެ ގާތު އާދޭސް ކުރުމުން ވެސް ޑޮކްޓަރު ބުނެފައި ވަނީ އޭނާ އަރާމު ކުރަނީ ކަމަށެވެ.
އެތައް ފަހަރެއްގެ މަތިން ވެސް ކުއްޖާގެ ހާލަތު ކިޔައިދިނުމުން ޑޮކްޓަރު ފަރުވާ ދޭން ދެކޮޅު ހެދި ކަމަށާއި، ހޮސްޕިޓަލްގެ މެނޭޖަރު ބުނުމުން ވެސް ކުއްޖާ އަށް ފަރުވާ ދީފައިނުވާ ކަމަށް، އެ ކުއްޖާގެ ބައްޕަ ބުންޏެވެ.
