ތަނަވަސްކަން އެންމެ ބޮޑަށް ހޯދާފައިވާ ގައުމުތަކަކީ މުޅިންހެން ބަރުލަމާނީ ނިޒާމުގެ ގައުމުތަކުން ކަމަށް މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވެއްޖެއެވެ.

އިންތި މިފަދައިން ވިދާޅުވެފައި ވަނީ ވެރިކަން ކުރާ ނިޒާމު ބަރުލަމާނީ ނިޒާމަށް ބަދަލުކުރެއްވުމަށް ރައީސް މުހައްމަދު ނަޝީދު ކުރައްވަމުން ގެންދަވާ މަސައްކަތްތަކުގެ ދަށުން އެމްޑީޕީގެ 4 ވަނަ ކޮންގްރެސްއަށް ހުށަހެޅުއްވި ގަރާރު އަނބުރާ ގެންދެވުމަށް ރައީސް އިބްރާހިމް މުހައްމަދު ސޯލިހް އެދިވަޑައިގެންފައިވާ ދަނޑިވަޅެއްގައެވެ.

އިންތި ވިދާޅުވީ ދުނިޔޭގެ އެންމެ ތަހުޒީބު އަދި ސުލްހައާއި ތަނަވަސްކަން އެންމެ ބޮޑަށް ހޯދާފައިވާ ގައުމުތަކަކީ ގާތްކަނޑަކަށް ހުސް ބަރުލަމާނީ ނިޒާމުގެ ގައުމުތައް ކަމަށެވެ. އަދި އެ ހަގީގަތަށް ގޮންޖަހައި ރިޔާސީ ނިޒާމް މާ ރަނގަޅުވާނެ ކަމަށް ބުނެވޭނެ ވަރުގެ މާ މޮޅު މީހެއް މި ގައުމުގައި ވަކި ހުރި ކަމަކަށް ނުދެކޭ ކަަމަށް ވެސް އިންތި ވަނީ ވިދާޅުވެފައެވެ.

ރައީސް ނަޝީދާއި އެމަނިކުފާނުގެ ފެކްޝަނުން ބަރުލަމާނީ ނިޒާމެއް ގެނައުމަށް މަސައްކަތް ކުރައްވާ އިރު، އެކަމާ ގިނަ ބަޔަކު ވަނީ ދެކޮޅު ހައްދަވާފައެވެ. އޭގެތެރޭގައި އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒް އިސްމާއިލާއި، އަދާލާތު ޕާތީގެ ލީޑަރު އަދި ހޯމް މިނިސްޓަރު އިމްރާން އަބްދުﷲ އާއި އެމްއެންޕީގެ ލީޑަރު އަދި ދަނގެތީ ދާއިރާގެ މެންބަރު މުހައްމަދު ނާޒިމާއި އދގެ 76 ވަނަ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރުކަންވެސް ކުރައްވާ އަބްދުﷲ ޝާހިދު ހިމެނިވަޑައިގަންނަވައެވެ.

ހަބަރު އިމްތިޔާޒް ފަހުމީ އެމްޑީޕީ