އަލަށް ތަންފީޒުކުރެވުނު ތައުލީމީ ގާނޫނަށް އަމަލުކުރަން ފެށިތާ އަހަރެއްވެފައިވާއިރު، ހުރިހާ ފަރާތްތަކުން ވެސް އެންމެ ބޮޑު އިސްކަމެއް ދޭންވީ ދަރިވަރުންގެ ރައްކާތެރިކަން ކަށަވަރުކުރުމަށް ކަމަށް، އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
ދިރާސީ އާ އަހަރު ފެށުމުގެ މުނާސަބަތުގައި މިއަދު ދެއްވި ހިތާބުގައި މިނިސްޓަރު ވިދާޅުވީ، މި އަހަރު ލިބޭނެ އެންމެ ބޮޑު އެއް އުފަލަކީ ކޮވިޑަށް ފަހު އާންމު ހާލަތުގައި ކިޔެވުމުގެ ނަސީބު ލިބުން ކަމަށެވެ. ވުމާއެކު، ކިޔެވުމުގެ އިތުރުން އެހެނިހެން ހަރަކާތްތަކުގައި ދަރިވަރުން ބައިވެރިވުމުގެ ފުރުސަތު ފަހިވެއްޖެ ކަމަށް ވިދާޅުވެ، އިތުރު ހަރަކާތްތަކުގައި ދަރިވަރުން ބައިވެރިކުރުވުމަށް ސްކޫލްތަކުންނާއި ބެލެނިވެރިން ސަމާލުކަން ދިނުމަށް މިނިސްޓަރު އެދިވަޑައިގަތެވެ.
މިނިސްޓަރު ވިދާޅުވި ގޮތުގައި، އަލަށް ތަންފީޒުކުރެވުނު ތައުލީމީ ގާނޫން ހަވާލުކުރެވިފައިވާ އެންމެ މުހިންމު ކަމަކީ ދަރިވަރުންގެ ރައްކާތެރިކަމެވެ. އެހެންކަމުން، ދަރިވަރުންނާ ދިމާވާ އެންމެން ވެސް ދަރިވަރުންގެ ރައްކާތެރިކަމަށް ސަމާލުކަން ދިނުމަށާއި ދަރިވަރުންގެ މަސްއޫލިއްޔަތު އިސްކުރުމަށް މިނިސްޓަރު ގޮވާލެއްވިއެވެ.
"ސްކޫލާއި ސްކޫލުން ބޭރުގައި ދަރިވަރުންނާ މުއާމަލާތްކުރާ މީހުންނަކީ ކޮންބައެއްކަން ދެނެގަނެ، އެއްވެސް މީހެއްގެ ފަރާތުން ދަރިވަރަކަށް ގެއްލުމެއް ވިޔަ ނުދިނުމަށް ސްކޫލްތަކުގެ އެންމެހާ މުވައްޒަފުންނާއި ބެލެނިވެރިން ހާއްސަ ސަމާލުކަމެއް ދެއްވަންޖެހޭ." މިނިސްޓަރު ވިދާޅުވިއެވެ.
އެގޮތުން، ޓިއުޝަނަށް ދަރިވަރުން ފޮނުވާއިރު، އަދި އިތުރު ހަރަކާތްތަކުގައި ދަރިވަރުން ބައިވެރިކުރާއިރު އެ ފޮނުވޭ ތަނަކީ މިނިސްޓްރީގެ ގަވައިދުތަކާ އެއްގޮތަށް ހިންގާ ތަންތަންކަން ބެލެނިވެރިން ކަށަވަރުކުރަން ޖެހޭ ކަމަށް، މިނިސްޓަރު ވިދާޅުވިއެވެ.
