ކުރީގެ އެޑިއުކޭޝަން މިނިސްޓަރު ޑރ. އައިޝަތު އަލީ އޭނާގެ ރަސްމީ އީމެއިލްތައް ޑިލީޓްކުރެއްވި ކަމަށް ތުހުމަތުކުރެވޭ މައްސަލައެއް ބަލަން ފަށައިފިއެވެ.
މީޑިއާތަކަށް ފޮނުވި މެސެޖެއްގައި ފުލުހުން ބުނީ، ނިމިދިޔަ ސަރުކާރުގެ އެޑިއުކޭޝަން މިނިސްޓަރު ބޭނުންކުރެއްވި ރަސްމީ މެއިލްގައިވާ ހުރިހާ މެއިލެއް މިދިޔަ އަހަރު ޑިލީޓްކުރި މައްސަލައެއް މިދިޔަ ބުރާސްފަތި ދުވަހު ލިބިފައިވާ ކަމަށެވެ.
އެ މައްސަލަ ތަހްގީގުކުރަމުންދާ ކަމަށް ފުލުހުން ބުންޏެވެ.
މި މައްސަލައާ ގުޅިގެން ސްކްރީންޝޮޓެއް އާންމުކުރައްވައި ފޭސްބުކްގައި މިއަދު ކުރެއްވި ޕޯސްޓެއްގައި އައިޝަތު އަލީ ވަނީ، މިދިޔަ ނޮވެމްބަރު މަހުގެ 17 ވަނަ ދުވަހުން ފެށިގެން އޭނާގެ ރަސްމީ މެއިލް ޑީއެކްޓިވޭޓްކޮށްލާފައިވާކަން ފާހަގަކުރައްވައި، އެ މެއިލަށް ބަޔަކު ވަންނަން އުޅުނު ސަބަބަކީ ކޮބައިތޯ ސުވާލު އުފައްދަވައިފައެވެ.
"މި މެއިލުން 17 ނޮވެމްބަރު 2023 ގެ ފަހުން އެއްވެސް ފަރާތަކަށް މެއިލެއް ލިބިއްޖެނަމަ އެއީ އަޅުގަނޑުގެ ފަރާތުން ނޫންކަން ދަންނަވަން،" އިނގިރޭސިބަހުން ފޭސްބުކްގައި އައިޝަތު އަލީ ލިޔުއްވާފައިވެއެވެ.
