"ދަ ޕްރެސް" އިން ނިމިދިޔަ ރޯދަ މަހު ކުރިއަށް ގެންދިޔަ ރޯދަ އާއި ސުވާލު މުބާރާތުގެ ސުވާލުތައް ތައްޔާރު ކޮށްދެއްވައި އެހީތެރިކަން ދެއްވާފައި ވާތީ، އަގުވަޒަން ކުރުމުގެ ގޮތުން، ޤްރުއާނާ ބެހޭ މަރުކަޒު ހިންގެވުމާ ހަވާލުވެ ހުންނެވި، ސްޓޭޓް މިނިސްޓަރު ޝައިހް އިލްޔާސް ޖަމާލަށް ހަނދާނީ ފިލައެއް ދީފިއެވެ.
"ދަ ޕްރެސް" އިން ނިމިދިޔަ ރޯދަ މަހު ކުރިއަށް ގެންދިޔަ މުބާރާތްތަކާއި ޤްރުއާން ހަތިމް ޕްރޮގްރާމުގެ ނަތީޖާފާޅު ކުރުން ޖޫން 10، 2022 ގައި ވަނީ ބާއްފާއެވެ. ނަމަވެސް އެ ހަފްލާފައި ޝައިހް އިލްޔާސް އަށް އޭރު ބައިވެރިވެވަޑައި ނުގެންނެވުމުން، އެ ހަނދާނީ ފިލާ ހަވާލު ކުރީ މިއަދު ޤްރުއާނާ ބެހޭ މަރުކަޒުގައި ބޭއްވި ހަފްލާއެއްގައެވެ.
"ދަ ޕްރެސް" އިން މިދިޔަ ރޯދަ މަހު "ރޯދަ ކުރުވާހަކަ" މުބާރާތާައި، "ރޯދަ އާއި ސުވާލު" މުބާރާތާއި "ހަތިމް ޕްރޮގްރާމް" ގެ އިތުރުން ފްޑްބޭންކް މިލޭނިއަމް އިން ކޮންމެ ދުވަހަކު ރޯދަވީއްލުމެއް ލިބޭ ކްއީޒެއް ވަނީ ކުރިއަށް ގެންގޮސްފައެވެ.
"ހަތިމް ޕްރޮގްރާމް" ގައި 380 ފަރާތަކުން ބައިވެރިވެ ކިޔަވި އިރު، ރޯދަ އާއި ސުވާލު މުބާރާތުގައި ޖުމަލް 252 މީހަކު ބައިވެރި ވިއެވެ. އެ މުބާރާތުގައި ކޮންމެ ދުވަހު ތިން ވަގުތަކަށް ބަހާލައިގެން ޖުމްލަ 90 ސުވާލު ވަނީ ހުށަހެޅިފައެވެ.
ރޯދަމަހުގެ ކޮންމެ ދުވަހަކު ފްޑްބޭންކު މިލޭނިއަމް އިން ރޯދަވީއްލުމެއް ދިން، ކްއީޒު 10،120 މީހަކު ޖުމްލަ 15،900 ފަހަރު ކުޅެފައި ވާ އިރު މި ޕްރޮގްރާމުތަކާއި މުބާރާތްތައް ކުރިއަށް ގެންދިޔުމުގައި އެހީތެރިވެ ދެއްވި ސްޕޮންސަރުންގެ ނަން ފާހަގަ ކޮށް އެފަރާތްތަކަށް ހާއްސަ ޝުކުރެއް އަދާކުރަމެވެ.
