"ދަ ޕްރެސް" އިން މިދިޔަ ރޯދަ މަހު ކުރިއަށް ގެންދިޔަ މުބާރާތްތަކުގެ ތެރެއިން ކޮންމެ ދުވަހު ތިން ވަގުތަކަށް ބަހާލައިގެން ކުރިއަށްގެންދިޔަ "ރޯދަ އާއި ސުވާލު" މުބާރާތުން އެއް ވަނަ ހާސިލް ކުރި އައިޝަތު ނަޒީރާއަށް އިމާނު ހަވާލުކޮށްފިއެވެ.
ނަޒީރާ ވަނީ 90 ސުވާލުގެ ތެރެއިން 56 ސުވާލުގެ ޖަވާބު ދިމާކޮށްފައެވެ.
މިމަހު ނުވަ ވަނަ ދުވަހު ޓީވީއެމް އިން ލައިވްކޮށް ގެނެސްދިން ޕްރޮގްރާމުގައި "ރޯދަ ކުރުވާހަކަ" މުބާރާތާައި، "ރޯދަ އާއި ސުވާލު" މުބާރާތާއި "ހަތިމް ޕްރޮގްރާމް" ގެ ނަތީޖާ ވަނީ އިއުލާން ކޮށްފައެވެ.
މިގޮތުން ހަތިމް ކޮށްގެން އުމްރާ ދަތުރު ލިބުނީ، އައިޝަތު އާދަމް، A105827 އަށެވެ.
މީގެ އިތުރުން "ދަ ޕްރެސް" އިން މި ރަމަޟާން މަހު ހުޅުވާލި ކުރުވާހަކަ މުބާރާތުގައި ބައިވެރި ކުރި ވާހަކަ ތަކުގެ ތެރެއިން އެންމެ މޮޅު ތިން ވާހަކަ ހޮވާ އެ ފަރާތްތަކުގެ ނަންވެސް އެރޭ ވަނީ އިއުލާން ކޮށްފައެވެ. މިގޮތުން 3 ވަނަ ލިބިފައި ވަނީ، މަރިޔަމް އުލްޔާ ލިޔުނު "އުމުރަށް އެކުގައި" ވާހަކަ އަށެވެ. 2 ވަނަ ލިބިފައި ވަނީ އައިޝަތު ލިޔުޝާ ލިޔުނު "ތަފާތު ލޯތްބެއް" ވާހަކަ އަށެވެ. އަދި 1 ވަނަ ލިބިފައި ވަނީ އައިމިނަތު ޝީޒާ ލިޔުނު "އިމްތިހާން" ވާހަކަ އަށެވެ. މި މުބާރާތުގައި 3 ވަނަ އަށް 500 ރުފިޔާ، ދެވަނަ އަށް 1000 ރުފިޔާ އަދި އެއްވަނަ އަށް 1500 ރުފިޔާ ލިބޭނެއެވެ.
މީގެ އިތުރުން ނަތީޖާ އިއުލާން ކުރުމުގެ އެ ހަފްލާގައި، "ދަ ޕްރެސް ރޯދަ" ޕްރޮގްރާމަށް އެހީތެރިކަން ދެއްވި ފަރާތްތަކަށް ހަނދާނީ ފިލައެއް ވެސް ވަނީ ދީފައެވެ.
