ކާބޯތަކެތީގެ ރައްކާތެރިކަން ދެމެހެއްޓުމަކީ އެންމެންގެ ޒިންމާއެއް ކަމަށް ދެކި މަސައްކަތްކުރުމަށް މޯލްޑިވްސް ފްޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ގޮވާލައިފިއެވެ.
ދުނިޔޭގެ ކާބޯތަކެތީގެ ރައްކާތެރިކަމުގެ ދުވަހާ ގުޅިގެން އެމްއެފްޑީއޭއިން ނެރުނު ބަޔާނެއްގައި ބުނީ ޖަރާމާއި ތަފާތު ކެމިލުން ތަޣައްޔަރުވެފައިވާ ކާބޯތަކެތީގެ ނުރައްކާ އަހަރު 600 މިލިއަނަށް ވުރެ ގިނަ މީހުން ތަހައްމަލު ކުރަމުންދާ ކަމަށް ދުނިޔޭގެ ސިއްހަތު ޖަމްއިއްޔާގެ އެންމެ ފަހުގެ ތަފާސް ހިސާބު ދައްކާ ކަމަށެވެ.
މީގެތެރެއިން އަހަރަކު ގާތްގަނޑަކަށް 420,200 މީހުން ފުރާނަ ގެއްލިގެން ދާ ކަމަށް ތަފާސް ހިސާބުތަކުން ދައްކާ ކަމަށް އެމްއެފްޑީއޭއިން ބުނެއެވެ.
އެމްއެފްޑީއޭއިން ބުނީ، ކާބޯތަކެތީގެ ޒަރީއާއިން ޖެހޭ ބަލިތަކުގެ ތެރޭގައި އެންމެ އާދައިގެ ބޭރަށް ހިނގުމުން ފެށިގެން ކެންސަރުފަދަ ނުރައްކާތެރި ބަލިތައް ހިމެނޭއިރު ކާބޯތަކެތީގެ ރައްކާތެރިކަން ކަވަރުކުރުމަށް އެކަށީގެންވާ ފިޔަވަޅު އެޅިއްޖެނަމަ އެފަދަ ބަލިން ރައްކާތެރިވާ ކަމަށެވެ.
އޭގެ ސަބަބުން ގެއްލިގެދާ ފުރާނައިގެ އަދަދު އިންތިހާއަށް މަދުކުރެވޭނެ ކަމަށާއި އަދި މިއީ އާއްމު ސިއްހަތަށް ހުރި ގޮޖެހުމެއްގެ އިތުރުން އިގްތިސާދަށް ވެސް އޮތް ބޮޑު ގޮންޖެހުމެއް ތަޖުރިބާކާރުން ފާހަގަކުރާ ކަމަށް އެމްއެފްޑީއޭއިން ބުނެއެވެ.
އެމްއެފްޑީއޭއިން ބުނީ، މި އަހަރުގެ ކާބޯތަކެތީގެ ރައްކާތެރިކަގެ ދުވަހުގެ ޝިއާރެއްގެ ގޮތުގައި ކަނޑައަޅާފއިވަނި "ދުޅަހެޔޮ ސިއްޙތަށް ރައްކާތެރި ކާބޯތަކެތި" ކަމަށެވެ. މިގޮތުން ދަނޑުން ސުފުރާއާއި ދެމެދުގައިވާ ހުރިހާ މަރުހަލާއެއްގައި ބައިވެރިވާ ސަރުކާރުގެ މުއައްސަސާތަކާއި، އަމިއްލަ ފަރާތްތަކާއި ވިޔަފާރިވެރިންނާއި އަމިއްލަ ފަރުދުން ކާބޯތަކެތީގެ ރައްކާތެރިކަން ދެމެހެއްޓުމަކީ އެންމެންގެ ޒިންމާއެއް ކަމަށް ދެކި މަސައްކަތްކުރުމަށް އެމްއެފްޑީއޭއިން ވަނީ ގޮވާލާފައެވެ.
މިއަހރުގެ ކާބޯތަކެތީގެ ރައްކާތެރިކަމުގެ ދުވަހާ ގުޅިގެން ކާބޯތަކެތީގެ ރައްކާތެރިކަމަށް ހޭލުންތެރިކުރުވުމުގެ ދުވުމަކާއި، މިސްމީޑިއާ މެދުވެރިކޮށް ކަމާގުޅޭ މެސެޖުތައް ފޮނުވުމާއި އަދި މިނޫންވެސް ތަފާތު ހާރަކާތްތައް އެމްއެފްޑީއޭއިން ވަނީ ރާވާފައެވެ.
