އެމެރިކާ އިން ފައިޒާ ވެކްސިންގެ އިތުރު 100،620 ޑޯޒް ވެކްސިން ރާއްޖެއަށް ހަދިޔާ ކޮށްފިއެވެ.
އެމެރިކާ އިން ރާއްޖެއަށް ހާއްސަކޮށްފައިވާ މިޝަނުން ނެރުނު ބަޔާނެއްގައި ބުނީ މި ވެކްސިންތައް އަތޮޅުތެރެއަށް ފޯރުކޮށް ދިނުމާއި ހެލްތު ވޯކަރުން ތަމްރީނު ކުރުމުގެ އިތުރުން ވެކްސިން ޖެހުމަށް މީީހުން ބާރުވެރިކުރުވުމަށް ޔޫއެސް އެޖެންސީ ފޯ އިންޓަނޭޝަނަލް ޑިވެލޮޕްމަންޓުން އެހީވާނެ ކަމަށެވެ. އަދި މިއީ ކޮވިޑުގެ އާ ވޭރިއަންޓުން ސަލާމަތްވުމަށް ބޫސްޓާ ޑޯޒް ޖެހުމަށް ދިން އެހީއެއް ކަމަށް އެމެރިކާއިން ބުނެއެވެ.
އެ ގޮތުން ކޯވެކްސް ފެސިލިޓީގެ ދަށުން އެމެރިކާ އިން ލައްކައަކަށް ވުރެ ގިނަ ޑޯޒްގެ ކޮވިޑް ވެކްސިން ވަނީ ހަދިޔާ ކޮށްފައެވެ. ރާއްޖެއަށް ދިން މި އެހީއާއެކު އެމެރިކާ އިން މިހާތަނަށް ހަދިޔާކުރި ވެކްސިންގެ އަދަދު މި ވަނީ 439،920 އަށް އަރާފައެވެ.
މުޅި ދުނިޔެއަށް ކުރިމަތިވި ކޮވިޑް ބަލިމަޑުކަމާ ރާއްޖެ ކުރިމަތިލީ 2020 ވަނަ އަހަރުގެ މާޗް މަހުގައެވެ. ކޮވިޑާއެކު ރާއްޖެއަށް ކުރިމަތިވި ގޮންޖެހުންތަކުން އަރައިގަތުމަށް އެމެރިކާއިން ވަނީ ރާއްޖެއަށް ވަރަށް ގިނަ އެހީތައް ވެދީފައެވެ. ވެކްސިން ހަދިޔާ ކުރުމުގެ އިތުރުން 60 ވެންޓިލޭޓަރާއި އެއް ލައްކަ ރެޕިޑް ޑައިގްނޯސްޓިކް ޓެސްޓު ވެސް ހަދިޔާކޮށްފައި ވާއިރު މަދަނީ ޖަމިއްޔާތަކާއި ގުޅިގެން އިޖުތިމާއީ ރައްކާތެރިކަން އިތުރު ކުރުމަށް ކުރާ މަސައްކަތަށް ވެސް އެމެރިކާއިން ވަނީ އެހީތެރި ވެދީފައެވެ.
އެ ގައުމުން ވަނީ އެކި ގައުމުތަކަށް ޖުމްލަ 1.2 ބިލިއަން ވެކްސިން ޑޯޒް ހަދިޔާކުރާނެ ކަމަށް ވައުދު ވެފައެވެ.
އެމެރިކާ އިން ރާއްޖެއަށް ވެކްސިން ހަދިޔާކުރި އިރު މީހާރު ރާއްޖެއިން ކޮވިޑްގެ ކޭސްތައް ފެންނަ ވަރު ވަނީ ވަރަށް ބޮޑަށް ދަށް ވެފައެވެ.
