ރިޒާވް ހުސްވެ ދަރަނިވެރި ވެދާނެކަމަށް ބުނުމުން ރާއްޖޭގެ މާލީ ސިޔާސަތު ރައީސް ދިފާއު ކުރައްވައިފި

ސަރުކާރުން އިގްތިސޯދީ ގޮތުންނާއި މާލީ ގޮތުން އަޅަމުންދާ ފިޔަވަޅުތަކަކީ ކާމިޔާބު ހާސިލް ކުރެވޭނެ ފިޔަވަޅުތަކެއް ކަމަށް ވިދާޅުވެ، ރައީސް އިބްރާހީމް މުހައްމަދު ސޯލިހު، ސަރުކާރުގެ ފިޔަވަޅުތައް ދިފާއު ކުރައްވައިފިއެވެ.

ސަރުކާރުގެ މާލީ ފިޔަވަޅުތައް ދިފާއު ކުރައްވައި ރައީސް މިހެން ވިދާޅުވެފައި ވަނީ، އަންނަ އަހަރު ރާއްޖޭގެ ރިޒާވް ހުސްވެ، ދަރަނި ނުދެއްކޭ ހިސާބަށް ދިއުމުގެ ފުރުސަތު ރާއްޖެއަށް ބޮޑުކަމަށް، އެމެރިކާގެ އިންވެސްޓްމަންޓް ބޭންކެއް ކަމަށްވާ ޖޭޕީ މޯގަނުން އިންޒާރު ދީފައި ވަނިކޮށެވެ.

އެމްޑަބްލިއުއެސްސީ އަށް 27 އަހަރު ފުރުން ފާހަގަކުރުމުގެ ގޮތުން ކްރޮސްރޯޑްސްގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ކޮވިޑް-19 ގެ ބަލިމަޑުކަމާއި، ރަޝިއާ ޔޫކްރައިން ހަނގުރާމައިގެ ސަބަބުން ދުނިޔޭގެ އިގްތިސޯދަށް އަންނަ ބަދަލުތަކާ އެކު ރާއްޖެއަށް ވެސް އެކަމުގެ ނޭދެވޭ އަސަރު ކުރަމުން ދާ ކަމަށެވެ.

ރައީސް ވިދާޅުވި ގޮތުގައި:

• ޔޫކްރައިން ރަޝިއާގެ ހަނގުރާމަ އާ ހެދި ރަޝިއާއިން ފަތުރުވެރިން އައުން ހުއްޓުމަކަށް އައި
• ތެލާއި އެހެނިހެން ތަކެތީގެ ވެސް އަގު އުފުލިގެން ދިޔަ
• ކުރިން އަންދާޒާ ކުރި ވަރަށް ވުރެ ތެޔޮ ގަތުމަށާއި މުދާ އެތެރެކުރުމަށް ބޮޑު ހޭދައެއް ކުރަން ޖެހުނު

އެ ހުރިހާ ކަމަކަށް ރިއާޔަތްކޮށް އިއްޔެ ބޭއްވި އިކޮނޮމިކް ކައުންސިލްގެ ބައްދަލުވުމުގައި، ހާލަތާ ގުޅިގެން ފިޔަވަޅުތަކެއް އަޅަން ނިންމަވާފައިވާ ކަން ރައީސް ހާމަ ކުރެއްވިއެވެ.

"އެގޮތުން އަޅުގަނޑުމެން ކުރިން ނިންމާފައި އޮތް ރިސޯޓުތަކުން ނަގާ ލޭންޑް ރެންޓް ކުޑަކުރުމަށް ނިންމާފައި އޮތް ނިންމުން މިވަގުތަށް މަޑުޖައްސާލަން އަޅުގަނޑުމެން މިއަދު ވަނީ ނިންމާފައި. އެގޮތުން، ބަޖެޓަށް އުނިވެގެންދާނެ ބައި އިރާދަކުރެއްވިއްޔާ، އެ ބައި ކަވަރުވެގެންދާނެ. އޭގެއިތުރުން، އިތުރު މެޝާސްތަކެއް ނެގުމަށް މިއަދު އަޅުގަނޑުމެން ވާނީ ނިންމާފައި." ރައީސް ވިދާޅުވިއެވެ.

އަދި ދައުލަތުގެ ދަރަންޏަކީ އަބަދުވެސް ސަރުކާރަށް ނަގަމުން، ދައްކަމުންދާ އެއްޗެއް ކަމަށާއި، ދަރަނި ދެއްކުމުގައި އެއްވެސް ދަތިކަމެއް ނެތް ކަމަށް ވިދާޅުވެ، ރައީސް ވަނީ ކުރިއަށް އޮތް އަހަރާއި 2024 ގައި ވެސް އެއްވެސް ދައްޗެއް ނެތި، ބަޖެޓުކޮށްފައިވާ ގޮތަށް، ދަރަނި ދެއްކުމުގެ ކަންކަން ކުރިއަށް ދާނެ ކަމުގެ ޔަގީންކަން ދެއްވައިފައެވެ.

ރައީސް މިހެން ވިދާޅުވެފައި ވާއިރު، ޖޭޕީމޯގަނުން ކުރި ދިރާސާއަކުން ދެއްކި ގޮތުގައި، 52 ގައުމަކަށް ދަރަނި ދެއްކުމުގައި ދަތިތަކާ ކުރިމަތިވެފައި ވެއެވެ. އޭގެ ތެރެއިން އަށް ގައުމެއްގެ ރިޒާވް ހުސްވެ، ދަރަނި ނުދެއްކޭ ހިސާބަށް އެ ގައުމުތައް ދާނެ ކަމަށް ލަފާކޮށްފައި ވާއިރު، އެ ލިސްޓުގެ ދެވަނައިގައި ވަނީ ރާއްޖެއެވެ.

މިކަމާ ގުޅިގެން ހަތަރު މީޑިއާ އެއް ފިނޭންސް މިނިސްޓްރީގެ އޮފީހަށް ގެންގޮސް އިއްޔެ ބޭއްވި ސިއްރު ނޫސްވެރިންގެ ބައްދަލުވުމެއްގައި ފިނޭންސް މިނިސްޓަރު އިބްރާހީމް އަމީރު ވިދާޅުވީ، ރާއްޖޭގެ ރަސްމީ ރިޒާވްގައި މިހާރުވެސް 800 މިލިއަން ޑޮލަރު އެބަހުރި ކަމަށާއި ރާއްޖެ ބަނގުރޫޓު ނުވާނެ ކަމަށެވެ. ދައުލަތުގެ ހަރަދު ބޮޑުވީމައި އެ ނުރައްކާވެސް އެބައޮތް ކަމަށާއި އެހެންނަމަވެސް އެކަން ބެލެހެއްޓުމަށްޓަކައި ރައީސްއާއެކު އަދި ސަރުކާރު ފެންވަރުގައި މަސައްކަތް ކުރަމުން ދާ ކަމަށް ވެސް އޭނާ ވިދާޅުވެފައިވެއެވެ.