ސްރީ ލަންކާގެ ކުރީގެ ބޮޑުވަޒީރު މަހިންދަ ރާޖަޕަކްސަގެ އާއިލާއަށް ސޮނޭވާގެ ރިސޯޓަކުން ވިލާއެއް ވިއްކުމަށް މަޝްވަރާކުރަމުން އަންނަ ކަމަށް ބުނެ ދެކެވޭ ވާހަކަތައް ރައްޔިތުންގެ މަޖިލީހުން ދޮގުކޮށްފިއެވެ.
ރާއްޖޭގެ ހަބަރުތައް އިނގިރޭސިބަހުން ގެނެސްދޭ ނޫހެއް ކަމަށްވާ "ދަ މޯލްޑިވްސް ޖާނަލް"ގައި އޮތް ލިޔުމެއްގައިވާ ގޮތުން، މަޖިލީހުގެ ރައީސް މުހައްމަދު ނަޝީދު ވަނީ ރާޖަޕަކްސަގެ އާއިލާއަށް ސޮނޭވާގެ ރިސޯޓަކުން ވިލާއެއް ވިއްކަން ހުށަހަޅުއްވާފައެވެ. އަދި ނަޝީދަކީ ސޮނޭވާގެ ސީއީއޯ ސޯނޫ ޝިވްދާސަނީ އާ ގާތް ގުޅުމެއް އޮންނަ ބޭފުޅެއް ކަމަށް ވެސް އެ ލިޔުމުގައިވެއެވެ.
އޭގެ އިތުރުން، 12 މިލިއަން ޑޮލަރަށް ސޮނޭވާއިން ރާޖަޕަކްސާގެ އާއިލާއަށް ވިލާއެއް ވިއްކުމަށް ސޯނޫ އެއްބަސްވެ ވަޑައިގެންފައިވާ ކަމަށާއި، ރާޖަޕަކްސާ އާއިލާގެ މުވައްޒަފުންނަށާއި ސެކިއުރިޓީ އަށް ތިން މިލިއަން ޑޮލަރަށް އިތުރު ވިލާއެއް ވިއްކުމަށް ވެސް ސޯނޫ އެއްބަސްވެ ވަޑައިގެންފައިވާ ކަމަށް، އެ ލިޔުމުގައި ބުނެފައިވެއެވެ.
އެކަމާ ގުޅިގެން މަޖިލީހުން ބުނީ، ލަންކާގައި ނަޝީދުގެ ރޯލަކީ އެ ގައުމަށް ދިމާވެފައިވާ އިގްތިސޯދީ ދަތިތަކުން އަރައިގަތުމަށް ބޭރުގެ އެހީ ހޯދުމާ ގުޅޭ ކަންކަން ވިލަރެސް ކުރުމަށްޓަކައި ކުރަން ޖެހޭ މަސައްކަތް ކުރުން އެކަނި ކަމަށާއި، އެހެން އެއްވެސް މަސައްކަތެއް އެމަނިކުފާނު ކުރައްވަމުން ނުގެންދަވާ ކަމަށެވެ.
"ސްރީލަންކާ އަށް ދިމާވެފައިވާ އިގްތިސޯދީ ދަތިތަކުން އަރައިގަތުމަށްޓަކައި ލަންކާ އަށް ބޭރުގެ އެހީ ހޯދުމަށް އެގައުމަށް އެމަނިކުފާނު އެހީތެރިކަން ދެއްވަމުން ގެންދަވާނެ. ސްރީލަންކާގެ ދާހިލީ ކަންތައްތަކަކީ އެ ގައުމުގެ ރައްޔިތުން ހައްލުކުރާނެ ކަންތައްތައް." މަޖިލީހުން ބުންޏެވެ.
މަޖިލީހުގެ އިތުރުން، ސޮނޭވާގެ ސީއީއޯ ސޯނޫވެސް ވަނީ އެ ލިޔުން ދޮގު ކުރައްވައިފައެވެ. އޭނާ ވިދާޅުވި ގޮތުގައި، ރާޖަޕަކްސަގެ އާއިލާގެ އެއްވެސް މެންބަރަކު ސޮނޭވާއިން ވިލާއެއް ގަތުމަށް މަޝްވަރާ ކުރައްވާފައެއް ނުވެއެވެ.
ލަންކާ އަށް ދިމާވެފައިވާ އިގްތިސޯދީ ދަތިތަކުން އަރައިގަތުމަށް ބޭރުގެ އެހީ ހޯދުމާ ގުޅޭ ކަންކަން ވިލަރެސް ކުރުމަށްޓަކައި އެ ގައުމުން ނަޝީދު ހަމަޖައްސާފައި ވަނީ މިދިޔަ ބުރާސްފަތި ދުވަހުގައެވެ.
ލަންކާގެ ބައެއް މީޑިއާތަކުން ރިޕޯޓްކޮށްފައިވާ ގޮތުގައި، އެ ގައުމުގެ ބޮޑުވަޒީރު ރަނިލް ވިކްރަމަސިންހަ އާއި ބައްދަލުކުރައްވައި ކުރެއްވި މަޝްވަރާގައި ލަންކާ އަށް ދިމާވެފައިވާ ހާލަތުން އަރައިގަތުމަށް އެހީތެރިވެދެއްވަން ހުށަހަޅުއްވާފައި ވަނީ ނަޝީދެވެ.
