ސްރީ ލަންކާގެ އިދިކޮޅު ލީޑަރު ސަޖިތު ޕްރެމަދާސަ އާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ބައްދަލު ކުރައްވައިފިއެވެ.
ލަންކާ އަށް ދިމާވެފައިވާ އިގްތިސޯދީ ދަތިތަކުން އަރައިގަތުމަށް ބޭރުގެ އެހީ ހޯދުމާ ގުޅޭ ކަންކަން ވިލަރެސް ކުރުމަށްޓަކައި އެ ގައުމުން ނަޝީދު ހަމަޖައްސާފައި ވަނީ މިދިޔަ ބުރާސްފަތި ދުވަހުގައެވެ.
ލަންކާގެ ބައެއް މީޑިއާތަކުން ރިޕޯޓްކޮށްފައިވާ ގޮތުގައި، އެ ގައުމުގެ ބޮޑުވަޒީރު ރަނިލް ވިކްރަމަސިންހަ އާއި ބައްދަލުކުރައްވައި ކުރެއްވި މަޝްވަރާގައި ލަންކާ އަށް ދިމާވެފައިވާ ހާލަތުން އަރައިގަތުމަށް އެހީތެރިވެދެއްވަން ހުށަހަޅުއްވާފައި ވަނީ ނަޝީދެވެ.
ސަޖިތާ ބައްދަލު ކުރެއްވުމަށް ފަހު ކުރެއްވި ޓްވީޓްގައި ނަޝީދު ވިދާޅުވީ، ސަޖިތަށް ލަންކާގެ ހާލަތު ވަރަށް ރަނގަޅަށް އެނގިވަޑައިގަންނަވާ ކަމަށެވެ. އެގޮތުން ލަންކާގެ ސަރުކާރު ޒިންމާދާރު ކުރުވުމަށްޓަކައި އިހްލާސްތެރި މަސައްކަތެއް އިދިކޮޅުން ކުރަމުން ދާނެ ކަމުގެ ޔަގީންކަން ސަޖިތު ދެއްވާފައިވާ ކަމަށް ނަޝީދު ވިދާޅުވިއެވެ.
ލަންކާގެ އިގްތިސޯދަށް އައިސްފައިވާ ހީނަރުކަމުގެ ތެރޭގައި އެ ގައުމުގެ ބޮޑުވަޒީރު މަހިންދަ ރާޖަޕަކްސަ އިސްތިއުފާ ދެއްވުމުން، ބޮޑުވަޒީރު ކަމާ ހަވާލުވެ ވަޑައިގަތުމަށް ފަހު ދެކްކެވި ވާހަކަފުޅުގައި ރަނިލް ވަނީ، އެ ގައުމުގެ އިގްތިސޯދު ނެގެހެއްޓެވުމުގެ ޗެލެންޖު ނަންގަވައިގެން ހުންނެވި ކަމަށާއި އެކަން ކުރައްވާނެ ކަމަށް ވިދާޅުވެފައެވެ. ރައްޔިތުންގެ ތަކުލީފުތައް އަޑުއިއްވުމުގެ ފުރުސަތު ދޭންޖެހޭ ކަމަށް ވިދާޅުވެ، ރަނިލް ވަނީ ގާނޫނު ހަދާ މަޖިލީހުގައި އޭނާއަށް އޮތް އަޣުލަބިއްޔަތު ސާފުކޮށް ދެއްވާނެ ކަމަށް ވެސް ވިދާޅުވެފައެވެ.
ލަންކާ އަށް މިއަދު ކުރިމަތިވެފައިވާ ކާރިސާއިން އަރައިގަތުމަށްޓަކައި ގައުމީ ފެންވަރުގެ ސިޔާސީ ކައުންސިލެއް އެކުލަވާލަންޖެހޭ ކަމަށް ރަނިލް ފާހަގަ ކުރެއްވިއެވެ.. އަދި ވަކި ރާސްތާތަކަށް ބަހާލައިގެން ކުރު މުއްދަތާއި ދިގު މުއްދަތަކުގެ ޕްލޭންތަކެއް ތަންފީޒު ކުރަން ޖެހޭ ކަންވެސް ފާހަގަ ކުރެއްވިއެވެ.
