"އިންޑިއާ އައުޓް" ލިޔެފައިވާ ކަރުދާސްތަކެއް މާލޭގެ މަގުތަކަށް އަޅަމުންދާ މައްސަލައެއް ބަލަން ފަށައިފިއެވެ.
މީގެ ދުވަސްކޮޅެއް ކުރިން އިންޑިއާ އައުޓް ލިޔެފައިވާ ކަރުދާސްތަކެއް މާލޭގެ މަގުތަކަށް ބަޔަކު އަޅާފައިވެއެވެ. އަދި ރައީސް އޮފީހާއި، އިންޑިއާ ހައި ކޮމިޝަން އޮފީހުގެ އިތުރުން، ފޮރިން މިނިސްޓަރު އަދި އދ. ގެ އާންމު މަޖިލީހުގެ ރައީސް އަބްދުﷲ ޝާހިދުގެ ގެ ކައިރިއަށްވެސް އިންޑިއާ އައުޓް ލިޔެފައިވާ ކަރުދާސްތައް އަޅާފައިވެއެވެ.
ފުލުހުން ބުނީ، އެ މައްސަލަައާ ގުޅިގެން އެ ކަން ކުރާ މީހުން ދެނެގަނިވެއްޖެ ކަމަށާއި، އެ ކަން ކުރަމުންދާ ހަތަރު މީހެއްގެ މައްސަލަ ބަލަމުންދާ ކަމަށެވެ.
ނަމަވެސް، ކަރުދާސް އެޅި މައްސަލައިގައި މީހަކު އަދި ހައްޔަރު ނުކުރާ ކަމަށްވެސް ފުލުހުން ބުންޏެވެ.
ރާއްޖޭގެ އެކި ރަށްރަށުގައި ގާއިމްވެ ތިބި އިންޑިއާ ސިފައިން ބޭއްވުމަށް ގޮވާލައި އިދިކޮޅުން ކުރިއަށް ގެންދާ "އިންޑިއާ އައުޓް" ހަރަކާތުގެ ދަށުން، "އިންޑިއާ އައުޓް" އެކި ސިފަ ސިފައިގައި ޖަހާފައިވާ ބެނާތަކެއް އެކި ގޭގޭގައި މި ފަހުން ދަމާފައިވެއެވެ. ނަމަވެސް ފުލުހުން ވަނީ އެ ގެތަކަށް ވަދެ ބެނާތައް ނަގައިފައެވެ.
އޭގެ އިތުރުން، އިންޑިއާ އައުޓް ހަރަކާތަކީ ގައުމީ ސަލާމަތަށް އޮތް ނުރައްކަލެއް ކަމަށް ނިންމަވައި، ރައީސް އިބްރާހީމް މުހައްމަދު ސޯލިހު ވަނީ އެ ހަރަކާތް ހުއްޓުވުމަށް ތަންފީޒީ އިދާރާތަކަށް އަންގަވައި ގަރާރެއް ނެރުއްވާފައެވެ. އެ ފަހުންވެސް އިންޑިއާ އައުޓް ބެނާތައް ނަގާފައިވެއެވެ.
ނަމަވެސް، އިންޑިއާ އައުޓް ހަރަކާތް ހުއްޓުމެއް ނެތި އަދިވެސް ކުރިއަށް ދާނެ ކަމަށް އިދިކޮޅުން ބުނެފައިވެއެވެ.
