ގިނަ ބައެއްގެ އަތުން އެތަށް މިލިއަން ރުފިޔާ ނަގާ ފިލައިގެން އުޅުނު ސީލައިފް ގްލޯބަލްގެ ވެރިޔާ، އަހުމަދު މޫސާ މުހައްމަދު (އައްމަޓީ) ބަންދުން ދޫކޮށްލި މައްސަލަ ނިމެންދެން، އޭނާއަކީ ކުށްވެރިއެއް ކަން ދޭހަވާ ގޮތަށް ޕްރޮސެކިއުޓާ ޖެނެރަލް ހުސައިން ޝަމީމް ވާހަކަ ދައްކަވާ ކަމަށް ބުނެ އެކަން މަނާކުރުމުގެ އަމުރަކަށް އައްމަޓީގެ ފަރާތުން ސުޕްރީމް ކޯޓުގައި މިއަދު އެދިއްޖެއެވެ.
ފްލެޓް އަޅައިދޭނެ ކަމަށް ބުނެ ގިނަ ބައެއްގެ އަތުން ފައިސާ ނެގި މައްސަލާގައި ހައްޔަރުކޮށް، ޝަރީއަތް ނިމެންދެން ބަންދުކޮށްފައި ހުރި އައްމަޓީ މިދިޔަ މަހު ކްރިމިނަލް ކޯޓުން ދޫކޮށްލީ ޝަރުތުތަކެއް ކުރުމަށް ފަހުއެވެ. މީގެ ކުރިން ދެ ފަހަރަށް ކްރިމިނަލް ކޯޓުން އައްމަޓީ ދޫކޮށްލުމުން ވެސް، އޭރު އައްމަޓީ އަލުން ބަންދުކުރީ ހައި ކޯޓުގެ އަމުރަށެވެ. ނަމަވެސް އައްމަޓީ ބަންދުން ދޫކޮށްލި ތިން ވަނަ ފަހަރު އެ މައްސަލަ ހައިކޯޓުގައި އިސްތިއުނާފް ކުރަން އެދުމުން ވަނީ އެ މައްސަލަ ބޭރުކޮށްލާފައެވެ. އެހެންކަމުން ޕީޖީން ވަނީ ހައިކޯޓުން އެ މައްސލަަ ބޭރުކޮށްލި މައްސަލަ ސުޕްރީމް ކޯޓުގައި އިސްތިއުނާފް ކޮށްފައެވެ.
މިއަދު ސުޕްރީމް ކޯޓުގައި ބޭއްވި އަޑުއެހުމުގައި އައްމަޓީގެ ވަކީލް މަރިޔަމް ނިހާޔަތު ވިދާޅުވީ، އައްމަޓީގެ މައްސަލާގައި ކޯޓާއި ފަނޑިޔާރުންގެ ހައިބަތަށް އުނިކަން ލިބޭ ގޮތަށް ސޯޝަލް މީޑިއާ އާއި ޓްވީޓާ އާއި އަމިއްލަ ބްލޮގްތަކުގައި ލިޔަމުންދާ ކަމަށެވެ. އެގޮތުން މިދިޔަ އަހަރު އައްމަޓީ ބަންދުން ދޫކޮށްލުމާ ބެހޭގޮތުން ޕްރޮސެކިއުޓާ ޖެނެރަލް ހުސައިން ޝަމީމް ކުރެއްވި ޓްވީޓާއި، ޝަމީމްގެ އަމިއްލަ ބްލޮގްގައި ވެސް އެންމެ ފަހު އައްމަތީ ދޫކޮށްލި މައްސަލައިގައި ގާނޫނީ ވާހަކަތައް ލިޔެފައިވާ ކަމަށް ނިހާޔަތު ވިދާޅުވިއެވެ.
މިދިޔަ އަހަރު ޝަމީމް ކުރެއްވި ޓްވީޓާ ހަވާލާ ދެއްވައި، ނިހާޔަތު ވިދާޅުވީ، ކަފާލާތުގައި މީހުން ބަންދުން ދޫކުރުމާއި ޖާމިނުކޮށް މީހުން ދޫކުރުމުގެ އުސޫލުތައް ރާއްޖޭގެ ފަނޑިޔާރުންނަށް ނޭނގޭ ކަމަށް ދޭހަވާ އިބާރާތަކުން ޝަމީމް ޓްވީޓް ކުރައްވާފައިވާ ކަމަށެވެ. އަދި އައްމަޓީގެ މައްސަލާގައި ދައުލަތުގެ ވަކީލުން ދަށު ކޯޓުގެ ފަނޑިޔާރަށް ހައި ކޯޓުގައި ތުހުމަތުތައް އަމާޒުކުރި ކަމަށް އޭނާ ވިދާޅުވިއެވެ. މީގެ އިތުރުން ޝަމީމްގެ ބްލޮގްގައި ލިޔެފައި ވަނީ އިލްމީ ބަހުސެއް ކުރުމުގެ ބަދަލުގައި ވަކި މައްސަލައަކާ ސީދާ ގުޅުވައިގެން ކަމަށް އޭނާ ވިދާޅުވިއެވެ.
މިގޮތަށް ވާހަކަ ދެއްކުމުން ވަކި މީހަކީ ކުށްވެރިއެއް ކަން އާންމުންނަށް ގަބޫލު ކުރެވި އަދި މައްސަލަ ނިންމުމުގެ ކުރިން ފަނޑިޔާރުންނަށް ނުސީދާ ގޮތުން ނުފޫޒު ފޯރުވަން މަގުފަހިވާ ކަމަށް ނިހާޔަތު ވިދާޅުވިއެވެ. އަދި ފަނޑިޔާރުންނާ މެދު ކިތަންމެ އިތުބާރެއް އޮތަސް، ފަނޑިޔާރުންނަށް ނުފޫޒުތަކެއް އައިސްދާނެ ކޮންމެ ކަމެއް ހުއްޓުވަންޖެހޭ ކަމަށް ވެސް އޭނާ ވިދާޅުވިއެވެ.
ދައުލަތުން ބުނީ ސުޕްރީމް ކޯޓުގެ ފަނޑިޔާރުންނަށް ނުފޫޒު ފޯރުވަން ދައުލަތުން ކުރި ކަމެއް ނުދެއްކޭތީ މި މަރުހަލާގައި އެފަދަ އަމުރެއް ނެރެން ނުޖެހޭނެ ކަމަށެވެ. އަދި ވަކި މީހަކު އަމިއްލަ ހައިސިއްޔަތުން އެފަދަ ކަމެއް ކޮށްފި ނަމަ، އަމުރަށް އެދެން ޖެހޭނީ އެ މީހަކާ ދެކޮޅަށް ކަމަށް ވެސް ދައުލަތުން ބުނެއެވެ.
މި މައްސަލައިގެ އަޑުއެހުން އަދި ދަނި ކުރިއަށެވެ. އެ އަމުރާ މެދު ސުޕްރީމް ކޯޓުން އަދި ވަކި ގޮތެއް ނުނިންމައެވެ.
