ދުވަހަކަށް ދުވަހެއް، ނަގުދު ފައިސާ ދައުރު ކުރާ މިންވަރު ކުޑަވެ، މާލީ މުއާލަމާތުގެ ތެރެއަށް ޒަމާނީ ޓެކްނޮލޮޖީ ތައާރަފުވަމުން އަންނަ މި ދަނޑިވަޅުގައި، ޑިޖިޓަލް ފައިސާ ތައާރަފު ކުރުމަށް، ދުނިޔޭގެ އެންމެ ވަރުގަދަ ސޯޝަލް މީޑިއާ ކުންފުނި، "މެޓާ" އިން މަސައްކަތް ކުރަމުން އަންނަ ކަމަށް ހަބަރު ލިބިއްޖެއެވެ.

އެންމެ ޒަމާނީ ފައިސާތަކުގެ ތެރޭގައި މިއަދު ގުނާލެވޭ ކްރިޕްޓޯކަރަންސީ މަޝްރޫއު ފެއިލްވުމާ އެކުގައިވެސް ޒަމާނީ ފައިސާގެ ފޮނި ހުވަފެންތައް ހަގީގަތަކަށް ހެދުމަށް އަމާޒު ހިފާފައި ވާ މެޓާ ކުންފުނީގެ ޑިޖިޓަލް ފައިސާއަށް ދީފައި ވާ ނަމަކީ "ޒަކް ބަކް" ކަމަށް ހަބަރު ލިބެއެވެ. އެ ނަމަކީ މެޓާ ކުންފުނީގެ ބާނީ، މާކް ޒަކަބާގްގެ ނަމާއި ގުޅުވައިގެން ދީފައި ވާ ނަމެއް ކަމަށް މައުލޫމާތު ލިބެއެވެ.

މެޓާ ކުންފުނީގެ މާލީ ގޮފި ކަމަށް ވާ މެޓާ ފައިނޭންޝަލް ޓެކްނޮލޮޖީޒްއިން މިހާރު ދަނީ، މެޓާ ޕްލެޓްފޯމަށް ވާޗުއަލް ފައިސާ ތައާރަފު ކުރެވޭނެ ގޮތްތައް ބަލަމުން ކަމަށް ބައިނަލްއަގުވާމީ މީޑިއާއިން ވަނީ ރިޕޯތް ކޮށްފައެވެ. އެގޮތުން ވާޗުއަލް ޓޯކަންއާއި ވަކި ފައިސާ ފޮތީގެ އިތުރުން މާލީ އެހެނިހެން ހިދުމަތްތައް، މެޓާ ކުންފުނީގެ ދަށުން ދިނުމުގެ މަސައްކަތް އެ ކުންފުނިން ދަނީ ކުރަމުންނެވެ.

މެޓާ ކުންފުނީގެ މައިގަނޑު އުފެއްދުންތައް ކަމަށް ވާ ފޭސްބުކްއާއި އިންސްޓަގްރާމް ފަދަ ސޯޝަލް މީޑިއާ ޕްލެޓްފޯމްތަކަށް މީހުންގެ މެދުގައި އޮތް ޑިމާންޑް ދަށް ވަމުން ދާ މި ދަނޑިވަޅުގައި، އާމްދަނީ ލިބޭނެ އިތުރު މަގުތައް ހޯދުމުގެ ގޮތުން މެޓާ ކުންފުނިން ދަނީ އާ ޔޫޒާޒް ހޯދާ، މިހާރު ތިބި މީހުން އެ ޕްލެޓްފޯމް ދޫކޮށް ނުދާނެ އީޖާދީ ގޮތްތައް ބަލަމުންނެވެ.

"ޒަކް ބަކް" އަކީ ކްރިޕްޓޯކަރަންސީއަކަށް ވުރެ ބޮޑަށް، އެޕް ތެރޭގައި ބޭނުން ކުރާ ޓޯކަން ނިޒާމެއް ކަމަށް މައުލޫމާތު ލިބެއެވެ. އަދި މި ފައިސާގެ މަރުކަޒީ ކޮންޓްރޯލް އޮންނާނީ މެޓާ ކުންފުންޏަށް ކަމަށް ބެލެވެއެވެ. އެއީ ކުޑަކުދިންގެ މެދުގައި މަގުބޫލު ގޭމިންގް ޕްލެޓްފޯމެއް ކަމަށް ވާ "ރޯބްލޮކްސް"ގެ "ރޯބަކްސް" ކަރަންސީއާ ދާދި އެއްގޮތް ގޮތަކަށެވެ. ރޯބަކްސް ވިއްކައިގެން ރޯބްލޮކްސްއިން ވަނީ ވިޔަފާރީ އިންތިހާއަށް ފުޅާ ކޮށްފައެވެ.

މެޓާ ކުންފުނިން ދަނީ ފޭސްބުކް ގުރޫޕުތަކަށް މާނަ ހުރި އެހީތެރިކަން ފޯރުކޮށްދޭ ފަރާތްތަކަށް "ސޯޝަލް ޓޯކަން" ނުވަތަ "ރެޕިއުޓޭޝަން" ޓޯކަން ދިނުމަށްވެސް ރާވަމުންނެވެ. އަދި އިންސްޓަގްރާމް ޕްލެޓްފޯމްގައި ނުފޫޒު ފަދަ އިންފްލުއެންޝާސްއަށް ހާއްސަކޮށްގެން "ކްރިއޭޓާ ކޮއިންސް" ތައާރަފު ކުރުމަށްވެސް މެޓާ ކުންފުނިން އަމާޒު ހިފާފައި ވާ ކަމަށް ހަބަރު ލިބެއެވެ.

ވިޔަފާރި ލައިފްސްޓައިލް ލުއި ހަބަރު ސޯޝަލް މީޑިއާ ޓެކްނޮލޮޖީ