ރާއްޖޭގެ ބައެއް ސަރަހައްދުތަކަށް ރަމަޟާން މަހުގެ ހަނދު ފެނުމާއެކު މާދަމާ އަކީ މިއަހަރުގެ ރަމަޟާން މަހުގެ ފުރަތަމަ ދުަވސް ކަމުގައި ސަރުކާރުން ކަނޑައަޅައިފިއެވެ.
މާދަމާއަކީ މި އަހަރުގެ ރޯދަމަހުގެ ފުރަތަމަ ދުވަސް ކަން އިއުލާން ކުރެއްވީ، މިނިސްޓާ އޮފް އިސްލާމިކް އެފެއާޒް ޑރ. އަހްމަދު ޒާހިރު އަލީއެވެ.
ހަނދު ސާބިތުކުރުމަށްޓަކައި މިރޭ އިސްލާމިމް މިނިސްޓްރީގެ ޖަލްސާ މާލަމުގައި ބޭއްވި ޖަލްސާގައި މިނިސްޓަރު ވިދާޅުވީ، މާދަމާއަކީ މި އަހަރުގެ މުލަ ރޯދަ ދުވަސް ކަމަށް ހަމަޖެއްސީ ރާއްޖޭގެ ބައެއް ރަށްރަށަށާއި އިސްލާމީ ބައެއް ގައުމުތަކަށް ހަނދު ފެނުނުކަން ޝަރުއީ ހަމަތަކުން ސާބިތު ވީމައި ކަމަށެވެ.
ރާއްޖޭގެ އިތުރުން ސައުދީ އިންވެސް ވަނީ މާދަމާ އަކީ ރަމަޟާން މަހުގެ ފުރަތަމަ ދުވަސް ކަމުގައި ކަނޑައަޅާފައެވެ. ނަމަވެސް މެލޭޝިއާ އާއި ލަންކާ އަށް ހަނދު ނުފެންނާތީ އެގައުމުތަކަށް ރޯދަ ވަނީ މާދަމާ ނޫން އަނެއް ދުވަހެވެ.
ރޯދަ މަހަކީ ރާއްޖޭގައި އިހުއްސުރެ ހަނދު ބަލައިގެން ފާހަކަ ކުރަމުން އަންނަ މަހެކެވެ. ހަނދު ބެލުމުގައި އާންމުކޮށް އަމަލު ކުރަމުން އައި ގޮތަކީ، ޝައުބާން މަހުގެ ފަހު ދުވަހު އިރުއޮއްސޭއިރު ހަނދު ފެންމަތީގައި ހުންނާނެކަމަށް ފަލަކީ ހިސާބުތަކުން ދައްކާ، ރާއްޖެއަށް ނުވަތަ އެހެން އިސްލާމީ ގައުމަކަށް ހަނދު ފެނިއްޖެނަމަ ރޯދަ ހިފަން ފަށާ ގޮތަށެވެ.
ރާއްޖެގައި ރޯދަމަހަކީ، ކުދި ބޮޑު އެންމެން އެ މަހަކަށް އުއްމީދު ކުރާ އަޅުކަންތައް ގިނަ ކުރާ މަހެކެވެ. މިއަހަރުގެ ރޯދަމަސް އައި އިރު، މާލެގައި ހެދި އެންމެ ބޮޑު އެއް މިސްކިތް ކަމަށް ވާ ސަލްމާން މިސްކިތް މިއަދު ވަނީ ހުޅުވާ ނަމާދުކުރަން ފަށާފައެވެ.
