އިސްލާމްދީނާމެދު ނަފްރަތު އުފެއްދުމާ ދެކޮޅަށް މަސައްކަތްކުރާ ދުވަހެއްގެ ގޮތުގައި މާޗު 15 ކަނޑައަޅައިފިއެވެ.
ރާއްޖޭގެ ބައިވެރިވުމާއެކު އިސްލާމް ދީނާމެދު ނަފްރަތު އުފެއްދުމާ ދެކޮޅަށް މަސައްކަތް ކުރާ ބައިނަލްއަގްވާމީ ދުވަސް ނުވަތަ އިންޓަނޭޝަނަލް ޑޭ ޓު ކޮމްބެޓް އިސްލާމޮފޯބިއާގެ ގޮތުގައި ކޮންމެ އަހަރެއްގެ މާޗު މަހުގެ 15 ދުވަސް ފާހަގަކުރުމަށް އދގެ އާއްމު މަޖިލީހުން ފާސްކުރީ މިއަދެވެ.
އދގެ އާއްމު މަޖިލީހުގެ ރައީސް އަދި ފޮރިން މިނިސްޓަރު އަބްދުﷲ ޝާހިދު ވަނީ އިސްލާމީ ގައުމުތަކުގެ ޖަމްއިއްޔާ (އޯއައިސީ)ގެ ގައުމުތަކުގެ ފަރާތުން ހުށަހެޅި އެ ގަރާރު ފާސްކުރުމަށް ގަރާރުގައި ހިމެނޭ ކަންކަމުގައި ގައުމުތަކުން އެއްބަސްވުމަކަށް ގެނައުމަށް މުހިއްމު ދައުރެއް އަދާކުރައްވާފައެވެ.
މި ދުވަސް ބައިނަލްއަގްވާމީ ދުވަހެއްގެ ގޮތުގައި ކަނޑައެޅުމަށް އިސްލާމީ ގައުމުތަކުގެ ޖަމްއިއްޔާގެ ހާރިޖީ ވަޒީރުންގެ ކައުންސިލުން 2020 ވަނަ އަހަރު ނޮވެމްބަރު މަހު ނީޖާގެ ނިއާމޭގައި ނިންމި ބައްދަލުވުމުގައިވެސް ޝާހިދު ބައިވެރިވެވަޑައިގެންނެވިއެވެ.
އިސްލާމް ދީން ހިމެނޭހެން އެކި ދީންތަކަށް ނިސްބަތްވީތީ ކުރިމަތިވާ ތަފާތުކުރުންތަކާއި އަޅުކަންކުރާ ތަންތަނަށް އެކި ގޮތްގޮތުން ދެވޭ ހަމަލާތައް ކުށްވެރިކުރުންވެސް އެ ދުވަސް ފާހަގަކުރުމުގެ މަގްސަދުގެ ތެރޭގައި ހިމެނެއެވެ.
