ބައިނަލްއަގުވާމީ ޖައްވީ ސްޓޭޝަން (އައިއެސްއެސް) ގައި މަސައްކަތް ކުރަމުންދާ ޖައްވީ ފަޅުވެރިންގެ ތެރެއިން، އެމެރިކާއަށް ނިސްބަތްވާ އެސްޓްރޮނޯޓް މާކް ވޭންޑް ހޭއި، އެނބުރި ދުނިޔޭގެ ބިމަށް ދަތުރު ކުރާނީ ރަޝިއާގެ ރޮކެޓެއްގައި ކަމަށް، އެމެރިކާގެ ޖައްވީ އިދާރާ (ނާސާ) އިން ބުނެފިއެވެ.
މީގެ ކުރިންވެސް ރާވާފައި އޮތް ގޮތަށް، އެސްޓްރޮނޯޓް މާކް ވޭންޑް ހޭއި، މި މަހުގެ ފަހުކޮޅު، ދުނިޔޭގެ ބިމަށް ދަތުރު ކުރާނީ ރަޝިއާގެ ސޯޔޫޒް ޖައްވީ އުޅަނދުގައި ކަމަށް ނާސާއިން ބުނެއެވެ.
ރަޝިއާގެ އަސްކަރިއްޔާއިން ޔޫކްރައިންއަށް އަރާ، ކުރަމުންދާ ވަރުގަދަ ހަނގުރާމައިގެ ސަބަބުން ދުނިޔޭގެ ފެންވަރުގައި ހަމަނުޖެހުންތަކާއި ނުތަނަވަސްކަން އުފެދިފައި ވީ ނަމަވެސް، ރަޝިއާގެ ޖައްވީ އިދާރާ (ރޮސްކޮސްމޯސް)އާއެކު އާއެކު އައިއެސްއެސްގައި ނާސާއިން ވަރަށް ގާތުން މަސައްކަތް ކުރަމުން އަންނަ ކަމަށް ނާސާއިން ވަނީ ބުނެފައެވެ.
އޭޕްރިލް 2021 ގައި އައިއެސްއެސްއަށް ދަތުރު ފެށި ވޭންޑް ހޭއީ، ދުނިޔޭގެ ބިމަށް ދަތުރު ފަށަން ރާވާފައި އޮތީ މާޗް 30، 2022 ވަނަ ދުވަހު ކަމަށް މައުލޫމާތު ލިބެއެވެ. އެ ރޮކެޓް ތިރިކުރާނީ ކަޒަގިސްތާނަށް ކަމަށް ހަބަރު ލިބެއެވެ. އެއަށްފަހު އޭނާ އަނބުރާ އެމެރިކާއާށް ގެނައުމަށް، ކުރިން ރާވާފައި ވާ އެއްވެސް ރޭވުމަކަށް މާ ބޮޑު ބަދަލެއް ގެނައި ކަމެއް ނާސާގެ އޮފިޝަލުން ހާމަ ކުރައްވާފައެއް ނުވެއެވެ.
ފާއިތުވީ 10 ވަރަކަށް އަހަރު ދުވަހަށް ބަލާއިރު ރަޝިއާގެ ސޯޔޫޒް ޖައްވީ އުޅަނދުތަކަކީ، އައިއެސްއެސްއިން ދުނިޔެއަށް ދަތުރު ކުރުމަށް ބޭނުން ކުރަމުން ދިޔަ ހަމައެކަނި އުޅަނދުތަކެވެ.
