މިއަދަށް އަލިވިލުނުއިރު ގައުމު ދިފާއު ކުރަމުން ދަނީ ޔޫކްރޭން ގިނިކަންޏާ ކަމަށާ، ދުނިޔޭގެ އެންމެ ނުފޫޒުގަދަ ބާރުތައް އޮތީ ދުރުގައި މަންޒަރު ބަލަން ކަމަށް ޔޫކްރޭންގެ ރައީސް ވްލޮޑޮމީރް ޒެލެންސްކީ ވިދާޅުވެއްޖެއެވެ.
މިއަދު ހެނދުނު ގައުމާ މުހާތަބު ކުރައްވާ ވާހަކަފުޅު ދައްކަވަމުން ޒެލެންސްކީ ވަނީ، އިއްޔެ ރަޝިއާއަށް ކުރިމަތި ކުރި ދަތިކުރުމުގެ ފިޔަވަޅުތަކުން އެ ގައުމަށް ފުދުނުތޯ ސުވާލު އުފައްދަވާފައެވެ. ޔޫކްރޭންގެ ފަޒައާއި ބިންމަތިން ފެންނަ މަންޒަރުތަކަށް ބަލާއިރު، އެ ފިޔަވަޅުތަކުން ނުފެދޭ ކަން ހާމަ ވާ ކަމަށް ވިދާޅުވެ، ޒެލެންސްކީ ވަނީ ދުނިޔޭގެ ބާރުތަކަށް ފާޑުވިދާޅުވެފައެވެ.
މިއީ ރަޝިއާއިން ފުރިހަމަ އަސްކަރީ ބާރާއެކު ޔޫކްރޭނަށް އަރާ، އެ ގައުމު ސުންނާފަތި ކުރަމުން ދާ ދިއުން ހުއްޓުމަކަށް ގެނައުމަށް ހުޅަނގުގެ ބައިވެރިންގެ އެހީއަށް އެދި ޒެލެންސްކީ ދެއްކެވި ވާހަކަފުޅުތަކެއް ކަމަށް ސިފަކުރެވެއެވެ.
ދެވަނަ ދުވަހަކަށް ހަމަލާތައް ދިގުލާ ގޮސްފައި ވާއިރު، ޔޫކްރޭން ގަޑިން ފަތިހު 04:00ގައި ހަމަލާތައް ފަށާފައި ވާ ކަމަށް ޒެލެންސްކީ ވިދާޅުވިއެވެ. އާންމުންނަށް ހަމަލާ ނުދޭނެ ކަމަށް ރަޝިއާއިން ބުނެފައި އޮތް ނަމަވެސް، އެ ގައުމުގެ ހަމަލާތައް މިހާރު މަދަނީ ތަންތަނަށްވެސް އަމާޒު ކުރަމުން ދާކަމަށް ޒެލެންސްކީ ވިދާޅުވިއެވެ.
މިހާރު ކުރިއަށް ދާ ހަނގުރާމަ ހުއްޓެން އޮތީ މަޝްވަރާ ކޮށްގެން ކަމަށްވެސް ޒެލެންސްކީ ވަނީ ފާހަގަ ކުރައްވާފައެވެ. އެގޮތުން ހަމަލާތައް ހުއްޓެން އޮތް ގޮތަކާ ބެހޭ ގޮތުން ޔޫކްރޭނާއެކު ރަޝިއާއިން މަޝްވަރާ ކުރަންޖެހޭ ކަމަށް ޒެލެންސްކީ ވަނީ ވިދާޅުވެފައެވެ. ރަޝިއާއަށް ގެއްލުން ކުޑަވާން އޮތީ، ވީ އެންމެ އަވަހަކަށް މި މަޝްވަރާތަކަށް ހާޒިރުވެގެން ކަމަށްވެސް ޒެލެންސްކީ ވަނީ ފާހަގަ ކުރައްވާފައެވެ.
