ރަޝިއާ-ޔޫކްރައިން ހަނގުރާމަ: ވިލާތުގެ އެންމެ ބޮޑު ނިއުކްލިއާ ޕްލާންޓްގައި ރޯވި އަލިފާންގަނޑު ނިއްވާލައިފި

ކަނޑައަޅުއްވާ ހުރިހާ ޝަރުތެއް ފުރިހަމަ ވެއްޖެ ނަމަ، ޔޫކްރައިންގެ ސުލްހައިގެ މަޝްވަރާތަކައިގެން ކުރިއަށް ވަޑައިގަތުމަށް ތައްޔާރަށް ހުންނެވި ކަމަށް ރަޝިއާގެ ރައީސް ވްލޭޑްމިއާ ޕޫޓިން ވިދާޅުވެއްޖެއެވެ. 

ޕޫޓިން މިހެން ވިދާޅުވީ، ޖަރުމަނު ޗާންސެލަރާ ފޯނުން ގުޅުއްވާ މަޝްވަރާ ކުރައްވަމުން ކަމަށް ރަޝިއާ ސަރުކާރުން ހަބަރު ދެއެވެ. 

ރަޝިއާގެ އަސްކަރިއްޔާއިން ޔޫކްރައިންއަށް އަރާ، ކުރަމުން ދާ ހަނގުރާމަ އާ ގުޅިގެން އދގެ އާންމު މަޖިލީހުން ރަޝިއާ ތައުބީހު ކުރަން ނިންމަން އުޅޭ ކަމަށް އަލްޖަޒީރާއިން ރިޕޯޓް ކޮށްފިއެވެ. އަދި މިހާރުން މިހާރަށް ރަޝިއާގެ ފައުޖުތައް ޔޫކްރޭނުން ބޭލުމަށްވެސް ޑިމާންޑް ކުރާނެ ކަމަށް ބެލެވެއެވެ.

މިއީ ބައިނަލްއަގުވާމީ މައިދާނުގައި ރަޝިއާ އިތުރަށް އެކަހެރި ވެގެންދާނެ ފިޔަވަޅެކެވެ. 

ޔޫކްރައިންގެ ވެރިރަށް ކިއޭވްގެ ވަކި ތަންތަނަކަށް އަމާޒުކޮށް ހަމަލާ ދޭނެ ކަމުގެ އިންޒާރު ރަޝިއާއިން ދީފައި ވަނިކޮށް، ޔޫކްރައިންގެ މައި ޓީވީ ޓަވަރު ގޮއްވާލާ، 5 މީހުން މަރާލައިފިއެވެ.

ހަމަލާ އަމާޒުވި ޓަވަރު ހުންނަނީ އާންމުން ދިރިއުޅޭ އެޕާޓްމަންޓްތަކުން ފެށިގެން ހިނގާލާފައި ދެވޭހާ ކައިރީގައި ކަމަށް މައުލޫމާތު ލިބެއެވެ.

ޑެންމާކުގެ މާއެސްކްއާއި ސުވިޓްޒަލަންޑްގެ އެމްއެސީ އަދި ފަރަންސޭސިވިލާތުގެ ސީއެމްއޭ ސީޖީއެމްއިން ވަނީ ރަޝިއާއިން ހަދާ ބުކިންގްތައް ބަލައި ނުގަންނާނެ ކަން ހާމަކޮށްފައެވެ.

އަދި ރަޝިއާއަށް ދާން ހުރި ގިނަ ޑެލިވަރީތައްވެސް މަޑުޖައްސާލެ ކަން ވަނީ ހާމަކޮށްފައެވެ.

ބުކިންގް ހުއްޓާލި ނަމަވެސް، ކާބޯތަކެއްޗާއި، ސިއްހީ ސާމާނާއި އިންސަނީ އެހީގެ ސަޕްލައިއަށް ހުރަސް ނާޅާނެކަމަށް މައުލޫމާތު ލިބެއެވެ.

އެމެރިކާގެ ބޮއިންގް ކުންފުނިން ވަނީ ރަޝިއާގެ އެއާލައިންތަކަށް ސްޕެއާ ޕާޓް ފޯރުކޮށްދިނުމާ، މެއިންޓަނަންސް ހިދުމަތް ދިނުމާ، ފަންނީ އެއްބާރުލުން ދިނުން މެދުކަނޑާލަން ނިންމާ، އެކަން އިއުލާން ކޮށްފައެވެ.

ރަޝިއާގެ ވެރިރަށް މޮސްކޯގައި ހިންގާ އޮޕަރޭޝަންތައް މެދުކަނޑާލަންވެސް ބޮއިންގްއިން ވަނީ ނިންމާފައެވެ.

ނަވީން ޝޭކަރަގޮޑާގެ ފުރާނަ ގެއްލުނީ ޒަރޫރީ ބައެއް ތަކެތި ގަތުމަށް ވިޔަފާރިއަށް ނިކުމެ އުޅުނު ވަގުތެއްގައި، ހަމަލާ އަމާޒުވެގެން ކަމަށް މައުލޫމާތު ލިބެއެވެ.

މިއީ ޔޫކްރައިންގައި މިހާރު ހިންގަމުންދާ ހަމަނުޖެހުންތަކުގައި އިންޑިއާ ދަރިވަރެއްގެ ފުރާނަ ގެއްލިގެން ރިޕޯޓް ކުރި ފުރަތަމަ ފަހަރެވެ.

ރަޝިއާގެ ރައީސް ވްލޭޑްމިއާ ޕޫޓިންގެ އަމުރުފުޅަކަށް އެ ގައުމުގެ އަސްކަރިއްޔާއިން ޔޫކްރައިންއަށް އަރާ، ކުރަމުންދާ ހަނގުރާމައާ ދެކޮޅަށް "ޗޭންޖު ޑޮޓް އޯގް"ގައި، ރަޝިއާ ބަހުން ތައްޔާރު ކޮށްފައިވާ ޕެޓިޝަންގައި މިހާތަނަށް، މިލިއަނަކަށް ވުރެ ގިނަ މީހުން ސޮއި ކޮށްފައި ވާ ކަމަށް ސީއެންއެންއިން ރިޕޯޓް ކޮށްފިއެވެ. 

ރަޝިއާގެ ޕްރޮފެޝަނަލް އިދާރާތަކުގައި މަސައްކަތް ކުރާ ބަޔަކުވެސް މިފަދަ ޕެޓިޝަންތަކެއްގައި ސޮއި ކޮށްފައި ވާ ކަމަށް ސީއެންއެންއިން ހަބަރުދެއެވެ. 

ރަޝިއާއިން ކުރަމުންދާ ހަނގުރާމައާ ދެކޮޅަށް އެގައުމުގައި ވަރުގަދަ މުޒާހަރާތަކެއްވެސް ވަނީ ކުރިއަށް ގެންގޮސްފައެވެ. މުޒާހަރާއަށް ނިކުތް ގިނަ އަދަދެއްގެ ބަޔަކު ވަނީ ހައްޔަރުވެސް ކޮށްފައެވެ. 

ހުޅަނގުގެ ލީޑަރުން ބަސްވިދާޅުވާއިރު، އެ ވިދާޅުވެވޭ އެއްޗަކާ މެދު ސަމާލުވެވަޑައިގަތުމަށް، ރަޝިއާގެ ކުރީގެ ރައީސް އަދި ސަލާމަތާ ބެހޭ އިސް އޮފިޝަލު، ޑިމިޓްރީ މެޑްވެޑޭވް ގޮވާލައްވައިފިއެވެ.

މެޑްވެޑޭވް މިކަމަށް ގޮވާލައްވާފައި ވަނީ، ރަޝިއާއާ ދެކޮޅަށް އިގުތިސޯދީ ހަނގުރާމައެއް ކުރައްވާނެ ކަމަށް، ފަރަންސޭސި މާލީ ވަޒީރު އިންޒާރު ކުރައްވާފައި ވާ ދަނޑިވަޅެއްގައެވެ.

ރަޝިއާއިން ކުރަމުންދާ ހަނގުރާމައިގެ ސަބަބުން ޔޫކްރައިންގައި ގެދޮރު ގެއްލިފައި ވާ މީހުންގެ އަދަދު 1 މިލިއަނަށް އަރާފައިވުން އެކަށީގެންވާ ކަމަށް، ޔޫކްރައިންގައި ހުންނަވާ އދގެ މަންދޫބެއް ކަމަށްވާ ކެރޮލައިނާ ލިންޑްހޯމް ވިދާޅުވެއްޖެއެވެ. 

ކަން މިހެން އޮތް އިރު، ކަށަވަރު ތަފާސް ހިސާބުތަކެއް އަދިވެސް ނުލިބޭކަން، އދގެ އޮފިޝަލު ވަނީ ފާހަގަ ކުރައްވާފައެވެ. 

އައިސީސީގެ ޕްރޮސެކިއުޓަރު ކަރީމް އޭ އޭ ހާން ވިދާޅުވީ، މިހާރު ހިންގަމުންދާ ކުރިމަތިލުންތަކުގައި، ހަނގުރާމައިގެ ޖަރީމާ ހިންގާފައިވާކަން ގަބޫލު ކުރެވޭ މިންވަރަށް، އެކަށީގެންވާ އަސާސެއް އެބައޮތް ކަމަށެވެ.

ހާން އިތުރަށް ވިދާޅުވީ، ހަނގުރާމައިގެ ޖަރީމާގެ އިތުރުން އިންސާނީ ކަރާމާތާ ހިލާފު އަމަލުތައްވެސް ޔޫކްރައިންގައި ހިންގާފައި ވާ ކަމަށް ބާރުދެނިވި އަސާސް ހުރި ކަމަށް ގަބޫލު ކުރައްވާ ކަމަށެވެ.

ރަޝިއާގެ އަސްކަރިއްޔާއިން ޔޫކްރައިންއަށް އަރާ، ކުރަމުން ދާ ހަނގުރާމައަށް ސުލްހަވެރި ހައްލެއް ހޯދުމަށް، ޔޫކްރައިންއާއި ރަޝިއާގެ މަންދޫބުންނާ ދެމެދު، އަވަށްޓެރި ބެލަރޫސްގައި ކުރިއަށް ގެންދިޔަ މަޝްވަރާތައް، އެއްބަސްވުމަކާ ނުލާ ނިންމާލައިފިއެވެ.

ރަޝިއާ ވަފުދުގެ އިސް މަންދޫބެއްގެ ގޮތުގައި ހުންނެވި ވްލެޑްމީރް މެޑިންސްކީ ވިދާޅުވީ، ކުރިއަށް އޮތް ތަނުގައި އެއްގަލަކަށް އެރިދާނެ ބައެއް ނުކުތާތައް، ދެ ގައުމަށްވެސް ފާހަގަ ކުރެވިފައި ވާ ކަމަށެވެ.

ޔޫކްރައިންގެ ރައީސް ވްލޮޑޮމީރް ޒެލެންސްކީގެ އިސް މުޝީރު، މައިކާލޯ ޕޮޑޮލްޔަކް، މާ ބޮޑު ތަފްސީލުތަކެއް ހާމައެއް ނުކުރައްވައެވެ.

މަޝްވަރާ ފެށިކަން، ޔޫކްރައިން ރައީސްގެ ހާއްސަ މުޝީރު ވަނީ ބައިނަލްއަގުވާމީ މީޑިއާއަށް ކަށަވަރު ކޮށްދެއްވާފައެވެ.

މަޝްވަރާގެ މައިގަނޑު މަގުސަދަކީ މިހާރުން މިހާރަށް ހަމަލާ ބަދަލުކުރުން ހުއްޓާލުން ކަމަށް ޔޫކްރައިންއިން މީގެކުރިން ވަނީ ބުނެފައެވެ.

ރަޝިއާގެ ފައުޖުތައް މިހާރު ޔޫކްރައިން އިން ފައިބަން ވެސް އެގައުމުން ޑިމާންޑްކުރެއެވެ.

ޔޫކްރައިން ވައިގެ ސަރަހައްދުގެ ކޮންޓްރޯލް ލިބިފައި ވާ ކަމަށް ރަޝިއާގެ ދިފާއީ ވުޒާރާގެ ތަރުޖަމާނު މޭޖާ ޖެނެރަލް އައިގޯ ކޮނަޝެންކޯފް ވިދާޅުވެއްޖެއެވެ. 

ރަޝިއާއިން އާންމުކޮށްފައި ވާ އެ ހަބަރުގެ ފުރިހަމަ ސައްހަ ކަމެއް އަދި ކަށަވަރެއް ނުވެއެވެ. 

ޔޫކްރޭންއާއި ރަޝިއާއިން ދަނީ ސުލްހައިގެ މަޝްވަރާތަކަށް ތައްޔާރު ވަމުންނެވެ. މަޝްވަރާތަކުގެ ވަގުތުގައި، ވައިގެ މަގުން ހަމަލާ ދޭ ހުރިހާ ހަތިޔާރެއް ގްރައުންޑް ކުރާނެ ކަމަށް މައުލޫމާތު ލިބެއެވެ. 

އެމެރިކާ ޑޮލަރާ އަޅާ ބަލާއިރު ރަޝިއާ ފައިސާ (ރަބްލް)ގެ އަގު އިންތިހާއަށް ދަށަށް ގޮސްފައި ވާ މި ދަނޑިވަޅުގައި ކުރިމަތިލާންޖެހިފައިވާ މާލީ ނުތަނަވަސް ކަމާއެކު، ރަޝިއާގެ މަރުކަޒީ ބޭންކުން އިންޓްރެސްޓް ރޭޓް ބޮޑު ކޮށްފިއެވެ.

ބާޒާރުގައި ތަކެތީގެ ހުރި ގޮތް ކޮންޓްރޯލް ކުރުމުގެ ނަމުގައި ރަޝިއާގެ މަރުކަޒީ ބޭންކުން ވަނީ 9.5 ޕަސެންޓުން 20 ޕަސެންޓަށް، އިންޓްރެސްޓް ރޭޓް ބޮޑު ކޮށްފައެވެ.

ޔޫކްރައިންއާއެކު ސުލްހައިގެ މަޝްވަރާތައް ކުރިއަށް ދާނީ ރަޝިއާ ގަޑިން މެންދުރު 12 ޖަހާއިރު ކަމަށް، ރަޝިއާގެ ރައީސް ވްލޭޑްމިއާ ޕޫޓިންގެ އަރިސް މެންބަރަކާ ހަވާލާދީ ބައިނަލްއަގުވާމީ މީޑިއާއިން ރިޕޯޓް ކޮށްފިއެވެ. 

މަޝްވަރާތައް ލަސްވަމުން ދަނީ ޔޫކްރައިން ވަފުދަށް ދަތުރު ކުރުމުގައި ދިމާވެފައިވާ ގޮންޖެހުންތަކެއްގެ ސަބަބުން ކަމަށްވެސް ރަޝިއާއިން ވަނީ ބުނެފައެވެ. 

ބައްދަލުވުން ކުރިއަށްދާނީ ބެލަރޫސްއާ ޔޫކްރައިން ހިއްސާ ކުރާ ބޯޑަރު ސަރަހައްދުގައެވެ.

ޔޫކްރައިން - ރަޝިއާ އަކީ އަސްކަރީ ގޮތުން ބާރުގަދަ 2 ގައުމެވެ. ނަމަވެސް ރަޝިއާ އާ އަލާ ކިޔާ އިރު ޔޫކްރައިންގެ އަސްކރީ ގާބިލު ކަމާއި ބާރު އެތައް ގުނައެއް ދަށެވެ.

ޔޫކްރައިން - ރަޝިއާ ހަނގުރާމައިގައި ރަޝިއާއަށްވެސް ބޮޑެތި ގެއްލުންތަކެއް ދަނީ ލިބެމުންނެވެ. 

ފުރިހަމަ އަސްކަރީ ބާރާއެކު ޔޫކްރޭނަށް އަރާ ހަނގުރާމަ ކުރަމުން ދާ ރަޝިއާއާ ދެކޮޅަށް ޔޫކްރޭނުން ގަތުލުއާންމުގެ ދައުވާ އުފުލައިފިއެވެ.

އދގެ އެންމެ މަތީ ކޯޓު ނުވަތަ ބައިނަލްއަގުވާމީ އަދުލު އިންސާފުގެ ކޯޓު (އައިސީޖޭ) ގައި ޔޫކްރޭނުން ދަފުތަރު ކުރި ދައުވާގައި، ރަޝިއާއިން ގަތުލުއާންމު ހިންގަން ރާވާފައި ވާ ކަމަށް ތުހުމަތު ކޮށްފައި ވެއެވެ.

ރަޝިއާއިން ޔޫކްރައިންއަށް އަރާ ހިންގަމުންދާ ޖަރީމާތަކުގައި ޔޫކްރައިން އާންމުންގެ 352 މީހެއްގެ ފުރާނަ ގެއްލިފައި ވާ ކަމަށާ، އޭގެ ތެރޭގައި 14 ކުޑަކުއްޖަކު ހިމެނޭ ކަމަށް ޔޫކްރައިންގެ ސިއްހަތާ ބެހޭ ވުޒާރާއިން ހާމަކޮށްފިއެވެ.

މި އުދުވާންތަކުގައި ޔޫކްރައިނުން 1684 މީހަކު ޒަހަމް ވެފައި ވާއިރު، އޭގެ ތެރޭގައި 116 ކުޑަކުދިން ހިމެނޭ ކަމަށް މައުލޫމާތު ލިބެއެވެ.

ޔޫކްރައިނަށް އަރާ ހަނގުރާމަ އަމުރު ނެރުއްވި ރަޝިއާގެ ރައީސް ވްލޭޑްމިއާ ޕޫޓިން، ރަޝިއާ އަސްކަރިއްޔާގައި ނިއުކްލިއާ ހަތިޔާރުގެ ބާރުވެރިކަން ލިބިފައިވާ ޔުނިޓް ހިމެނެ ގޮފީގެ އެލާޓް ލެވަލް މަތި ކުރުމަށް އަމުރު ނެރުއްވައިފިއެވެ. 

ނިއުކްލިއާ ހަތިޔާރުގެ ބާރުވެރިކަން ލިބިފައިވާ ގޮފީގެ އެލާޓް ލެވަލް އެންމެ މަތި ކުރައްވަން ޕޫޓިން އަމުރު ކުރެއްވީ، ނޭޓޯގެ މެންބަރު ގައުމުތަކުގެ ލީޑަރުންގެ ބަސްމަގު ހުރި ގޮތުން ކަމަށް ވިދާޅުވެއެވެ. 

ޝަރުތަކާ ނުލާ، ރަޝިއާއާއެކު ސުލްހައިގެ މަޝްވަރާތަކަށް ދިއުމަށް ޔޫކްރައިނުން އެއްބަސްވެއްޖެއެވެ. 

ރަޝިއާގެ އޮފިޝަލުންނާއެކު ޔޫކްރައިނުން ސުލްހައިގެ މަޝްވަރާތައް ކުރިއަށް ގެންދަން އެއްބަސްވެފައި ވާ އިރު، ޔޫކްރައިނުން އެއްބަސްވީ، ޔޫކްރައިންއާއި ބެލަރޫސް ހިއްސާ ކުރާ ބޯޑަރުގައި މަޝްވަރާތައް ކުރިއަށް ގެންދިއުމަށެވެ. 

ރަޝިއާގެ ވަފުދެއް މިހާރުވެސް ދަނީ ބެލަރޫސްގައި ހަރަކާތްތެރިވަމުންނެވެ.

ޔޫކްރައިންގެ ދެކުނު 2 ސިޓީއެއް ކަމަށް ހާރްސޯންއާއި ބަރްދިޔަންސްކާ މިހާރު އޮތީ ރަޝިއާގެ ކޮންޓްރޯލްގެ ދަށުގައި ކަމަށް، ރަޝިއާގެ ދިފާއީ ވުޒާރާއިން މިއަދު އާންމު ކުރި ބަޔާނަކާ ހަވާލާދީ ސީއެންއެންއިން ރިޕޯޓް ކޮށްފިއެވެ. 

ސ

ރަޝިއާއެކު ސުލްހައިގެ މަޝްވަރާތައް ކުރިއަށް ގެންދަން ތައްޔާރު ކަމަށާ، ބެލަރޫސްއަކު ނޫން ކަމަށް ޔޫކްރައިންގެ ރައީސް ވްލޮޑޮމީރް ޒެލެންސްކީ ވިދާޅުވެއްޖެއެވެ. 

ޒެލެންސްކީ މިފަދައިން ވިދާޅުވެފައި މިވަނީ، ޔޫކްރައިންއާއެކު ބެލަރޫސްގައި ސުލްހައިގެ މަޝްވަރާތައް ކުރިއަށް ގެންދިއުމަށް ރަޝިއާ ތައްޔާރު ކަމަށް ބުނެފައި ވާ ދަނޑިވަޅެއްގައެވެ. 

ޔޫކްރޭނުން ވަނީ ރަޝިއާއެކު ސުލްހައިގެ މަޝްވަރާތައް ކުރިއަށް ގެންދިއުމަށް މީގެ ކުރިންވެސް ގޮވާލާފައެވެ. 

ޔޫކްރައިންއާއެކު ބެލަރޫސްގައި ސުލްހައިގެ މަޝްވަރާތައް ކުރިއަށް ގެންދަން ރަޝިއާ ތައްޔާރު ކަމަށް، ރަޝިއާގެ މީޑިއާއާ ހަވާލާދީ، އޭއެފްޕީއިން ރިޕޯޓް ކޮށްފި.

މިކަމާ ބެހޭ އިތުރު ތަފްސީލުތަކެއް އަދި ނުލިބޭ.

ހަނގުރާމަ ގަދަވެފައި ވާ ޔޫކްރައިންގެ ހަރްކީވް ސިޓީގައި އަޅާފައިވާ ގުދުރަތީ ގޭސް ޕައިޕްލައިނެއް، ރަޝިއާގެ އަސްކަރިއްޔާއިން ގޮއްވާލާފައި ވާ ކަމަށް، ޔޫކްރޭނުން ބުނެފިއެވެ. 

މިއީ ކިހާ މުހިންމު ހޮޅިއެއް ކަމެއް އަދި ސާފެއް ނުވެއެވެ. އަދި މި ހޮޅި ގޮއްވާލުމުގެ ސބަބުން، ބައިނަލްއަގުވާމީ ސަޕްލައިއަށް ބުރޫއަރާފާނެ ކަމެއް ނުވަތަ ނޫން ކަމެއްވެސް ކަށަވަރެއް ނުވެއެވެ. 

ހަނގުރާމަ ކުރިއަށް ދިޔަ ކަމުގައި ވީ ނަމަވެސް، ޔޫކްރޭނުން ދަނީ، ރަޝިއާގެ ގުދުރަތީ ގޭސް، ވިލާތަށް ސަޕްލައި ކޮށްދެމުންނެވެ.

ޔޫކްރައިންގެ ބޮޑުވަޒީރުގެ ނައިބު މައިކާލޯ ފެދްރޯފް ވަނީ، ރަޝިއާގެ ހަމަލާތަކުގެ ޝިކާރައަކަށް ވާ އޭނާގެ ގައުމަށް އިންޓަނެޓްގެ ހިދުމަތް ފޯރުކޮށްދިނުމަށް، ސްޕޭސްއެކްސްގެ ސީއީއޯ މަސްކްގެ ކިބައިން ނުސީދާ ގޮތެއްގައި އެދިވަޑައިގެންފައެވެ.

ފެދްރޯފްގެ ޓްވީޓަށް ރައްދު ދެމުން މަސްކު ވަނީ، ޔޫކްރައިންއަށް ސްޓާލިންކްގެ ހިދުމަތް މިހާރު އެކްޓިވް ވާނެ ކަމަށާ، އިތުރު ރޫޓުތައްވެސް ކުރިއަށް ހުރި ކަމަށް ބުނެފައެވެ.

ޔޫކްރައިންގެ ވެރިރަށް ކިއޭވްގެ ހުޅަނގުދެކުނު ގެ ސިޓީއެއް ކަމަށްވާ ވެސީލްކީވްއަށް އަމާޒުކޮށް ރަޝިއާއިން މިސައިލް ހަމަލާތަކެއްދީފިއެވެ. 

މި ހަމަލާތަކުގައި އެ އަވަށުގެ ތެޔޮ ޓާމިނަލެއްގައި ރޯވެފައި ވާ ކަމަށް އެ ސަރަހައްދުގެ މޭޔަރު ނަޓާލިއާ ބްލަސަނޮވިޗް ވަނީ ހާމަ ކުރައްވާފައެވެ. 

ބައިނަލްއަގުވާމީ ޕޭމަންޓް ނިޒާމް "ސްވިފްޓް" އިން ރަޝިއާގެ ބޭންކުތައް އެކަހެރި ކުރުމަށް ވިލާތުގެ އިއްތިހާދު، އެމެރިކާ އަދި އެ ގައުމުތަކުގެ ބައިވެރިން ނިންމައިފިއެވެ.

ރަޝިއާއަކީ އެ ގައުމުގެ ތެލާއި ގޭހުގެ އެކްސްޕޯޓް ވިޔަފާރީގެ ކަންކަން ކުރިއަށް ގެންދިއުމުގައި "ސްވިފްޓް" ނިޒާމަށް އިންތިހާއަށް ބަރޯސާވެފައި އޮތް ގައުމެކެވެ.

• ދިފާއީ ބަޖެޓްގެ ހަރަދުތަކަށް ބަލާއިރު 2021 ވަނަ އަހަރު ޔޫކްރައިންގެ ދިފާއީ ހަރަދުތައް އުޅެނީ 4.7 ބިލިއަން ޑޮލަރުގަ. ރަޝިއާގެ ދިފާއީ ހަރަދަށް 2021 ވަނަ އަހަރު، 45.8 ބިލިއަން ޑޮލަރު ހޭދަ ކުރި.
• ރަޝިއާގެ އަސްކަރިއްޔާގައި އެކްޓިވް މެންބަރުންގެ ގޮތުގައި 9 ލައްކަ ސިފައިން އެބަތިބި. ޔޫކްރައިން އަސްކަރިއްޔާގެ އެކްޓިވް ސިފައިންގެ ގޮތުގައި 196000 މެންބަރުން ހަރަކާތްތެރިވޭ. 

ރަޝިއާގެ އަސްކަރިއްޔާއިން ފެށި ހަނގުރާމާ، 4 ވަނަ ދުވަހަކަށް ދިގުލާ ގޮސްފައި ވާއިރު، ޔޫކްރައިންގެ އާންމު ރައްޔިތުންގެ ތެރެއިން 64 މީހެއްގެ ފުރާނަ ގެއްލިފައި ވާ ކަން ކަށަވަރު ކުރެވިފައި ވާ ކަމަށް އދއިން ހާމަ ކޮށްފިއެވެ. 

އާންމު ރައްޔިތުންގެ އުމްރާނީ ބިނާވެއްޓަށް ދީފައި ވާ ގެއްލުންތަކުގެ ސަބަބުން އެތައް ސަތޭކަ ހާސް ބަޔަކު، ކަރަންޓާއި ފެނުގެ ހިދުމަތުން މަހްރޫމު ވެފައި ވާ ކަމަށްވެސް ޔޫއެން އޮފީސް ފޮ ދަ ކޯޑިނޭޝަން އޮފް ހިއުމެނިޓޭރިއަން އެފެއާޒް (އޯޗާ) އިން ބުނެއެވެ.

ރަޝިއާއިން ޔޫކްރައިންގެ 6 ސަރަހައްދެއް ހިފައިފިއެވެ. އެގެ ތެރޭގައި ޗެރްނޮބީލް ނިއުކްލިއާ ޕްލާންޓާއި ހާކީވް އާއި ސުމީގެ ސަރަހައްދަކާއި ލުހާންސް އަދި މަރިއުޕޮލް ގެ ސަރަހައްދެއްގެ އިތުރުން ކްރިމިއާގެ ތެރެއިން ގޮސް އޮޑިއްސާވެސް ވަނީ ހިފާފައެވެ.

ޔޫކްރައިން އަށް އެހީގެ ގޮތުގައި އެމެރިކާއިން 350 މިލިއަން ޑޮލަރު ދޭން ނިންމައިފިއެވެ. މިއީ ޔޫކްރައިންގެ ދިފާއު ވަރުގަދަކޮށް ދެމެހެއްޓުމަށް މިވަގުތުން ވަގުތަށް ބޭނުންވާ އެހީއެއް ކަމަށް އެމެރިކާއިން ބުނެއެވެ.

ޗެމްޕިއަންސް ލީގުގެ ފައިނަލް މެޗު، ރަޝިއާގެ ސެއިންޓް ޕީޓާޒް ބާގުގައި ނުބާއްވާނެ ކަމަށާ، އެ އިވެންޓް ކުރިއަށް ގެންދާނީ ފަރަންސޭސިވިލާތުގެ ވެރިރަށް ޕެރިހުގައި ކަމަށް ނިންމާ، ޔުއެފާއިން އެކަން ރަސްމީ ކޮށް އިއުލާން ކޮށްފިއެވެ.

ކުރިން ރަޝިއާގައި ކުރިއަށް ގެންދިއުމަށް ތާވަލު ކުރި ޗެމްޕިއަންސް ލީގުގެ ފައިނަލް، ފަރަންސޭސިވިލާތަށް ބަދަލު ކުރީ، ރަޝިއާއިން ޔޫކްރޭނަށް އަރާ، ހަނގުރާމަ ފެށުމާ ގުޅިގެންނެވެ.

ޔޫކްރައިންގެ އިރުމަތީ ސަރަހައްދުތަކުގައި ރަޝިއާއާ ދެކޮޅަށް ހަނގުރާމަ ކުރަމުން ދިޔަ ޔޫކްރައިން އަސްކަރިއްޔާގެ 150 އެއްހާ ސިފައިން، ހަތިޔާރުތައް ދޫކޮށް، އަމިއްލައަށް ރަޝިއާއާ ހަވާލުވެފައި ވާ ކަމަށް ރަޝިއާއިން ބުނެފިއެވެ.

ނަމަވެސް، މިކަމާ ބެހޭ ފުރިހަމަ މައުލޫމާތު އަދި ކަށަވަރު ނުކުރެވޭ ކަމަށް، ބައިނަލްއަގުވާމީ ހަބަރު ފެތުރުމުގައި ގިނަ ބައެއްގެ އިތުބާރު ހޯދާފައި ވާ ސީއެންއެންއިން ވަނީ ބުނެއެވެ.

ޔޫކްރޭނަށް އަރައިގެންފައިވާ ރަޝިއާގެ ކޮންޓްރޯލް ގެ ދަށަށް، ޔޫކްރޭންގެ ވެރިރަށް ކިއޭވް، ކުޑަ ދުވަސްކޮޅެއްގެ ތެރޭގައި ގެންދިއުން އެކަށީގެންވާ ކަމަށް ބާރު ދޭ ޖާސޫސީ ހެކި ލިބިފައި ވާ ކަމަށް އެމެރިކާއިން ބުނެފިއެވެ.

ރަޝިއާއިން ޔޫކްރޭނަށް އަސްކަރީ ބާރާއެކު ސީދާ އެރުމުގެ ކުރިން ހަދާފައިވާ އަންދާޒާތަކަށް ރިއާޔަތްކޮށް، ޖާސޫސީ މައުލޫމާތު ލިބިފައިވާ މަސްދަރުތަކަކާ ހަވާލާދީ އެމެރިކާގެ މީޑިއާއިން ރިޕޯޓް ކޮށްފައި ވާ ގޮތުގައި، ރަޝިއާއިން ޔޫކްރޭނަށް ހަމަލާ ދޭން ފަށާތާ 1 ދުވަހާ 4 ދުވަހާ ދެމެދު މުއްދަތެއްގެ ތެރޭގައި، ރަޝިއާގެ ކޮންޓްރޯލްގެ ދަށަށް، ކިއޭވް ގެންދާނެއެވެ.

ރަޝިއާއިން ޔޫކްރޭނަށް އަރާ ހަނގުރާމަ ފެށުމާ ގުޅިގެން، ކުރިއަށް އޮތް 2022 ގްރޭންޑް ޕްރީ ރޭސް، ރަޝިއާގައި ކުރިއަށް ނުގެންދާނެ ކަމަށް، ފޯމިއުލާ ވަންއިން އިއުލާން ކޮށްފިއެވެ.

2014 ވަނަ އަހަރު ރަޝަން ގްރޭންޑް ޕްރީ ކަލަންޑަރު ކުރީ، ސެޕްޓެމްބަރު 25، 2022 ގައި، ރަޝިއާގެ ސޯޗީ އޮލިމްޕިކް ޕާކުގައި ކުރިއަށް ގެންދިއުމަށެވެ. ނަމަވެސް އަދުގެ ހާލަތަށް ބަލާ، ރަޝިއާގައި ރޭސް ކުރިއަށް ގެންދިއުމަކީ ކުރެވޭނެ ކަމެއް ނޫން ކަމަށް ފޯމިއުލާ ވަން އިންތިޒާމް ކުރާ ފަރާތްތަކުން ވަނީ ހާމަ ކޮށްފައެވެ.

ހަމަލާ ބަދަލު ކުރުންތައް މިހާރުން މިހާރަށް ހުއްޓުމަކަށް ގެނެސް، ޑިޕްލޮމަސީ އިސްކޮށް، މަޝްވަރާ ހިޔާރު ކުރުމަށް އދގެ އާންމު މަޖިލީހުގެ ރައީސް އަދި ދިވެހިރާއްޖޭގެ ފޮރިން މިނިސްޓަރު ޢަބްދުﷲ ޝާހިދު ގޮވާލައްވައިފިއެވެ.

ޔޫކްރޭންގެ ރައްޔިތުންނަށް މިވަގުތު އިންތިހާ ބޭނުން ޖެހިފައިވާ އިންސާނީ އެހީ، އެއްވެސް ހުރަހެއް ނެތި، ރައްކާތެރިކަމާއެކު ފޯރުކޮށްދެވޭނެ ކަން ކަށަވަރު ކުރުމަށްވެސް އދގެ އާންމު މަޖިލީހުގެ ރައީސް ވަނީ ގޮވާލައްވާފައެވެ.

ޔޫކްރޭންގެ ވެރިރަށް ކިއޭވްގައި އާންމުން ދިރިއުޅޭ ހިސާބުތަކުގައިވެސް ރަޝިއާ އަސްކަރިއްޔާގެ ބަރު އުޅަނދު ފަހަރު ދުއްވަމުން އަންނަ ކަމަށް ހަބަރު ލިބިއްޖެއެވެ.

ޔޫކްރޭންގެ ދިފާއީ ވުޒާރާއިންވެސް ވަނީ ރަޝިއާގެ އަސްކަރިއްޔާގެ އުޅަނދުތައް، ކިއޭވްގައި އާންމުން ދިރިއުޅޭ ހިސާބުތަކަށް ވަދެގެންފައިވާކަން ކަށަވަރުކޮށްދީފައެވެ. މިމަންޒަރުތައް، ސޯޝަލް މީޑިއާގައިވެސް ދަނީ ދައުރުވަމުންނެވެ.

ޔޫކްރޭންގެ ފަސްގަނޑު، އަދުއްވުންގެ ކިބައިން މިނިވަން ކުރުމަށް، އާންމުންގެ ވީހާވެސް ގިނަ ބަޔަކު އަސްކަރިއްޔާއާ ގުޅުމަށް، ޔޫކްރޭންގެ ދިފާއީ ބާރުން ގޮވާލައިފިއެވެ. 

މިއަދު ޔޫކްރޭނަށް ލިބެން އޮތްހާ އެއްޗެއްގެ ބޭނުން ޖެހިފައި ވާ ކަމަށާ، އަސްކަރިއްޔާއާ ގުޅުމުގެ އިޖުރާއަތުތަކަށް ލުއި ދީފައި ވާ ކަމަށް އެ ގައުމުގެ އަސްކަރިއްޔާއިން ކުރި ޓްވީޓްގައި ބުނެފައިވެއެވެ.

ގައުމު ދިފާއު ކުރަމުން ދަނީ ޔޫކްރޭން ގިނިކަންޏާ ކަމަށާ، ދުނިޔޭގެ އެންމެ ނުފޫޒުގަދަ ބާރުތައް އޮތީ ދުރުގައި މަންޒަރު ބަލަން ކަމަށް ޔޫކްރޭންގެ ރައީސް ވްލޮޑޮމީރް ޒެލެންސްކީ ވިދާޅުވެއްޖެއެވެ.

ގައުމާ މުހާތަބު ކުރައްވާ ވާހަކަފުޅު ދައްކަވަމުން ޒެލެންސްކީ ވަނީ، އިއްޔެ ރަޝިއާއަށް ކުރިމަތި ކުރި ދަތިކުރުމުގެ ފިޔަވަޅުތަކުން އެ ގައުމަށް ފުދުނުތޯ ސުވާލު އުފައްދަވާފައެވެ.

ވިލާތުގެ އިރުމަތީ ބިތުގައި ނިއުޅެމުންދާ ހަނގުރާމައިގެ ނުތަނަވަސް މަސްރަހާ ބެހޭ ގޮތުން ވާހަކަދައްކަވަމުން އެމެރިކާގެ ރައީސް ޖޯ ބައިޑަން ވަނީ އެމެރިކާއިން ސީދާ އަސްކަރީ ހަރަކާތަށް ނުދާނެ ކަމަށާ، ނަމަވެސް އެމެރިކާއާއި ނޭޓޯގެ ބައިވެރިންގެ ސަލާމަތްތެރިކަން ކަށަވަރު ކުރައްވާނެ ކަމަށް ވިދާޅުވެފައެވެ.

ޔޫކްރޭންގައި ހުންނަ ޗެރްނޮބީލް ނިއުކްލިއާ ރިއެކްޓަރުގެ ކޮންޓްރޯލް، ރަޝިއާގެ އަސްކަރީ ބާރުތަކުން ނަގާފައި ވާ ކަމަށް ޔޫކްރޭނުގެ އޮފިޝަލުން ވިދާޅުވެއްޖެއެވެ.

ޔޫކްރޭންގެ ރައީސް ވްލޭޑްމިއާ ޒެލެންސްކީއަށް ލަފާ އަރުވާ މުޝީރު، މައިކާލޯ ޕޮޑޮލިއާކް ވިދާޅުވީ، ރަޝިއާގެ މި ހަމަލާއަކީ އެއްވެސް ބޭނުމެއް ނެތް ހަމަލާއެއް ކަމަށާ، ޔޫކްރޭނަށް ބުރާސްފަތި ދުވަހު ކުރިމަތިލާންޖެހުނު ހަމަލާއަކީ، ވިލާތަށް ކުރިމަތިވި އެންމެ ސީރިއަސް، އެއް ނުރައްކާ ކަމަށެވެ.

1986 ވަނަ އަހަރު ޗެރްނޮބީލް ރިއެކްޓަރު ގޮވި ހާދިސާއަކީ އިންސާނީ ތާރީހު ދުށް އެންމެ ނުރައްކާތެރި ނިއުކްލިއާ ކާރިސާއަށް ވާ އިރު، ޔޫކްރޭންގެ ރައީސް ވަނީ، ރަޝިއާގެ ހަމަލާތައް ކުރިއަށް ދާ ކަމުގައި ވަނީ ނަމަ، އެފަދަ ކަމެއް ތަކުރާރު ވެދާނެ ކަމުގެ އިންޒާރު ދެއްވާފައެވެ.

ވަރުގަދަ އަސްކަރީ ބާރާއެކު ރަޝިއާއިން އިއްޔެގެ ވަގުތެއްގައި ޔޫކްރޭނަށް އަރާ، ބަދަލު ކުރަމުން ދާ ހަމަލާތަކުގައި ޔޫކްރޭނުން މަރުވި މީހުންގެ އަދަދު 137 އަށް އަރާފައި ވާ ކަމަށް ޔޫކްރޭންގެ ރައީސް ވްލޭޑްމިއާ ޒެލެންސްކީ ވިދާޅުވެއްޖެއެވެ.

ހަމަލާ ބަދަލު ކުރުންތަކުގެ ފުރަތަމަ ދުވަސް ނިމި، 2 ވަނަ ދުވަހަކަށް ފެށިފައި ވާ އިރު، ޔޫކްރޭނުން މަރުވި 137 މީހުންގެ ތެރޭގައި އަސްކަރިއްޔާގެ އިތުރުން އާންމު ރައްޔިތުންވެސް ހިމެނޭ ކަން ޒެލެންސްކީ ވަނީ ފާހަގަ ކުރައްވާފައެވެ.

ޒެލެންސްކީ ވަނީ މި ކުރިމަތިލުންތަކުގައި މަރުވެ ދިޔަ މީހުންނަކީ "ބަތޮލުން" ކަމުގައި ސިފަ ކުރައްވާފައެވެ. އަދި ސުލްހަވެރިކޮށް އޮތް ސިޓީތަކެއް، ހަނގުރާމައިގެ އަމާޒުފަތްގަނޑަކަށް ރަޝިއާއިން ހަދާފައި ވާ ކަމަށްވެސް ޒެލެންސްކީ ވަނީ ވިދާޅުވެފައެވެ.

ޔޫކްރޭންގައި ރަޝިއާއިން ހިންގަމުންދާ ވަރުގަދަ އަސްކަރީ އޮޕަރޭޝަންގައި ޒަހަމްވީ މީހުންގެ އަދަދު 300 އަށް ވުރެ މައްޗަށް އަރައެވެ.

ހަނގުރާމައާ ދެކޮޅަށް މޮސްކޯގައި މުޒާހަރާ ކުރަމުން އެބަދެއެވެ. ހަބަރުތައް ބުނާ ގޮތުން ފުލުހުން 700 އެތައް މީހަކު މިހާރު ވަނީ ހައްޔަރު ކޮށްފައެވެ.

ރަޝިއާގެ ވިޔަފާރިިތަކަށާއި 100 މީހަކަށް ދަތިރުކުރުމުގެ ފިޔަވަޅު އަޅަން އިނގިރޭސިން މަޝްވަރާ ފަށައިފިއެވެ. އިނގިރޭސި ބޮޑުވަޒީރު ބޮރިސް ޖޯންސަން ހުށަހެޅުއްވި ގަރާރަށް ހައުސް އޮފް ކޮނަންސްގައި މަޝްވަރާ ކުރަމުންނެވެ.

ރަޝިއާ-ޔޫކްރައިންގެ ހަމަނުޖެހުންތަކަ ހެދި ދުނިޔޭގެ ތެލުގެ ބާޒާރަށް ޮޑެތި ބަދަލުތައް އަންނަމުން އެބަދެއެވެ. ދާދި ދެންމެ ލިބުނު ހަބަރުތަކަށް ބަލާއިރު މިހާރު ތެޔޮ ފީފައެއްގެ އަގު ވަނީ 103 ޑޮލަރަށް އުފުލިފައެވެ.

ޔޫކްރައިންގައި ހުންނަ ޗެރްނޮބީލް ނިއުކްލިއާ މަރުކަޒާ ހަމައަށް ހަމަލާ ފޯރައިފި ކަމަށް އޮފިޝަލުން ބުނެއެވެ. މިއާއެކު ރަޝިއާގެ ހަނގުރާމަ މަތީ ބޯޓުތަކުން ދޭ ހަމަލާތައް ނާކާމިޔާބު ކޮށްލާ ބޯޓުތައް ވައްޓާލުމަށް ޔޫކްރައިންގެ ދިފާއުން ދަނީ ރައްދު ހަމަލާތައްވެސް ދެމުންނެވެ.

ރަޝިއާއިން ޔޫކްރޭނަށް އަރާ އަސްކަރީ ބާރާއެކު ކުރިމަތިލަމުން ދާ ދިއުމާ ގުޅިގެން ލިތުއޭނިއާގައި ކުއްލި ނުރައްކާ އިއުލާން ކޮށްފިއެވެ.

ރަޝިއާއާއި ބެލަރޫސް ބޯޑަރު ސަރަހައްދުގައި ރަޝިއާގެ އަސްކަރީ ފައުޖުތައް ވަރުގަދަ ކޮށްފައި ވާއިރު، ކުރިމަތިލާން ޖެހިދާނެ ފުރައްސާރަ ކުރުންތަކަކާ ނުރައްކާތަކަކަށް ބަލާ، ބޯޑަރު ސަރަހައްދަށް އަސްކަރީ ފައުޖު ފޮނުވާ، ގައުމު ދިފާއު ކުރުމުގެ ރޭވުންތައް ރާވާފައި ވާ ކަމަށް ލިތުއޭނިއާގެ ރައީސް ގިޓާނާސް ނޮޒީޑާ ވަނީ ހާމަ ކުރައްވާފައެވެ.