އެއާޕޯޓް އެމަޖެންސީ ސާވިސަސް އިން ވެލާނާ އިންޓަނޭޝަނަލް އެއާޕޯޓްގައި ލައިވް ފަޔާ ހަރަކާތެއް ބާއްވަން ނިންމާފައިވާ ކަމަށް އެމްއޭސީއެލުން ބުނެފިއެވެ.
އެމްއޭސީއެލުން ބުނީ، ލައިވް ފަޔާ ހަރަކާތް ބާއްވަން ނިންމާފައި ވަނީ 3 ދުވަހު ކަމަށެވެ. އެއީ މިމަހުގެ 21 އާއި 22 އަދި އަންނަ މަހުގެ 3 ވަނަ ދުވަހުގެ 4 އިން 6 އާ ދެމެދު ކަމަށެވެ.
މި ހަރަކާތް ކުރިއަށް ގެންދިއުމަށް ހަމަޖެހިފައި ވަނީ އެއާޕޯޓްގެ އުތުރު ފަރާތު އޭރޯޑްރޯމް އިމާރާތް ކުރިމަތީގައިވާ ރަންވޭ ކައިރީގައެވެ. އަދި މި ހަރަކާތް ކުރިއަށް ގެންދާނީ އެއާ ޓްރެފިކް ކޮންޓްރޯލް ޓަވަރުގެ ހުއްދަ އާއެކު ރަންވޭގެ ހުސް ވަގުތުތަކަށް ބަލައިގެން ކަމަށް އެމްއޭސީއެލުން ބުނެއެވެ.
މިއީ ރައްކާތެރިކަން ކަށަވަރުކޮށްގެން ކުރިއަށްގެންދާ ހަރަކާތެއް ކަމަށް އެމްއޭސީއެލުން ބުނެއެވެ. ނަމަވެސް މި ހަރަކާތް ކުރިއަށްގެންދާ ވަގުތު އެ ސަރަހައްދުން ބޯ ދުމާއި އަލިފާން ފެންނާނެ ކަމަށް އެމްއޭސީއެލުން ބުނެއެވެ.
