ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ދުވާލެއްގެ މައްޗަށް ބޭނުން ކުރި ފްލައިޓުގެ އަދަދު އިތުރުވެ މިދިޔަ މަހު ހަދާފައިވާ ރެކޯޑް މުގުރާލައިފިއެވެ.
ވީއައިއޭ ހިންގާ، މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ބުނީ، އިއްޔެ އަކީ އެ އެއާޕޯޓުގެ އެއާ ޓްރެފިކް މޫވްމަންޓުގެ އާ ރެކޯޑެއް ހެދި ދުވަސް ކަމަށެވެ. އެގޮތުން މައި އެއާޕޯޓްގެ ރަންވޭގައި ޖުމްލަ 210 މޫވްމަންޓް ރެކޯޑު ކުރެވިފައިވާ ކަމަށާއި އަދި ސީޕްލޭން މޫވްމަންޓްގެ ގޮތުގައި 629 މޫވްމަންޓް ރެކޯޑް ކުރެވިފައިވާ ކަމަށެވެ. މިއާ އެކު ޖުމްލަ މޫވްމަންޓްގެ އަދަދު ވަނީ 839 އަށް އަރާފައި ކަމަށް އެމްއޭސީއެލުން ބުނެއެވެ.
މިއަދު 839 މޫވްމަންޓާ އެކު ރެކޯޑް މުގުރާލާފައި ވާއިރު މިދިޔަ މަހުގެ 2 ވަނަ ދުވަހު 826 މޫވްމަންޓާ އެކު ރެކޯޑު ހަދާފައި ވެއެވެ. އެދުވަހު 233 ފްލައިޓް ރަންވޭ ބޭނުންކޮށްފައި ވާއިރު، 593 ސީޕްލޭން މޫވްމެންޓް ރެކޯޑް ކުރެވުނެވެ.
އޭގެ ކުރިން އެއާޕޯޓުގެ އެންމެ ގިނަ އަދަދަކަށް މޫވްމަންޓް ރެކޯޑު ކޮށްފައި ވަނީ ޖެނުއަރީ 5، 2020 ގައި 811 މޫވްމަންޓެވެ. އެދުވަހު 252 ފްލައިޓް ރަންވޭ ބޭނުންކޮށްފައި ވާއިރު، 559 ސީޕްލޭން މޫވްމެންޓް ރެކޯޑް ކުރެވުނެވެ.
މިއަހަރު ފެށިގެން އައި އިރު ޓޫރިޒަމަށް 50 އަހަރު ފުރުން ފާހަގަ ކުރުމަށް ގިނަ އަދަދެއްގެ ޓޫރިސްޓުން ގެނައުމަށް ރާއްޖެ އިސްތިހާރު ކުރުމަށް އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ގިނަ އަދަދެއްގެ ޓޫރިސްޓުން އައުމާ އެކު ގިނަ އެއާލައިންތައް ވެސް ރާއްޖޭގެ މައި އެއާޕޯޓުގައި ޖެއްސުމަށް ފުރުސަތުތައް ވަނީ ހުޅުވާލާފައެވެ.
އެހެންކަމުން މައި އެއާޕޯޓުގެ އެއާ ޓްރެފިކް މިދުވަސްވަރު ބާރު ބޮޑުވެފައި ވާތީ، އިތުރު ފްލައިޓްތައް އެކޮމަޑޭޓް ކުރުމަށްޓަކައި އެއާޕޯޓުގެ އޮޕަރޭޝަންތައް ފަށާ ގަޑިތަކަށް ވެސް ވަނީ ބަދަލު ގެނެސްފައެވެ. އެ ގޮތުން މި އަހަރުގެ ނިޔަލަށް ކޮންމެ ދުވަހަކު ފަތިހު ފަހެއް ޖަހާއިރު އެއާޕޯޓުގެ އޮޕަރޭޝަންތައް ފެށުމަށް ވަނީ ހަމަޖައްސާފައެވެ.
