ދިވެހި ޕްރިމިއާ ލީގު 2022ގެ މެއިން ސްޕޮންސަރަކަށް އުރީދޫ މޯލްޑިވްސް ހަމަޖައްސައިފިއެވެ.
3 އަހަރުގެ މެދު ކެނޑުމަކަށް ފަހު މި މުބާރާތުގެ މެއިން ސްޕޮންސަރަކަށް އުރީދޫ ހަމަޖެއްސިއިރު މީގެ ކުރިން އެންމެފަހުން ދިވެހި ޕްރިމިއާ ލީގުގެ މެއިން ސްޕޮންސަރެއްގެ ގޮތުގައި އުރީދޫ ހަރަކާތްތެރި ވީ މިދިޔަ 2017 ވަނަ އަހަރެވެ.
ދިވެހި ލީގުގެ ނަން ދިވެހި ޕްރިމިއާ ލީގަށް ރީބްރޭންޑް ކުރުމަށް ފަހު މި މުބާރާތުގެ ފުރަތަމަ މެއިން ސްޕޮންސަރަކީވެސް އުރީދޫއެވެ. އެގޮތުން 2015 އިން 2017 އަށް އުރީދުއިން ވަނީ މި މުބާރާތުގެ މެއިން ސްޕޮންސަރެއްގެ ދައުރު އަދާކޮށްފައެވެ. އޭގެ ފަހުން މި ލީގުގެ މެޗުތަކުގެ މެއިން ސްޕޮންސަރަކީ ދިރާގެވެ.
ދިވެހި ޕްރިމިއާ ލީގު 2022ގެ މައި ސްޕޮންސަރަށް އުރީދޫ ހަމަޖެއްސުމަށް ބޭއްވި ރަސްމިއްޔާތުގައި އުރީދޫ މޯލްޑިވްސްގެ ސީއީއޯ ހާލިދު ހަސަން އަލް ހަމަދީ އަށް ވަނީ ބައިވެރިވެ ވަޑައިގެންފައެވެ.
ދިވެހި ރާއްޖޭގެ ފުޓުބޯޅަ ކުރިއެރުވުމަށް އުރީދޫ މޯލްޑިވްސް އަންނަނީ ގިނަ ހިދުމަތްތަކެއް ކުރަމުންނެވެ. އެގޮތުން މިދިޔަ އަހަރު ބޭއްވި ސާފް ޗެމްޕިއަންޝިޕްގެ މެއިން ސްޕޮންސަރަކީ ވެސް އެ ކުންފުންޏެވެ. އަދި އުރީދޫ އިން މިހާރުވެސް ވަނީ އެމްބަސަޑަރެއްގެ މަގާމު މާޒިޔާއަށް ދީފައެވެ.
2022 ވަނަ އަހަރުގެ ދިވެހި ޕްރިމިއާ ލީގު މިއަދު ހަވީރު ފަށައިފާވާއިރު އެ މެޗުގައި ވާދަކުރީ ކުލަބު ގްރީން ސްޓްރީޓްސްއާއި ދަ ގްރާންޑޭއެވެ. އަދި އެ މެޗު ނިމިފާވަނީ 1-1 ގެ ނަތީޖާއަކުން އެއްވަރުވެގެންނެވެ.
