ރާއްޖޭގައި އިތުރު ހަ ރަށެއްގައި އެއާޕޯޓު އެޅުމުގެ މަސައްކަތް ކޮށްދޭނެ ބަޔަކު ހޯދަން ޕްލޭނިން މިނިސްޓްރީން އަނެއްކާ ވެސް އިއުލާނު ކޮށްފިއެވެ.
މިދިޔަ އަހަރު ޑިސެމްބަރު މަހު ފިނޭންސް މިނިސްޓްރީން ވަނީ ބ. ތުޅާދޫ، ށ. ބިލެއްފަހި، ތ. ވިލުފުށި، ހދ. މަކުނުދޫގައި ފ. މަގޫދޫ އާއި ރ. އަތޮޅު ދެކުނުބިތުގައިވެސް އެއާޕޯޓް އެޅުމަށް ނިންމައި، އެތަންތަން އަޅައިދޭނެ ބަޔަކު ހޯދަން އިއުލާނުކޮށްފައެވެ.
މި ހަ އެއާޕޯޓަށް ބިޑް ކުރެވޭނެ އެންމެ ކުޑަ އަގެއް ކަމަށް އޭރު ބުނެފައި އޮތީ ފަސް މިލިއަން ޑޮލަރެވެ. ނަމަވެސް މިހާރު ކޮށްފައިވާ އިއުލާންގައި އެ އަދަދު ވަނީ ތިން މިލިއަން ޑޮލަރަށް ކުޑަކޮށްފައެވެ.
6 މަޝްރޫއަށް ހޭދަކުރެވޭނެ ކަމަށް މިހާރު އަންދާޒާ އަދަދު:
- ބ. ތުޅާދޫ - 21,900,000 ޑޮލަރު
- ށ. ބިލަތްފަހި - 23,600,000 ޑޮލަރު
- ތ. ވިލިފުށި - 33,300,000 ޑޮލަރު
- ހދ. މަކުނުދޫ - 23,300,000 ޑޮލަރު
- ފ. މަގޫދު - 8,200,000 ޑޮލަރު
- ރ. އަތޮޅުގެ ދެކުނު ބިތުން ރަށެއް - 23،600،000 ޑޮލަރު
އިއުލާނުގައިވާ ގޮތުން އެއާޕޯޓް ތަރައްގީކުރުމަށް ނުވަތަ ފައިނޭންސް ކުރުމަށް ހުށަހަޅާ އިންވެސްޓްމަންޓްގެ އަދަދު އެ މަޝްރޫއެއްގެ މުގާބިލުގައި ފަތުރުވެރިކަމަށް ކުއްޔަށް ދޫކުރާނެ ރަށް ނުވަތަ ބިން ނުވަތަ ފަޅުގެ އެކްއިޒިޝަން ކޮސްޓާއި އެ ތަނެއްގެ ބިމު ކުލީގެ ގޮތުގައި ކަނޑައެޅޭ ފައިސާގެ އަދަދާ އަޅައި ކަނޑައިދެވޭނެއެވެ.
މި މޮޑެލްގެ ތެރެއިން ދައުވަތަކާ ނުލައި ބިޑްކުރުމުގެ އުސޫލުގެ ދަށުން، ޝައުގުވެރިކަން ފާޅުކޮށް ހުށަހަޅަން ޖެހެނީ އިކޮނޮމިކް ޑިވެލޮޕްމަންޓް މިނިސްޓްރީއަށެވެ. އީމެއިލުން ނަމަ ފޮނުވާނީ [email protected] އަށެވެ.
ޕްލޭނިން މިނިސްޓްރީ ބިޑް ކުރެވޭ އަގަށް ބަދަލު ގެނައީ ކޮން ސަބަބަކާ ހުރެ ކަމެއް ހާމަކޮށްފައެއް ނުވެއެވެ.
