ރަޝިއާ އާއި ޔޫކްރައިންގެ މައްސަލާގައި ދެ ގައުމުގެ ދެމެދު ހަނގުރާމައެއް ފަށައިފި ނަމަ، އެކަމުގެ ސަބަބުން ރާއްޖެއަށްވެސް އަސަރު ކުރާނެ ކަމަށް ވިދާޅުވެ، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކަންބޮޑުވުން ފާޅު ކުރައްވައިފިއެވެ.
ރަޝިއާ އާއި ޔޫކްރައިންގެ މަސްރަހު ގޯސްވެފައި ވާއިރު، ރަޝިއާއިން މާދަމާވެސް ޔޫކްރައިން އަށް އަރާ ހިފާފާނެ ކަމުގެ އިންޒާރު، ހުޅަނގުގެ ބައިވެރިންނަށް އެމެރިކާގެ ރައީސް ޖޯ ބައިޑަން ވަނީ ދެއްވާފައެވެ. އެހެންވެ، ޔޫކްރައިންގައި ދިރިއުޅެމުންދާ އެހެން ގައުމުތަކުގެ މީހުން ފޭބުމަށް އެ ގައުމުތަކުން ވަނީ ގޮވާލާފައެވެ. އޭގެ ތެރޭގައި އެމެރިކާ އާއި ޔޫރަޕުގެ އިތުރުން، އޭޝިއާގެ ބައެއް ގައުމުތައްވެސް ހިމެނެއެވެ.
އެއާއެކު، ރާއްޖޭގެ ފޮރިން މިނިސްޓްރީންވެސް ވަނީ، ދިވެހިން މި ވަގުތު ޔޫކްރައިނަށް ދަތުރު ނުކުރުމަށާއި، އެ ގައުމުގައި މި ވަގުތު ތިބި ދިވެހިން ޔޫކްރައިންގެ ސަރުކާރުގެ ނިންމުންތަކަށް ސަމާލުވެ، ރައްކާތެރިކަމުގެ ފިޔަވަޅު އެޅުމަށާއި، އެ ގައުމާ އެންމެ ކައިރީގައިވާ ޖަރުމަންވިލާތުގައި ހުންނަ ދިވެހި އެމްބަސީގައި ރަޖިސްޓްރީވުމަށް އިލްތިމާސް ކޮށްފައެވެ.
މި މައްސަލާގައި ކަންބޮޑުވުން ފާޅު ކުރައްވާ ކުރެއްވި ޓްވީޓެއްގައި ނަޝީދު ވިދާޅުވީ، ރާއްޖެއަށް އެންމެ ގިނަ އަދަދަކަށް އަންނަ މީހުންގެ ތެރޭގައި ރަޝިއާ އާއި ޔޫކްރައިންގެ ފަތުރުވެރިން ހިމެނޭ ކަމަށާއި، އެ ދެ ގައުމުގެ ދޭތެރޭގައި ހަނގުރާމައެއް ފަށައިފި ނަމަ، އެކަމުގެ ސަބަބުން ނޭދެވޭ އަސަރުތައް ކުރުން ގާތް ކަމަށެވެ. އެހެންކަމުން، ސަރުކާރުން އެފަދަ ކަންކަމަށް ސަމާލުވުމަށް ނަޝީދު ވަނީ ގޮވާލައްވާފައެވެ
ރަޝިއާއިން ޔޫކްރައިން ހިފަން އުޅޭ ކަމުގެ ހުއްޖަތަކަށް ހުޅަނގުން ހަދަނީ، ރަޝިއާއާއި ޔޫކްރައިން ހިއްސާ ކުރާ ބޯޑަރު ސަރަހައްދުގައި ރަޝިއާއިން އަސްކަރީ ހަރަކާތްތައް ވަރުގަދަ ކުރަމުން ދިއުމެވެ.
