ޔޫކްރައިންގެ މަޝްރަހު ގޯސްވެފައިވާ މި ދަނޑިވަޅުގައި، ދިވެހިން އެ ގައުމަށް ދަތުރު ނުކުރަން ފޮރިން މިނިސްޓްރީން އިލްތިމާސްކޮށްފިއެވެ.
މިނިސްޓްރީން ބުނީ، ޔޫކްރޭނުގެ މަޝްރަޙު ހޫނުވެ، ހަނގުރާމައެއް ފެށިދާނެކަމުގެ ބިރުވެރިކަން އުފެދިފައިވާ މި ދަނޑިވަޅުގައި، ޔޫކްރައިންގައި މިވަގުތު ތިބި ދިވެހިންގެ ހާލަތު މިނިސްޓްރީން ވަރަށް ގާތުން ބަލަމުންދާ ކަމަށެވެ.
މި ދަނޑިވަޅުގައި، ދިވެހި ރައްޔިތުން އެ ގައުމަށް ދަތުރު ނުކުރުމަށާއި ޔޫކްރައިންގައި މި ވަގުތު ދިރިއުޅެމުންދާ ދިވެހިން އެގައުމުގެ ސަރުކާރުގެ ނިންމުންތަކާއި އެންގުންތަކަށް ވަރަށް ބޮޑަށް ސަމާލުވެ ރައްކާތެރިކަމުގެ ފިޔަވަޅުތައް އެޅުމަށް މިނިސްޓްރީން ވަނީ އިލްތިމާސްކޮށްފައެވެ.
މީގެ އިތުރުން ޔޫކްރައިންގައި މިވަގުތު ތިބި ދިވެހި ރައްޔިތުން، ފޮރިން މިނިސްޓްރީ އާއި، އެ ގައުމާ އެންމެ ކައިރީގައި ހުރި ރާއްޖޭގެ ޑިޕްލޮމެޓިކް މިޝަންކަމަށްވާ ޖަރުމަނުވިލާތުގައި ހުންނަ ދިވެހިރާއްޖޭގެ އެމްބަސީގައި ރެޖިސްޓާ ކުރުމަށް ވެސް މިނިސްޓްރީން އިލްތިމާސް ކުރެއެވެ.
ފެބުރުއަރީ 16 ވަނަ ދުވަހު ރަޝިއާއިން ޔޫކްރައިން ހިފަން އުޅޭ ކަމުގެ އިންޒާރު، ހުޅަނުގެ ބައިވެރިންނަށް ބައިޑަން ދެއްވާފައި ވާ ކަމަށް ހަބަރު ލިބެއެވެ.
ރަޝިއާއިން ޔޫކްރައިން ހިފަން އުޅޭ ކަމުގެ ހުއްޖަތެއް ކަމުގައި ހަދަނީ، ރަޝިއާއާއި ޔޫކްރައިން ހިއްސާ ކުރާ ބޯޑަރު ސަރަހައްދުގައި ރަޝިއާއިން އަސްކަރީ ހަރަކާތްތައް ވަރުގަދަ ކުރަމުން ދިއުމެވެ.
ވައިޓްހައުސް އިން ވަނީ ހަމަ ކޮންމެ ފަދަ ވަގުތެއްގައި ރަޝިއާއިން ޔޫކްރައިންއަށް ހަމަލާ ދޭން ފަށާފާނެ ކަމުގެ އިންޒާރު ދީފައެވެ. ރަޝިއާއިން ހަމަލާ ދޭން ފަށާނީ، ވައިގެ މަގުން ބޮން އަޅައިގެން ކަމަށްވެސް ވައިޓްހައުސް އިން ވަނީ އިންޒާރު ކޮށްފައެވެ.
