ރާއްޖެއިން އެންމެ ވެލިފުކެއްވެސް ބޭރުގެ ގައުމަކަށް ލިބޭނެ ފަދަ އެއްވެސް އެއްބަސްވުމެއް އެއްވެސް ސަރުކާރަކުން ހަދާފައިނުވާނެ ކަމަށާއި އަދި އެ ފަދަ އެއްބަސްވުމެއް ހެދިޔަ ނުވެސް ދޭނެ ކަމަށް ފޮރިން މިނިސްޓްރީން ބުނެފިއެވެ.
އިދިކޮޅުން ކުރިއަށްގެންދާ "އިންޑިއާ އައުޓް" ހަރަކާތުން ލިބޭނެ ގެއްލުން ދިރާސާކުރުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެދިވަޑައިގަތުމާ ގުޅިގެން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން ފަށާފައިވާ ދިރާސާއަށް މައުލޫމާތު ހޯދުމަށް މިއަދު ފޮރިން މިނިސްޓްރީގެ އިސް ބޭފުޅުން ވަނީ މަޖިލީހުގެ ކޮމެޓީއަށް ހާޒިރުވެ ކޮށްފައެވެ.
ފޮރިން މިނިސްޓްރީގެ ޑެޕިއުޓީ މިނިސްޓަރު އަބްދުﷲ ހުމައިދު ވިދާޅުވީ ރާއްޖެ އާއި އިންޑިއާ އާ ދެމެދު އޮންނަ ހާއްސަ ގުޅުން ބިނާވެގެން ވަނީ ދެގައުމުގެ ރައްޔިތުންނަށް ކަމަށާއި ދިވެހިންނަށް ބޭނުންވާ ކަންކަން ފޯރުކޮށްދިނުމުގައި އިންޑިއާއިން އަބަދުވެސް އެހީތެރިވާ ކަމަށެވެ. އަދި މިއަދުގެ ބައްދަލުވުމުގައި އެ މިނިސްޓްރީގެ ސްޓޭޓު މިނިސްޓަރު އަހުމަދު ހަލީލް ވިދާޅުވީ އެއްވެސް އިރެއްގައި މިސަރުކާރުން ވެސް އަދި ކުރީގެ ސަރުކާރުތަކުން ވެސް ރާއްޖޭގެ މިނިވަންކަމަށް ގެއްލުމެއް ވެދާނެ ފަދަ އެއްބަސްވުމެއްގައި ސޮއިކޮށްފައިނުވާ ކަމަށެވެ.
ފޮރިން މިނިސްޓްރީގެ ޓީމުން ވަނީ ވަކި ގައުމެއްގެ ރައްޔިތުންނާއި ދެކޮޅަށް މިގޮތަށް ކުރިޔަށް ގެންދެވޭ ހަރަކާތެއްގެ ސަބަބުން މަޝްރަހު ހޫނުވެއްޖެ ކަމުގައި ވާނަމަ އެކަމުގެ ދައްޗާއި އުނދަގޫ އިންޑިއާގައި ދިރިއުޅެމުން އަންނަ ދިވެހި ރައްޔިތުންނަށް ފޯރާނެ ކަމަށާއި އެގައުމުގައި ދިރިއުޅޭ ރައްޔިތުންގެ ސަލާމަތަށް މިކަމުގެ ސަބަބުން ބޮޑެތި ގޮންޖެހުންތަކަކާ ކުރިމަތިވެދާނެ ކަން ފާހަގަ ކުރައްވާފައެވެ.
"އިންޑިއާ އައުޓް" ކެމްޕެއިން ހުއްޓުވަން ގާނޫނެއް ހެދުމަށް ރައްޔިތުންގެ މަޖިލީހަށް ހުށަހަޅަން އެމްޑީޕީގެ ޕާލިމެންޓްރީ ގުރޫޕުން މިއަދު ވަނީ ފާސްކޮށްފައެވެ. އަދި ޕާލިމެންޓްރީ ގުރޫޕްގެ މިއަދުގެ ބައްދަލުވުމުގައި ފާސްކުރީ ވަރަށް އަވަހަށް އެ ބިލް މަޖިލީހަށް ހުށަހަޅައި ގާނޫނަކަށް ހެދުމަށެވެ.
އެ ޑްރާފްޓް މިހާރު އޮތް ގޮތުން ދޭދޭ ގައުމުތަކާ މެދު ނަފްރަތު އުފެދޭ ގޮތަށް އަމަލުކޮށް ވާހަކަ ދައްކާނަމަ ހަ މަސް ދުވަހަށް ޖަލަށް ލުމާއި އެއް އަހަރަށް ވުރެން ދިގު ނޫން މުއްދަތަކަށް ގޭގައި ބަންދު ކުރެވެއެވެ. އަދި 20،000 ރުފިޔާއާ ހަމައަށް ޖޫރިމަނާ ކުރެވެއެވެ.
