ފުލުހުންގެ އެސިސްޓަންޓް ކޮމިޝަނަރުން ކަމަށްވާ މުހައްމަދު ޖަމްޝީދާއި އަހުމަދު މުހައްމަދު (ޓޫފޯ) ވަޒީފާއިން ވަކިކުރުމަށް ނިންމި ނިންމުމަށް އަމަލުކުރުން ފަސްކޮށްދިނުމަށް އެދި އެ ދެ ބޭފުޅުންގެ ފަރާތުން ސުޕްރީމް ކޯޓުގައި މައްސަލަ އިސްތިއުނާފު ކޮށްފިއެވެ.
ފުލުހުންގެ ގާނޫނުގެ ދަށުން އުފެއްދި ބޯޑުން ޓޫފޯ އާއި ޖަމްޝީދުގެ އިތުރުން ސުޕްރިންޓެންޑެންޓު މުހައްމަދު ދާއޫދާއި، ސުޕްރިންޓެންޑެންޓު އިސްމާއީލް ޝަމީމްގެ އިތުރުން، ޗީފް ސުޕްރިންޓެންޑެންޓު އަބްދުﷲ ޝަރީފް ވަކިކުރަން ނިންމި ނިންމުން ސިވިލް ކޯޓަށް ހުށަހަޅުއްވައި އެ މައްސަލަ ނިމެންދެން ފުލުހުންގެ ބޯޑުން ނިންމި ނިންމުމަށް އަމަލުކުރުން ލަސްކޮށްދިނުމުގެ އަމުރަކަށް އެދިވަޑައިގެންފައިވެއެވެ.
ނަމަވެސް އެފަދަ އަމުރެއް ނެރެދެވެން ނެތް ކަމަށް ސިވިލް ކޯޓުން ނިންމުމުން އެ މައްސަލަ ހައިކޯޓުގައި އިސްތިއުނާފު ކުރުމުން، މިދިޔަ އޮކްޓޯބަރު މަހު ހައި ކޯޓުން ވަނީ ދާއޫދާއި، ޝަމީމްގެ އިތުރުން ޝަރީފް ވަކިކުރަން ފުލުހުންގެ ބޯޑުން ނިންމާފައިވާ ނިންމުން ތަންފީޒު ކުރުމުގެ ގޮތުން އެއްވެސް ފިޔަވަޅެއް ނޭޅުމަށް ހުކުމް ކޮށްފައެވެ. އެކަމަކު ހަމަ އެ މައްސަލާގައި ހިމެނޭ ޖަމްޝީދާއި ޓޫފޯ ފުލުހުންގެ ވަޒީފާއިން ވަޒީފާއިން ވަކިކޮށްފައިވާތީ އެކަމަށް ދެވޭނެ އިތުރު ފަރުވާއެއް ނެތް ކަމަށް ވެސް ވަނީ ކަނޑައަޅާފަ އެވެ.
އެހެންވެ، ހައި ކޯޓުން ނިންމި ނިންމުން ޖަމްޝީދާއި ޓޫފޯ އިސްތިއުނާފު ކުރުމުން، ސުޕްރީމް ކޯޓުގައި މިއަދު އޮތް އަޑުއެހުމުގައި އެ ދެ ބޭފުޅުންގެ ވަކީލު މަރިޔަމް ނިހާޔަތު ވިދާޅުވީ، އެ ދެ ބޭފުޅުން ވަކިކުރަން ނިންމުމާއެކު، އެ މައްސަލަ ސިވިލް ކޯޓަށް ހުށަހެޅި ކަމަށާއި، އެ ދެ ބޭފުޅުން ވަކިކޮށްފައިވަނީ ކޯޓުގައި އަމުރަކަށް އެދިފައި އޮއްވާ ކޯޓުން އެއްވެސް ގޮތެއް ނުނިންމަނީސް ކަމަށެވެ.
ނިހާޔަތު ވިދާޅުވީ، ސިވިލް ކޯޓަށް މައްސަލަ ހުށަހެޅުމަށް ފަހުވެސް އަޑުއެހުން ބާއްވައިދިނުމަށް އެދިފައިވާނެ ކަމަށާއި، ނަމަވެސް ޑިސްޕިއުޓް މަރުހަލާ ފަށާފައިވަނީ އެ ދެ ބޭފުޅުން ވަކިކުރިތާ އެއް ދުވަސް ފަހުން ކަމަށްވާއިރު، އެ މަރުހަލާއަށް ފަހު ޝަރީއަތް ފެށުނީވެސް ވަކިކުރިތާ ތިން ދުވަސް ފަހުން ކަމަށެވެ. އެހެންވެ އޭނާ އެދިވަޑައިގަތީ ސިވިލް ކޯޓުގެ މައްސަލަ ނިމެންދެން ފުލުހުންގެ ބޯޑުގެ ނިންމުމަށް އަމަލުކުރުން ފަސްކޮށްދިނުމަށެވެ.
ދައުލަތުން ބުނީ ސިވިލް ކޯޓުން ޝަރީއަތް ފެށިއިރުވެސް ޖަމްޝީދާއި ޓޫފޯ ވަޒީފާއިން ވަކިކޮށްފައިވާ ކަމަށާއި، އެ ދުވަހު ވަގުތީ އަމުރާ މެދު ކޯޓުން ގޮތެއް ނިންމާފައިވާ ކަމަށެވެ. މި މަރުހަލާގައި އެ ދެ ބޭފުޅުން ވަކިކުރި ނިންމުމަށް އަމަލުކުރަން ފަސްކުރުމުގެ އަމުރެއް ނެރެދީފި ނަމަ، އޭރުން އެއީ ސިވިލް ކޯޓުގައި ހިނގަމުންދާ މައްސަލައާ މެދު ދުރާލާ ގޮތެއް ކަނޑައެޅުން ކަމަށާއި، އެހެންވެ އެފަދަ އަމުރެއް ނެރެދޭން ނުޖެހޭނެ ކަމަށެވެ.
އެއަށްފަހު، ނިމިފައި އޮތް ކަމަކާ ގުޅޭގޮތުން އަމުރެއް ނެރެވިދާނެތޯ ފަނޑިޔާރުން ސުވާލު ކުރެއްވުމުން، ނިހާޔަތު ވިދާޅުވީ، އެ މައްސަލާގައި ކަން ހިނގާފައި އޮތީ އާންމު އުސޫލުން ކަން ހިނގާފައިވާ ގޮތަކަށް ނޫން ކަމަށާއި، އެގޮތަށް އޭނާ ވިދާޅުވީ، އެއީ ވަޒީފާއިން ވަކިކުރަން ނިންމި ނިންމުމަށް އަމަލުކުރަން ސިވިލް ކޯޓުން ފުރުސަތު ދިނުމަށްފަހު، ވަކިކުރި ފަހުން އަމުރާ މެދު ގޮތެއް ނިންމުމުން ކަމަށެވެ.
މިއަދު އޮތް އަޑުއެހުން ނިންމާލަމުން ފަނޑިޔާރުން ވިދާޅުވީ އެ މައްސަލާގައި ހުކުމް ދެން ވަރަށް އަވަހަށް އިއްވާނެ ކަމަށެވެ.
