ތަޣައްޔަރުވެފައިވާ އުފެއްދުމެއް ކަމަށްވާ، "ސްޓާސް ބްރޭންޑުގެ ސްޕްރިން އަނިއަން" ބޭނުން ނުކުރަން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އަންގައިފިއެވެ.
އެމްއެފްޑީއޭ އިން އާންމުކުރި ބަޔާނެއްގައި ބުނީ 'ޕެސްޓިސައިޑް' އިން ތަޣައްޔަރުވެފައިވާ އުފެއްދުމެއް ކަމަށްވާ "ސްޓާސް ބްރޭންޑުގެ ސްޕްރިން އަނިއަން" ރާއްޖެއަށް އެތެރެވެފައިވާ ކަމުގެ މައުލޫމާތު ޔޫރަޕުގެ ރެޕިޑް އެލާޓް ސިސްޓަމް ފޯ ފުޑް އެންޑް ފީޑް އިން ވަނީ އެއޮތޯރިޓީއަށް އަންގާފައިވާ ކަމަށެވެ.
މިއީ މިސްރުގެ އުފެއްދުމެއް ކަމަށާއި މި އުފެއްދުން ހޯލްސޭލްކޮށްފައި ވަނީ ނެދަލެންޑްސްގެ ކުންފުންޏެއް ކަމަށްވާ "ގްލޯބަލް ގްރީން ޓީމް" އިން ކަމަށް އެމްއެފްޑީއޭއިން ބުނެއެވެ.
މިއެލާޓާއި ގުޅިގެން މިއުފެއްދުމުގެ ސަބަބުން ކާބޯތަކެތީގެ ރައްކާތެރިކަމަށް އޮތް ހިރާސްގެ މިންވަރުދެނެގަތުމުގެ މަސައްކަތް އެމްއެފްޑީއޭއިން ކުރަމުންދާ ކަމަށް އެއޮތޯރިޓީން ބުނެއެވެ.
އެހެންކަމުން ރައްކާތެރިކަމުގެ ފިޔަވަޅެއްގެ ގޮތުން މިސްރުގެ ސްޓާސް ބްރޭންޑުގެ ސްޕްރިން އަނިއަން، ވަކިގޮތެއް އަންގަންދެން ވިއްކުމަށާއި ބޭނުން ނުކުރުމަށް އެމްއެފްޑީއޭއިން ވަނީ އަންގާފައެވެ.
