މާލޭގެ ރަސްފަންނު ސަރަހައްދުގައި ކޮވިޑް ފެތުރޭލެއް ބާރުކަމުން، ނައިޓް މާކެޓް ބާއްވަން ހުއްދަ ދިނުން މަޑުޖައްސާލުމަށް ފަހު މާދަމާ ރޭ އަލުން އާ ނައިޓްމާކެޓެއް ފަށަން ނިންމައިފިއެވެ.
މާދަމާ ރޭ ނައިޓްމާކެޓް ފަށަނީ ގައިދުރުކަމާއެކު ކަމަށް މާލޭ ސިޓީ ކައުންސިލުން ބުނެއެވެ.
މާދަމާ ރެއިން ފެށިގެން 17 އަށް ނައިޓް މާކެޓް ބާއްވަން ކައުންސިލުން ހުއްދަދީފައި ވާއިރު އިއްޔެ އެޗްޕީއޭއިން ވަނީ ކޮވިޑް ފެތުރޭތީ ނައިޓް މާކެޓް ވަގުތީ ގޮތުން ހުއްޓާލަން އަންގާފައެވެ. އަދި އެ އެންގުމާ އެއްގޮތަށް ނައިޓް މާކެޓްގެ މޭޒުތައް ނެގިކަމަށާއި ނައިޓް މާކެޓް ކަންތަކާ އުޅޭ ފަރާތްތަކަށް އެކަން އެންގިކަމަށް ކައުންސިލުން ބުނެއެވެ.
ނަމަވެސް މިއަދު އެޗްޕީއޭއިން ވަނީ ކޮވިޑްގެ ހާލަތާ ގުޅިގެން ފިހާރަތަކާއި ވިޔަފާރިތައް ހިންގުމަށް ހުއްދަ ދީފައިވާ އުސޫލާ އެއްގޮތަށް ނައިޓް މާކެޓް ކުރިއަށް ގެންދެވިދާނެ ކަމަށް ސިޓީއަކުން ބުނެފައި ކަމަށް ކައުންސިލުން ބުނެއެވެ. އެހެންކަމުން ގައިދުރުކަން ދަމަހައްޓައި މީހުން ތޮއްނުޖެހޭނެ ގޮތަކަށް ނައިޓް މާކެޓް ބޭއްވުމާމެދު އިއުތިރާޒެއް ނެތް ކަމަށް އެ ކައުންސިލުން ބުނެއެވެ.
މާދަމާ ރޭ އާ ނައިޓް މާކެޓް ފަށާ އިރު، މިދިޔަ މަހުގެ 26 އިން މި މަހުގެ 4 އަށް ބެއްވި ނައިޓް މާކެޓާ އެއްވަރަށް ސްޓޯލް ހުންނާނެކަމަށް ނައިޓް މާކެޓް އިންރިޒާމް ކުރާ ފަރާތުން ވަނީ ބުނެފައެވެ. އެންމެ ފަހުން ނިމުނު ނައިޓް މާކެޓަަށް ގިނަ އަދަދެއްގެ ބަޔަކު ގޮސް ތޮއްޖެހުނު އިރު މި މަސް ފެށުނު ފަހުން މާލެ ސަރަހައްދުގައި ކޮވިޑް ފެތުރޭ މިންވަރު އަންނަނީ އިތުރު ވަމުންނެވެ. މި ވަގުތު ކޭސްތައް އިތުރުވަމުން އައި މިންވަރަށް ބަލާއިރު، މި މަހުގެ ތެރޭގައި 1300 އަށް ވުރެ ގިނަ މީހުން ވަނީ ކޮވިޑަށް ޕޮޒިޓިވް ވެފައެވެ.
އެގޮތުން މިއަދު 300 އިން މައްޗަށް ކޮވިޑް ކޭސްތައް ރިޕޯޓް ކޮށްފައި ވާއިރު، މާލެ ސަރަހައްދުން ވަނީ 136 ކޭސް ރިޕޯޓް ކޮށްފައެވެ.
ކޮވިޑް ކޭސްތައް އިތުރުވަމުން އަންނާތީ މިހާރު މާސްކް އެޅުން މަޖުބޫރުކޮށް މާސްކް ނާޅާ އާންމުން ނުކުމެ އުޅޭ ތަންތަނަށް ނުކުންނަ ފަރާތްތަކާ މެދު ފިޔަވަޅު އަޅާނެ ކަމަށް ސަރުކާރުން ވަނީ ބުނެފައެވެ.
