ރާއްޖެއިން އިޒްރޭލާ ގުޅުން ގާއިމުކުރަން މަސައްކަތް ނުކުރާ ކަމަށް ފޮރިން މިނިސްޓްރީން ބުނެފިއެވެ.
މިނިސްޓްރީން އެހެން ބުނެފައި ވަނީ ރާއްޖެ އާއި އިޒްރޭލާ ދެމެދު ސިޔާސީ ގުޅުން ގާއިމު ކުރުމުގެ މަޝްވަރާތަކެއް ކުރިއަށް ގެންދާ ކަމަށް ޑިޕްލޮމެޓިކް ދާއިރާގެ އޮފިޝަލުންނާއި ހަވާލާދީ އިސްރާއީލްގެ ނޫހެއް ކަމަށްވާ "ޓައިމްސް އޮފް އިސްރާއީލް"ގައި ބުނެފައިވާ ދަނޑިވަޅެއްގައެވެ.
އެކަމާ ގުޅިގެން މިނިސްޓްރީން ބުނީ، ދިވެހިރާއްޖެއާއި އިޒްރޭލާ ގުޅުން ގާއިމް ކުރުމުގެ މަސައްކަތެއް އަދި މަޝްވަރާ އެއްވެސް ސަރުކާރުން ނުކުރާ ކަމަށެވެ.
މީގެ ކުރިން ރާއްޖެއާއި އިޒްރޭލާ ދެމެދު ސީދާ މަގުން ވައިގެ ދަތުރުތައް ފެށުމަށް ހަމަޖެހިފައިވާ ކަމަށް އިޒްރޭލުގެ މީޑިއާއިން އޮތީ ރިޕޯޓް ކޮށްފައެވެ. މި ދަތުރު ކުރަނީ އިޒްރޭލުގެ ޓްރެވެލް ކުންފުންޏެއް ކަމަށްވާ ކެމީނޯސްއިން، އެއާ ސީޝެލްސް މެދުވެރިކޮށް ކަމަށް އިޒްރޭލު މީޑިއާއިން ބުނެއެވެ.
ނަމަވެސް ދިވެހިރާއްޖޭގެ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ވަނީ އެހަބަރު އޭރު ދޮގުކޮށްފައެވެ.
ދިވެހި ސަރުކާރުން އޮންނަނީ އިޒްރޭލުގެ އުފެއްދުންތައް ރާއްޖެ އެތެރެކުރުން ވެސް މަނާކޮށްގެންނެވެ.
ދިވެހިރާއްޖެއާއި އިޒްރޭލާ ދެމެދު އެއްވެސް ޒާތެއްގެ މުއާމަލާތެއް ނުހިނގާނެކަން، ދިވެހި ސަރުކާރުން މީގެ ކުރިން ވެސް ވަނީ އެތައް ފަހަރަކު ބުނެފައެވެ.
