ފޭސް 2 ގަައި "ކޮތަރުކޮށި" ނަމުގައި ރައީސް ޔާމީން ބައިވެރި ވެވަޑައިގަންނަވާ ޖަލްސާއެއް ހުކުރު ދުވަހުގެ ރޭ ބާއްވަން ނިންމައިފިއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި މާލެ ސިޓީ ހުޅުމާލެ ދާއިރާގެ ކައުންސިލަރު އަދި ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވީ އެ ޖަލްސާ އޮންނާނީ ހުކުރު ދުވަހުގެ ރޭ 8:30 ގައި ހިޔާ ޕާކް ސަރަހައްދުގައި ކަމަށެވެ. މިއީ ސިޔާސީ ޕާޓީއަކުން ވެސް ހިޔާ ފްލެޓް ސަރަހައްދުގައި ބާއްވާ ފުރަތަމަ ޖަލްސާއެވެ.

ޝުޖާއު ވިދާޅުވީ "ކޮތަރު ކޮށި" ނަމުގައި ބާއްވާ އެ ޖަލްސާގައި ރައީސް ޔާމީން ރައްޔިތުންނާ މުހާތަބު ކުރައްވައި އުންމީދީ ވާހަކަފުޅުތަކެއް ދައްކަވާނެ ކަމަށާއި ރައީސް ޔާމީނަށް ތާއީދުކުރައްވައި އެންމެހާ ސަޕޯޓަރުންނަށާއި ފްލެޓްތަކުގައި ދިރިއުޅޭ ފަރާތްތަކަށް ޖަލްސާގައި ބައިވެރިވުމަށް ދައުވަތު ދީފައެވެ.

"ކޮތަރު ކޮށި ޖަލްސާއަކީ ހުޅުމާލޭގެ ލޮބުވެތި ރައްޔިތުންނަށް ބާއްވާ ޖަލްސާއެއްކަމުގައިވީ ނަމަވެސް ރައީސް ޔާމީނާ ޕްރޮގްރެސިވް ކޮންގްރެސް ކޯލިޝަނަށް ތާއީދުކުރައްވައި ރައްޔިތުންގެ އިތުރުން ދިވެހި ރާއްޖޭގައި އިންޑިއާ ސިފައިން ތިބުމާ ދެކޮޅު، ގައުމު ދެކެ ލޯބިވާ ހުރިހާ ދިވެހި ލޮބުވެތި ރައްޔިތުންނަށް އަޅުގަނޑު ދައުވަތު އަރުވަން،"
މާލެ ސިޓީ ހުޅުމާލެ ދާއިރާގެ ކައުންސިލަރު އަދި ޕީއެންސީގެ ނައިބު ރައީސް އިބްރާހިމް ޝުޖާއު

ކްރިމިނަލް ކޯޓުން ޔާމީންގެ މައްޗަށް މީގެ ދެ އަހަރު ކުރިން އިއްވި ފަސް އަހަރުގެ ޖަލު ހުކުމް އިސްތިއުނާފީ މަރުހަލާގައި މިދިޔަ ނޮވެންބަރު 30 ވަނަ ދުވަހު ސުޕްރީމް ކޯޓުން ވަނީ ޔާމީން މިނިވަން ކޮށްފައެވެ. އަދި މިހާރު ރ. ފުއްގިރި އަދި ވ. އާރަށުގެ މައްސަލައިގައި ދައުލަތުން ވަނީ ޝަރީއަތް ނިމެންދެން ޔާމީންގެ ޕާސްޕޯޓު ހިފެއްޓުމުގެ އަމުރަކަށް ކޯޓުގައި އެދިފައެވެ. އެހެންނަމަވެސް ޔާމީންގެ ޕާސްޕޯޓު މުއްދަތް ހަމަވެފައިވާތީ އެ އަމުރެއް ކޯޓުން ނުދިނެވެ.

މިދިޔަ އަންގާރަ ދުވަހު މިނިވަންވެ ވަޑައިގެން މިދިޔަ ހުކުރު ދުވަހުގެ ރޭ "މަރުހަބާ ރައީސް ޔާމީން" ގެ ނަމުގައި އިދިކޮޅުން ބޭއްވި ޖަލްސާގައި ރައީސް ޔާމީން ވަނީ ގާތްގަނޑަކަށް ދޮޅު ގަޑިއިރަކަށް ވާހަކަފުޅު ދައްކަވާފައެވެ. އެ ޖަލްސާގައި ގިނަ އަދަދެއްގެ އާންމު ރައްޔިތުން ވަނީ ބައިވެރިވެފައެވެ.

ހަބަރު ހުޅުމާލެ ފޭސް 2 އަބްދުﷲ ޔާމީން ސިޔާސީ ޕީއެންސީ ޕީޕީއެމް