ކުރީގެ ރައީސް އަބްދުﷲ ޔާމީންގެ ފަރާތުން ހުށަހަޅާފައިވާ ލިޔުމަކާ ގުޅިގެން، އެމަނިކުުފާނުގެ މައްސަލަ ބައްލަވާ ފަނޑިޔާރުންގެ ބެންޗުން ބައެއް ކަންކަން ސާފުކުރުމަށްޓަކައި ބުރާސްފަތި ދުވަހު ސުޕްރީމް ކޯޓުގައި އަޑުއެހުމެއް ބާއްވަން ތާވަލުކޮށްފިއެވެ.
މަނީ ލޯންޑަރިންގެ ކުށް ސާބިތުވެ، ފަސް އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ޔާމީންގެ އިސްތިއުނާފް މައްސަލައިގެ އަޑުއެހުންތައް ސުޕްރީމް ކޯޓުގައި މިދިޔަ ސެޕްޓެމްބަރުގެ 12 ގައި ފަށައިގެން، 30 ގަޑިއިރުގެ އަޑުއެހުންތަކަކަށް ފަހު ނިންމާލީ މިދިޔަ މަހުގެ ފަސްވަނަ ދުވަހުއެވެ.
އެ އަޑުއެހުންތައް ނިންމާލި ދުވަހު، އެ މައްސަލައިގެ ރިޔާސަތު ބަލަހައްޓަވާ ފަނޑިޔާރު މަހާޒު އަލީ ޒާހިރު ވިދާޅުވީ އިތުރު ކަމެއް ސާފުކުރަން ނެތް ނަމަ، ދެން އޮތީ މައްސަލާގައި ހުކުމްކުރުން ކަމަށާއި، އެ މައްސަލާގައި އަދިވެސް ގިނަ ލިޔުންތައް ދިރާސާކުރަން ޖެހިފައިވާތީ ގޮތެއް ނިންމަން ގިނަ ވަގުތު ނަގާނެ ކަމަށެވެ.
ޔާމީންގެ މައްސަލަ ބައްލަވާ ފަނޑިޔާރުންގެ ބެންޗުން ވަނީ ޑިސެމްބަރުގެ ކުރިން މައްސަލާގައި ހުކުމް އިއްވާނެ ކަމަށް އިއުލާނު ކޮށްފައެވެ. ކޮންމެ އަހަރެއްގެވެސް ޑިސެމްބަރު މަހުން ފެށިގެން ޖެނުއަރީގެ ފުރަތަމަ ރަސްމީ ދުވަހާ ހަމައަށް ސުޕްރީމް ކޯޓު ރިސެސަށް ދާނެއެވެ.
ޔާމީންގެ މައްޗަށް ނޮވެމްބަރު 29، 2019 ގައި ކްރިމިނަލް ކޯޓުން ވަނީ މަނީ ލޯންޑަރިންގެ ކުށް ސާބިތުވުމުން، ފަސް އަހަރުގެ ޖަލު ހުކުމެއް ކޮށް، ފަސް މިލިއަން ރުފިޔާ ދައުލަތަށް ދެއްކުމަށް ހުކުމް ކޮށްފައެވެ. މި ހުކުމް ސުޕްރީމް ކޯޓުގައި އިސްތިއުނާފު ކުރުމަށް ހުށަހެޅުމުން އެ ކޯތުން އެ މައްސަލަ ބަލައިގަތީ މިދިޔަ އޭޕްރިލް މަހުގެ 19 ގައެވެ.
މި މައްސަލައިގެ އިތުރުން އިތުރު ދައުވާތަކެއް ވެސް ޔާމީނުގެ މައްޗަށް ދައުލަތުން ކޮށްފައި ވެއެވެ. އެގޮތުން ޓޫރިސްޓް ރިސޯޓެއް ތަރައްގީ ކުރުމަށް ރ. ފުއްގިރި ކުއްޔަށް ދޫކުރުމުގެ މުއާމަލާތާ ގުޅިގެން ޔާމީންގެ މައްޗަށް ވަނީ މަނީ ލޯންޑަރިން އާއި ރިޝްވަތު ގަބޫލުކުރުމުގެ ދައުވާ ކޮށްފައެވެ. މި ދައުވާތަކަށް ޔާމީން އިންކާރު ކުރައްވައެވެ.
