ރާއްޖެ ހިޖުރަ ކުރާ ދޫނިފަދަ ތަކެތި ހިފާ ހައްޔަރުކޮށް، ގޯނާ ކުރާ ފަރާތްތަކާ މެދު ފިޔަވަޅު އަޅާނެ ކަމުގެ އިންޒާރު އީޕީއޭއިން ދީފިއެވެ.
އެޗްޕީއޭއިން އިންޒާރު ދީފައި މިވަނީ އިހަށް ދުވަހު ރާއްޖެއަށް އައި ފްލެމިންގޯތަކެއް ހިފާ ބޮޑު އަގުގައި ވިއްކަން ބަޔަކު އުޅުން މައްސަލައެއް ފެންމަތިވެފައި ވާ ދަނޑިވަޅެއްގައެވެ.
ފްލެމިންގޯ ވިއްކަން ޖަހާފައިވަނީ "ކުޅުދުއްފުށި ޕެޓް ލަވާސް" ނަމަކަށް ކިޔާ ވައިބާ ގްރޫޕެއްގައެވެ. ހއ. އަދި ހދ. އަތޮޅުން ފެނިފައިވާ އެފްލެމިންގޯތަކުގެ ތެރެއިން ހިފުނު ބައެއް ފްލެމިންގޯ 30،000 ރުފިޔާއަށް ވިއްކަން ޖަހާފައި ވާއިރު އެ ފްލެމިންގޯތައް އެންމެ ފުރަތަމަ ފެނިފާވަނީ ހއ. ފިއްލަދޫ ފުއްޓަރު ފަރާތު އަތިރިމަތިންނެވެ.
މައުލޫމާތު ލިބިފައިވާ ގޮތުގައި އެ ދޫނިތައް ފަހުން ވަނީ ހއ. ކެލާ އަދި ބާރަށުން ފެނިފައެވެ. އަދި ބާރަށު ބަޔަކު ދާ ޖަހައިގެން އޭގެ ބައެއް ދޫނިތައް ހިފާފައިވާ ކަމަށް ވެސް މައުލޫމާތު ލިބިއެވެ.
އެކަމާ ގުޅިގެން މިއަދު އީޕީއޭއިން ނެރުނު ބަޔާނެއްގައި ބުނީ ގުދުރަތީ ގޮތުން ނުވަތަ ތަބީއީގޮތުން ހިމާޔަތްކޮށް ރައްކާތެރިކުރާ ދިރޭ ތަކެއްޗާބެހޭ ގަވާއިދުގެ ދަށުން ހިމާޔަތްކޮށްފައިވާ، ރާއްޖެއަށް ހިޖުރަކުރާ ދޫނީގެ ތެރެއިން، މަދުން ނޫނީ ނުފެންނަ ބާވަތެއް ކަމަށްވާ ގުޑުގުޑާދޫނި (ފްލެމިންގޯ) މިދުވަސްވަރު ރާއްޖޭގެ އެކިހިސާބުތަކުން ފެންނަން ފަށާފައިވާ ކަމަށެވެ.
ނަމަވެސް ބައެއް ފަރާތްތަކުން އެދޫނިތައް ހިފާ ހައްޔަރުކޮށް ވިއްކާކަމުގެ ޝަކުވާ އެއެޖެންސީއަށް ލިބެމުންދާ ކަމަށް އީޕީއޭއިން ބުނެއެވެ. އެގޮތުން ބާރަށުގައި ބަޔަކު ފްލެމިންގޯ ހިފާ ވިއްކަން އުޅޭކަމުގެ މައްސަލައެއް ލިބިފައިވާ ކަމަށާ އެމައްސަލަ މިހާރު މޯލްޑިވްސް ޕޮލިސް ސާވިސްއާ ގުޅިގެން ތަހުގީގު ކުރަމުންދާ ކަމަށެވެ.
އެގޮތަށް ހިމާޔަތްކުރެވިފައިވާ ދޫނިތައް ހިފާ، ހައްޔަރުކުރާ ފަރާތްތަކާ، އަދި އެދޫނިތައް ގަނެވިއްކާ ވިޔަފާރި ކުރަމުންދާ ފަރާތްތަކާ މެދު "ތިމާވެއްޓަށްދޭ ގެއްލުންތަކަށް ޖޫރިމަނާ ކަނޑައެޅުމާ ބަދަލު ހޯދުމުގެ ގަވާއިދު" އާއި "ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާބެހޭ ގަވާއިދުގެ ދަށުން ޖޫރިމަނާ ކުރާނެ ކަމަށް އީޕީއޭއިން ބުނެއެވެ.
އީޕީއޭއިން ވަނީ އެފަދަ ދޫނިތައް ހިފާ ހައްޔަރުކޮށް ގޯނާކުރާފަރާތްތައް ހުއްޓުވާ އަދި އެފަދަ ފަރާތްތަކަށް ފާރަވެރިވެ އެފަދަ ކަންކަން ކުރާ ފަރާތްތަކުގެ މައުލޫމާތު (ދޫނި ހިފާ ވިއްކާ ފަރާތުގެނަން، ގޭގެ ނަމާއި އަތޮޅާއި ރަށް، އަދި ހިފާވިއްކާ ދޫނީގެ ބާވަތާއި އަދަދު) އަދި ފޮޓޯ އެ އެޖެންސީގެ ހޮޓްލައިން ނަންބަރު، 7980379 އަށް މެސެޖުކުރުމަށް ނުވަތަ އީމެއިލް ކުރުމަށް އެދިފައެވެ.
