ހދ.ކުޅުދުއްފުށި މެޖިސްޓްރޭޓް ކޯޓުގެ މެޖިސްޓްރޭޓް އިބްރާހީމް ޝާހިދު 14 ދުވަހުގެ މުއްދަތަކަށް ސަސްޕެންޑްކުރަން ޖުޑީޝަލް ސާވިސް ކޮމިޝަނުން ނިންމައިފިއެވެ.
މެޖިސްޓްރޭޓް ޝާހިދާ ހަވާލު ކުރެވޭ ޖިނާއީ މައްސަލަތައް އެއްވެސް ވަރަކަށް ކުރިއަށް ގެންގޮސްފާ ނުވާކަމަށް ކުރެވުނު ތުހުމަތާ ގުޅިގެން ޖޭއެސްސީން ވަނީ އެ މައްސަލަ ބަލައި ތަހުގީގުކޮށް ނިންމާފައެވެ.
ޖޭއެސްސީން މިއަދު ބުނީ އެ މައްސަލައިގެ ތަހްގީގުން ލިބުނު މައުލޫމާތުގެ އަލީގައި މެޖިސްޓްރޭޓް ޝާހިދު, ކްރިމިނަލް މައްސަލަތައް ކުރިއަށް ގެންދަވާފައި ނުވާކަމުގައި ކުރެވިފައިވާ ތުހުމަތަށް އިއުތިރާފު ވެފައިވާ ކަމަށެވެ. އަދި ހަމައެހެންމެ އޭނާއާ ހަވާލުކުރެވޭ ކްރިމިނަލް މައްސަލަތައް ބަލަމުން ނުގެންދާ ކަމުގައި ތަހުގީގަށް ހޯދުނު އެހެނިހެން ހޯދުންތަކުން ވެސް ސާބިތުވާ ކަމަށެވެ.
ޝާހިދުގެ މި އަމަލަކީ ދިވެހިރާއްޖޭގެ ފަނޑިޔާރުންގެ ގާނޫނުގެ 34 ވަނަ މާއްދާގެ (ށ) އާއި، ފަނޑިޔާރުންގެ ސުލޫކީ މިންގަނޑުގެ 6.1، 6.2 އަދި 6.4 އާއި ހިލާފަށް ކޮށްފައިވާ އަމަލުތަކެއް ކަމަށް ޖޭއެސްސީން ބުންޏެވެ.
އެހެންކަމުން ޖޭއެސްސީގެ ގާނޫނުގެ 32-1 (ހ) ގެ 3 ގެ ދަށުން މުސާރައާއި އިނާޔަތްތައް ނުލިބޭ ގޮތަށް ޝާހިދު ވަޒީފާގެ މަސައްކަތަށް ނިކުތުން 14 ދުވަހުގެ މުއްދަތަށް މަނާކުރުމަށް ފެންނަކަމަށް، މި މަހުގެ 10 ވަނަ ދުވަހު ބޭއްވި ކޮމިޝަނުގެ 77 ވަނަ ބައްދަލުވުމުގައި ނިންމާފައިވާ ކަމަށް ވެސް ޖޭއެސްސީއިން ވަނީ ބުނެފައެވެ.
