ރަސްމީ ދަތުރުފުޅެއްގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ށ އަދި ރ އަތޮޅުގެ ބައެއް ރަށްތަކަށް ކުރައްވާ ދަތުރުފުޅުގައި ފުރާވަޑައިގެންފިއެވެ.
ރައީސް އޮފީހުންބުނީ މި ދަތުރުގައި ރައީސް ވަޑައިގަތުމަށް ހަމަޖެހިފައިވާ ށ އަތޮޅުގެ ހަތަރު ރަށަކަށާ ރ. އަތޮޅުގެ ހަތަރު ރަށަކަށް ކަމަށެވެ.
އެގޮތުން އެރަށްތަކަކީ ށ. ފުނަދޫ، ށ. ޅައިމަގު، ށ. ފޯކައިދޫ، ށ. މުލަންދޫ، ރ. ވާދޫ، ރ. އަލިފުށި، ރ. ރަސްގަތީމު އަދި ރ. އަނގޮޅެތީމެވެ.
މި ދަތުރުފުޅު ނިންމަވާލެއްވުމަށް ފަހު މާލެ ވަޑައިގަތުމަށް ހަމަޖެހިފައި ވަނީ އަންނަ ބުރާސްފަތި ދުވަހުގެ ރެޔެވެ. މި ދަތުރުފުޅުގައި އެމަނިކުފާނުގެ އަނބިކަނބަލުން ފަޒްނާ އަހްމަދު ބައިވެރިވެ ވަޑައިގަންނަވައެވެ.
ރައީސް ށ. އަދި ރ އަތޮޅަށް ދަތުރުފުޅު ކުރައްވާ އިރު މިދިޔަ މަހުގެ 17 ވަނަ ދުވަހު އެމަނިކުފާނު ވަނީ ތ. އަތޮޅުގެ 7 ރަށަކަށް ވަޑައިގެންފައެވެ. އެ ދަތުރުގައި ރައީސް ވަޑާގަތް ރަށްރަށަކީ، ތ. ތިމަރަފުށި، ކިނބިދޫ، އިމަދޫ، ވޭމަންޑޫ، ވަންދޫ، ކަނޑޫދޫ އަދި ގާދިއްފުއްޓެވެ.
އޭގެ އިތުރުން މިދިޔަ ޖުލައި މަހުގެ 16 ވަނަ ދުވަހު އެމަނިކުފާނު ވަނީ ތިލަދުންމަތީ ދެކުނުބުރިީގެ ކުޅުދުއްފުށި ސިޓީ، ހދ. ހަނިމާދޫ އަދި ހދ. ކުމުންދޫ އަށް ވަނީ ވަޑައިގެންފައެވެ.
