ދިވެހިރާއްޖޭގެ ކެޕިޓަލް މާކެޓް ކުރިއަރުވައި، މާލީ ދާއިރާ އިތުރަށް ހަރުދަނާކުރުމުގެ މަގްސަދުގައި "ނޭޝަނަލް އެކްސްޗޭންޖް ލިމިޓެޑް"ގެ ނަމުގައި ސަރުކާރުގެ ސައްތައިންސައްތަ ހިއްސާވާ އައު ކުންފުންޏެއް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އުފައްދަވައިފިއެވެ.
ރައީސުލްޖުމްހޫރިއްޔާގެ އޮފީހުން މައުލޫމާތު ދެއްވި ގޮތުގައި، މި ކުންފުނި އުފައްދަވާފައިވަނީ ގާނޫނު ނަންބަރު 2023/7 (ކުންފުނީގެ ގާނޫނު) ގެ 15 ވަނަ މާއްދާއިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚުތިޔާރުގެ ދަށުން، ރައީސުލްޖުމްހޫރިއްޔާގެ ޤަރާރު ނަންބަރު 2026/16 ގެ ދަށުންނެވެ.
މި ކުންފުންޏަކީ ސަރުކާރުގެ މާލީ ބޭނުންތަކާއި އިސްލާމީ މާލީ ދާއިރާ ފުޅާވަމުންދާ މި ދަނޑިވަޅުގައި، ސަރުކާރުގެ އެހީތެރިކަމާއެކު ރާއްޖޭގައި ދެވަނަ ހިއްސާގެ ބާޒާރެއް (ސެކަންޑަރީ މާކެޓް) ގާއިމުކޮށް ކުރިޔަށް ގެންދިޔުމަށްޓަކައި އުފެއްދެވި ކުންފުންޏެކެވެ.
"ނޭޝަނަލް އެކްސްޗޭންޖް ލިމިޓެޑް" އުފެއްދެވުމުގެ މައިގަނޑު މަގްސަދުތަކުގެ ތެރޭގައި، ރާއްޖޭގެ ކެޕިޓަލް މާކެޓް ކުރިއަރުވައި، އެ މާކެޓަށް އޮތް އިތުބާރާއި ދެފުށް ފެންނަ މިންވަރު އިތުރުކުރުން ހިމެނެއެވެ. މީގެއިތުރުން، ޒަމާނީ ސެކިއުރިޓީޒް އެކްސްޗޭންޖްތަކާއި ޓްރޭޑިން ފެސިލިޓީތައް ގާއިމުކޮށް ހިންގުމާއި، ދައުލަތުގެ ސެކިއުރިޓީޒްއާއި އިސްލާމީ ޝަރީޢާގެ ހަމަތަކަށް ފެތޭ ސުކޫކާއި އެހެނިހެން މާލީ ވަސީލަތްތައް ނެރުމާއި، ލިސްޓުކުރުމާއި މުއާމަލާތުކުރުމުގެ މަގުފަހިކޮށްދިނުންވެސް މި ކުންފުނީގެ މަސްއޫލިއްޔަތުތަކުގެ ތެރޭގައި ހިމެނެއެވެ.
ހަމައެއާއެކު، ސެންޓްރަލް ސެކިއުރިޓީޒް ޑިޕޮސިޓަރީއާއި، ކްލިއަރިން އަދި ސެޓްލްމަންޓުގެ ޒަމާނީ ޕޯސްޓް-ޓްރޭޑް ހިދުމަތްތައް ފޯރުކޮށްދިނުމާއި، ރާއްޖެއާއި ރާއްޖެއިން ބޭރުގެ މާލީ މުއައްސަސާތަކާ ގުޅިގެން ރާއްޖޭގައި ހަރުދަނާ އަދި ދެމެހެއްޓެނިވި މާލީ ބާޒާރެއް ބިނާކުރުމަކީވެސް މި ކުންފުނި އުފެއްދެވުމުގެ މުހިންމު މަޤްޞަދެކެވެ.
