އެމްއެމްޕީއާރުސީ ބޮޑު ހިޔާނާތުގެ މައްސަލައިގައި 5 މީހަކަށް ދައުވާކުރަން ފޮނުވާފައި ވާކަމަށް ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވެއްޖެއެވެ.
"ދަ ޕްރެސް" އިން ކުރި ސުވާލަކަށް ޖަވާބު ދެއްވަމުން މަބްރޫކް ވިދާޅުވީ އެމްއެމްޕީއާރުސީ މައްސަލައިގައި 4 މީހެއްގެ މައްޗަށް ހުކުމް ކޮށްފައި ވާ ކަމަށާއި 5 މީހެއްގެ މައްޗަށް ދައުވާ ކުރަން ފޮނުވާފައިވާ ކަމަށެވެ. އަދި 4 ކޭހެއްގެ އިތުރު މައުލޫމާތު ހޯދުމަށް ޕްރޮސެކިއުޓާ ޖެނެރަލްގެ އޮފީހުން އަނބުރާ ފޮނުވާފައިވާ ކަމަށްވެސް އޭނާ ވިދާޅުވިއެވެ. މީގެ އިތުރުން 12 މައްސަލައެއް ބަލާނިމުމުގެ މަރުހަލާގައި އޮތް ކަމަށް އޭނާ ވަނީ ވިދާޅުވެފައެވެ.
އެމްއެމްޕީއާރުސީގެ ބޮޑު ހިޔާނާތުގައި 218 ފަރާތެއް ބައިވެރިވެފައި ވާކަމަށް އެސެޓް ރިކަވަރީ ކޮމިޝަން އިން މޭ 12، 2021 ވަނަ ދުވަހު އާންމުކުރި ހިޔާނާތުގެ ލިސްޓުގައި ވެއެވެ. އަދި މި ލިސްޓާއެކު ދައުވާއުފުލާ އަދި ދައުވާ އުފުލުމަށް ޕީޖީގެ ހިޔާލަށް 14 ފަރާތެއްގެ ނަން އޭރު އޮތީ ފޮނުވާފައެވެ.
އެފަރާތްތަކަކީ:
- އަބްދުﷲ އާޒިމް - އޭސީސީގެ އިންވެސްޓިގޭޝަން އޮފިސަރު (ކްރިމިނަލް ކޯޓުގައި)
- އަހުމަދު އަކުރަމް - އިލެކްޝަން ކޮމިޝަންގެ ކުރީގެ ނައިބު ރައީސް (މަދަނީ ދައުވާ ކުރަން ވެފައި)
- އަހުމަދު މަހުލޫފް - މިހާރުގެ ޔޫތު މިނިސްޓަރު (ދައުވާ ކުރާނެތޯ ބަލަން ޕީޖީއަށް ފޮނުވަން ވެފައި)
- އަހުމަދު ނިހާން ހުސެން މަނިކު - ކުރީގެ އެމްޕީ (ކްރިމިނަލް ކޯޓުގައި)
- އަކްރަމް ކަމާލުއްދީން - ރާއްޖެޓީވީގެ ޗެއާމަން (މަދަނީ ދައުވާ ކުރަން ވެފައި)
- އެޕޯލޯ ހޯލްޑިންގްސް ޕްރިވެޓް ލިމިޓެޑް (ދައުވާ ކުރަން ޕީޖީއަށް ފޮނުވާފައި)
- ޔޫރޯ މާކެޓިން ޕްރިވެޓް ލިމިޓެޑް (ދައުވާ ކުރަން ޕީޖީއަށް ފޮނުވާފައި)
- ހެވަންލީ މޯލްޑިވްސް ޕްރިވެޓް ލިމިޓެޑް (ދައުވާ ކުރަން ޕީޖީއަށް ފޮނުވާފައި)
- އިންޓެރެޕިޑް ޕްރިވެޓް ލިމިޓެޑް (ދައުވާ ކުރަން ޕީޖީއަށް ފޮނުވާފައި)
- އައިލެންޑް އޭވިއޭޝަން ސާވިސަސް ލިމިޓެޑް (ދައުވާ ކުރަން ޕީޖީއަށް ފޮނުވާފައި)
- އައިލެންޑް ޓްރާނސްޕޯޓް ޕްރިވެޓް ލިމިޓެޑް (ދައުވާ ކުރަން ޕީޖީއަށް ފޮނުވާފައި)
- މެރިން ޑިޒައިމް މޯލްޑިވްސް ޕްރިވެޓް ލިމިޓެޑް (ދައުވާ ކުރަން ޕީޖީއަށް ފޮނުވާފައި)
- ސީނިއާ އިންޓަނޭޝަނަލް ޕްރިވެޓް ލިމިޓެޑް (ދައުވާ ކުރަން ޕީޖީއަށް ފޮނުވާފައި)
- ޒަހާ ވަހީދު - ކުރީގެ މިނިސްޓަރު (މަދަނީ ދައުވާ ކުރަން ވެފައި)
މި ލިސްޓު އާންމު ކުރުމުން ލިސްޓުގައި ނަން ހިމެނޭ ގިނަ ބަޔަކު ވަނީ ލިސްޓަށް ފާޑު ކިޔާފައެވެ. މިގޮތުން ލިސްޓުގެ އަސްލު ގެއްލުވާލީ ކަމަށް ވެސް ގިނަ ބަޔަކު ވަނީ ތުހުމަތު ކޮށްފައެވެ. އެމްއެމްޕީއާރުސީގެ ލިސްޓު އާންމު ކުރިއިރު ހިޔާނާތުގައި ހިމެނޭ މީހުންގެ ތެރެއިން 175 މީހަކީ އަދިވެސް މައުލޫމާތު ހޯދުމުގެ މަރުހަލާގައި ތިބި މީހުންނެވެ.
އެމްއެމްޕީއާރުސީގެ މައްސަލައިގައި ޔޫތު މިނިސްޓަރު އަހުމަދު މަހުލޫފުގެ މައްޗަށް ދައުވާ ކުރުމަށް ޖޫން 9، 2021 ވަނަ ދުވަހު އޭސީސީން ވަނީ ފޮނުވާފައެވެ. އަދި ދައުވާކުރަން ފޮނުވުމާއެކު މަހުލޫފު ޔޫތު މިނިސްޓަރަކަށް އައްޔަން ކުރި ފަހުން 2 ވަނަ ފަހަރަށް މަސައްކަތުން އެކަހެރި ކުރިއެވެ. ނަމަވެސް މަހުލޫފަށް ދައުވާ ކުރުމާމެދު ޕީޖީން އަދިވެސް ވަކި ގޮތެއް ނުނިންމައެވެ.
މީގެ އިތުރުން ހިޔާނާތުގެ ލިސްޓުގައި ކުރީގެ އޮޑިޓާ ޖެނެރަލް ހަސަން ޒިޔަތުގެ ނަން އޮތުމުން އޭނާ ވަނީ އޮޑިޓަރު ޖެނެރަލްކަމުން އިސްތިއުފާ ދެއްވާފައެވެ.
އެމްއެމްޕީއާރުސީ ހިޔާނާތަކީ ރާއްޖޭގެ ފަހުގެ ތާރީހެއްގައި ހިންގާފައި އޮތް އެންމެ ބޮޑު ހިޔާނާތެވެ. ދައުލަތަށް ލިބެން ޖެހޭ 3.4 ބިލިއަން ރުފިޔާ އޭރުގެ ޓޫރިޒަމް މިނިސްޓްރީއާއި އެމްއެމްޕީއާރުސީގެ އިހުތިސޯސްގެ ތެރެއިން ކުއްޔަށް ދޫކުރާ ރަށްރަށާއި ފަޅުފަޅުން ދައުލަތަށް ލިބެންޖެހޭ ފައިސާއަށް އެތަންތާނގައި އޭރު އެންމެ އިސްކޮށް ތިއްބެވި ވެރިންނާއި އާންމުންގެ ތެރެއިން ބަޔަކާއި މާލީ ނިޒާމު ގުޅިގެން ވަނީ ހިޔާނާތްތެރިވެފައެވެ. އެ ހިޔާނާތް ހިންގި އިރު، ޓޫރިޒަމް މިނިސްޓަރަކަށް ހުންނެވީ ކުރީގެ ނައިބު ރައީސް އަހުމަދު އަދީބެވެ. އެމްއެމްޕީއާރުސީގެ މެނޭޖިން ޑައިރެކްޓަރަކަށް ހުންނެވީ އަބްދުﷲ ޒިޔަތެވެ.
އެމްއެމްޕީއާރުސީގެ މައްސަލަ އެސެޓް ރިކަވަރީ ކޮމިޝަނުން ބަލާއިރު، މައްސަލަތައް ކުރިއަށް ދާލެއް ލަސްކަމުން އެކޮމިޝަނަށާއި ކޮމިޝަނުގެ ރައީސް އަސްއަދަށް ވަނީ ފާޑުކިޔުން އަމާޒުވެފައެވެ.
