އައްޑޫ ސިޓީ ހިތަދޫގެ އުމުރުން 29 އަހަރުގެ އައިމިނަތު ހަމީދު ( ޝެފް އަމީ) އަކީ ރިސޯޓުގައި މަސައްކަތް ކުރާ ޕޭސްޓްރީ ޝެފެކެވެ. އޭނާ އަކީ އަބަދުވެސް އެ އިރެއްގެ އެންމެ ޓްރެންޑުތައް ފޮލޯ ކުރާ މީހެކެވެ.
އެގޮތަށް މިރާ ގްލޭޒް ކޭކަކީ 2020ގައި ވަރަށް ޓްރެންޑިން ކޭކެއް ކަމަށާއި މިރާ ގްލޭޒް ކޭކް އަޅަން ފެށީ އެހެންވެ ކަމަށް ޝެފް އަމީ ބުނެއެވެ.
ޝެފް އަމީ މިރާ ގްލޭޒް ކޯހެއް ހަދާފައެއް ނުވެއެވެ. އެހެން ނަމަވެސް ކޭސް ގްލޭޒިން ކުރަން ވަރަށް ބައިވަރު މާސްޓާ ކްލާސްތަކާ ޓްރޭނިންތައް ނަގާފައިވާ ކަމަށް އޭނާ ބުނެއެވެ.
އާންމުކޮށް މިރާ ގްލޭޒް ކޭކް އަޅަން އެހާ ގިނަ ވަގުތު ނުނަގާ ކަމަށް ޝެފް އަމީ ބުނެއެވެ. އެހެން ނަމަވެސް ކޭކު ރެސްޓުކުރާއި ފްރީޒް ކުރަން ވަގުތު ދާ ކަމަށް އޭނާ ބުނެއެވެ.
ޝެފް އަމީގެ މިރާ ގްލޭޒް ކޭކްތައް އެންމެނަށް ވެސް ކަމުދާއިރު އެންމެންގެ ފަރާތުން ވެސް ޕޮޒިޓިވް ކޮމެންޓު ލިބޭ ކަމަށް ޝެފް އަމީ ބުނެއެވެ. އަދި ކުރިއަށް ވުރެ މިހާރު ލެވަލް މަތި ވަމުންދާ ކަމަށާއި މިހާރު ހަދާ ކޭކްތައް ވަރަށް ރީތިކަމަށް އެންމެން ވެސް ބުނާ ކަމަށް ޝެފް އަމީ ބުނެއެވެ.
ޝެފް އަމީ ބުނާގޮތުގައި މިރާ ގްލޭޒް ކޭކް ހަދަން ދަސްކުރަން ވަރަށް ގިނަ މީހުން އެދިފައިވާ ކަމަށެވެ.
އެގޮތުން ޝެފް އަމީ އަންނަނީ މިފަދަ ކޭކުތައް އަޅަން ބޭނުންވާ ފަރާތްތަކަށް ދަސްކޮށްދިނުމަށް އޮންލައިން ކޯހެއް ފަށަން ތައްޔާރު ވަމުންނެވެ.
ގްލޭޒިން މާސްޓާ ކްލާހެއް ފެށުމަށް މަސައްކަތް ކުރަމުންދާއިރު މިކްލާސް މިހާރު ޝޫޓްކޮށް މިހާރު ނިމިފައިވާ ކަމަށް އޭނާ ބުނެއެވެ. އަދި އަންނަ މަހުގެ ފަހުކޮޅު ތެރޭ ކްލާސް ފެށޭނެ ކަމަށް ހުނަރުވެރި ޝެފް އަމީ ބުނެއެވެ.
އޭގެ އިތުރުން މިދިޔަ އަހަރާ މިއަހަރުގެ ތެރޭ ގާތްގަނޑަކަށް 70 ކުދިންނަށް ކިޔަވާ ދީފައިވާނެ ކަމަށް ވެސް ޝެފް އަމީ ބުނެއެވެ. ނަމަވެސް އެއީ އައްޑޫގައި ކަމަށާއި ނަގާދީފައިވަނީ ފިޒިކަލް ކްލާސްތައް ކަމަށް އޭނާ ބުނެއެވެ.
މިހާތަނަށް ގާތްގަނޑަކަށް މިރާ ގްލޭޒްގެ 100 ކޭކު އަޅާފައި ހުންނާނެ ކަމަށް ޝެފް އަމީ ބުނެއެވެ.
ޝެފް އަމީ ބުނާގޮތުގައި އޭނާއަށް މިމަސައްކަތަށް އެންމެ އެހީތެރިކަން ލިބެނީ މައިންފަބައިގެ ފަރާތުންނެވެ. އަދި ރިސޯޓުގައި މަސައްކަތްކުރާއިރު ޝެފުންގެ ފަރާތުން ވެސް އެހީތެރިކަން ލިބޭ ކަމަށް އޭނާ ބުނެއެވެ.
މިރާ ގްލޭޒް ކެސް އަޅަން ބޭނުންވާ ފަރާތަކަށް ޝެފް އަމީ ދޭން ބޭނުންވާ މެސެޖެއް އެބައޮތެވެ. ޝެފް އަމީ ބުނަނީ ކަމެއްގެ ހުވަފެން ދެކި، އެކަމެއް ކުރަން އުޅެފިނަމަ ކޮންމެ ކަމެއް ކުރެވޭނެ ކަމަށެވެ.
މި މަސައްކަތުގައި އެންމެ ޝުކުރު އަދާކޮށްލަން ބޭނުންވަނީ އާއިލާ އަދި ރަހުމަތްތެރިންނަށް ކަމަށް ޝެފް އަމީ ބުނެއެވެ.
