ތައުލީމީ ހަޔާތުގެ ދުވަސްވަރަކީ ކޮންމެ ކުއްޖެއްގެވެސް މުސްތަގުބަލު ކުރަހާ ލޯގަނޑެވެ. ކުރިއަށްދާނެ ދާއިރާއެއް ނުވަތަ ބޮޑުވެގެން ކުރާނެ މަސައްކަތަކާ ދޭތެރޭ ވިސްނަނީވެސް ހަމަ އެ ދުވަސްވަރެވެ. އެ ވިސްނުމުގައި ޅަ އުމުރުގައި އަމާޒަށް ވާސިލުވުމަށް ކަމަރުބަނދެ ނިކުންނަ ކުދިންނެއްވެސް މަދެއްނޫނެވެ.
ގިނަ ހިދުމަތްތެރިންތަކަކާއި ހުނަރުވެރިންތަކެއް އެ ފަސްގަނޑަކަށް އުފަން، ކުޅުދުއްފުށީ ސިޓީ، އުމުރުން 34 އަހަރުގެ މުހައްމަދު މިހާޒްގެ ކާމިޔާބީގެ ފަހަތުގައިވެސް ހިމެނެނީ ޅަ އުމުރުގައި އަމާޒަށް ވާސިލުވުމަށް ހިތްހަމާތައި ހިތްވަރުންކުރި މިންނެތް މަސައްކަތެވެ. އެއީ މިއަދު ބޮޑު ތިލަދުންމަތި ފަހުރުވެރިވާ ފަދަ ދަރިއެކެވެ. ޅަ އުމުރުގެ ސިކުނޑީގައި އުފެދެމުންދިޔަ ކުރެހުމުގެ އެ ރީތި ތަސްވީރުތަކުގައި އޭނާ ކުލަ ޖައްސަމުން އެދަނީ ފޮޓޯގްރަފީގެ ހުނަރުންނެވެ.
ތައުލީމީ ހަޔާތް:
ކުޅުދުއްފުށީ ސިޓީގައި ތައުލީމް ދެމުންދާ، ހދ. އަތޮޅު ތައުލީމީ މަރުކަޒުން ގްރޭޑް 7 އާ ހިސާބަށް ތައުލީމު ހާސިލުކުރުމަށްފަހު ދެން މިހާޒް ތައުލީމް ހާސިލްކުރީ އެ ރަށު ޖަލާލުއްދީން ސްކޫލުންނެވެ. ސާނަވީ ތައުލީމް ނިންމާލުމަށްފަހު ފިހާރައެއްގައި ވަޒީފާ އަދާކުރަމުން މިހާޒް ވަނީ އިންފޮމޭޝަން ޓެކްނޮލޮޖީގެ ދާއިރާއިން ޑިޕްލޮމާ ހާސިލުކޮށްފައެވެ.
އެ ކޯސް ފުރިހަމަކުރުމަށްފަހު އެސިސްޓެންޓް ކޮމްޕިއުޓާ ޓެކްނީޝަނެއްގެ ވަޒީފާއަށް މިހާޒް ގުޅުނީ އެމްއެންޔޫ ކުޅުދުއްފުށި ކެމްޕަސްއަށެވެ. އެއީ 2013 ވަނަ އަހަރެވެ. އެ މަގާމުގައި 5 އަހަރު ފުރިހަމަކުރުމަށްފަހު މަގާމުގެ ކުރިއެރުން ލިބި އެ ކެންފަހުގެ ކޮންޕިއުޓަރު ޓެކްނީޝަންގެ މަގާމަށް ބަދަލުކުރިއެވެ. އެ މަގާމުގައި ހުރެ މިހާޒް ވަނީ އެ ދާއިރާއިން ބެޗްލާސް ޑިގްރީވެސް ހާސިލްކޮށްފައެވެ.
ފޮޓޯގްރަފީއަށް ޝައުގުވެރިކަން އުފެދުނީ:
މިހާޒް އެންމެ ފުރަތަމަ ފޮޓޯ ނަގަން ފެށީ ސްކޫލް ދައުރު ނިންމާލުމަށްފަހު އޭނާ ގަތް ފޯނަކުންނެވެ. ފޯނުން ނަގަން ފެށި ފޮޓޯ ރީތިވެގެން، އެކަމަށް އުފެދުނު ޝައުގުވެރިކަމާއެކު އޭނާ ކެމެރާއެއް ގަތެވެ.
ކެމެރާއިން އެންމެ ފުރަތަމަ މިހާޒް ނަގާ އުޅުނީ ލޭންޑްސްކޭޕް ފޮޓޯތަކާއި ކުޅުދުއްފުށީ ޔަންގް ޖެނެރޭޝަން (ކޭވައިޖީ)އިން ހިންގަމުންދިޔަ އެކި އިވެންޓުތަކުގެ ފޮޓޮއެވެ. މިހާޒް ބުނި ގޮތުގައި އޭނާ ފޮޓޯ ނަގާކަން ގިނަ ބަޔަކަށް އެނގިގެން ގޮސްފައި ވަނީ އެ ދުވަސްވަރުގައެވެ.
2010 ވަނަ އަހަރު ފޮޓޯ ނަގަންފެށި މިހާޒް 2019 ވަނަ އަހަރާ ހަމައަށްވެސް ފޮޓޯ ނަގަމުން އައީ އެއްވެސް އަގަކާނުލައެވެ. އެހެންނަމަވެސް ވެޑިން ފޮޓޯ ނަގައިގެން ރަނގަޅު އާމްދަނީއެއް ލިބޭނެ ކަމަށް ބަލާ، އެކަމަށް ބޭނުންވާ އާލާތްތައް ހޯދުމަށްފަހު ވިޔަފާރީގެ ގޮތުން އޭނާ އެ މަސައްކަތް ފެށިއެވެ.
ފޮޓޯ ނަގަން ދަސްކުރީ އަމިއްލަ މަސައްކަތުން!
މިއަދު ގިނަ ބައެއްގެ އިތުބާރު ހޯދާފައިވާ މިހާޒް ބުނި ގޮތުގައި އޭނާ ފޮޓޯ ނަގަން ދަސްކުރީ އަމިއްލަ މަސައްކަތުންނެވެ. އެގޮތުން ޔޫޓިއުބް ވީޑިއޯތަކާއި ގުޅުން ހުރި ލިޔުންތައް ކިޔާ މޮޅެތި ފޮޓޯގްރަފަރުން ކައިރި ސުވާލުކޮށް، ގިނަ ކަންކަން މިހާޒް އޮޅުންފިލުވިއެވެ.
ފޮޓޯ ކޮމްޕޮސިޝަން ރޫލްސް އަދި ފޮޓޯ ނެގުމުގައި ބޭނުންކުރާ އުކުޅުތައް ވެސް މިހާޒް ދަސްކުރީ ޔޫޓިއުބް ވީޑިއޯތައް ބަލައިގެންނެވެ. ފޮޓޯ ގްރަފީއާ ގުޅުންހުރި ކޯހެއް އޭނާ ހަދާފައެއް ނުވެއެވެ.
އުފަންދުވަހުގެ ފޮޓޯ، އެނިވާސަރީ ފޮޓޯ، މެޓާނިޓީ ފޮޓޯ އަދި ވެޑިން ފޮޓޯ ނެގުމުގައި ގިނަ ދުވަސްތަކެއް ހޭދަކުރުމަށްފަހު މިހާޒް މިހާރު ދަނީ ވެޑިން ވީޑިއޯ ވެސް ނަގަމުންނެވެ. ވީޑިއޯ ނަގަން ފެށީ ކްލައިންޓުންނަށް އިތުރު ހިދުމަތެއް ދިނުމުގެ އިތުރުން އިތުރު އާމްދަނީއެއް ލިބޭނެ ފުުރުސަތަކަށްވުމުންނެވެ.
ދާއިރާއިން ކުރިއަށްދާން ބޭނުންވާ ކުދިންނަށް މިހާޒްގެ މެސެޖު:
މިހާޒް ގަބޫލުކުރާ ގޮތުގައި އެންމެ މުހިންމު ކަމަކީ ފޮޓޯ ނަގަން އަންނަ މީހުން ހިތްހަމަޖެހޭފަދަ ފޮޓޯތަކެއް ނަގައިދިނުމެވެ. އެ މީހުންގެ އިތުބާރު ހޯދުމަކީ އޭނާ ދެކޭ ގޮތުގައި މި ދާއިރާގައި ކުރިއަށް ދިއުމަށް މުހިންމު ކަމެކެވެ. އެގޮތުން ފޮޓޯ ނަގައިދޭ މީހާއަށް އެ ފޮޓޯތައް ރީތިވެ، އިތުރު މީހަކަށް ރަނގަޅު ފޮޓޯގްރަފާއެއްގެ ގޮތުގައި މިހާޒް "ރެކޮމަންޑް" ކުރުމަކީ ފޮޓޯތައް އިސްތިހާރު ކުރުމަށްވުރެ ދާއިރާގައި ކުރިއަށް ދިއުމަށް އެހީވެދޭ ކަމެއްކަން އޭނާ ފާހަގަކުރެއެވެ.
މިހާޒް ފާހަގަ ކުރި ގޮތުގައި ރަނގަޅަށް ފޮޓޯނަގައި ފޮޓޯ އެޑިޓްކުރަން ދަސްވާނީ ވަރަށް ގިނަ ދުވަހު މަސައްކަތްކޮށްގެންނެވެ. ދާއިރާގައި ކުރިއަށް ދާން ބޭނުންވާނަމަ ކުޑަ ދުވަސްކޮޅަކު މަސައްކަތްކުރުމަށްފަހު ނަތީޖާ ނުފެނުނު ނަމަވެސް ހިތްވަރު އެލުވާނުލާ މަސައްކަތް ކުރުމަށް މިހާޒް ވަނީ ނަސޭހަތްތެރިވެފައެވެ. އަދި ވަކި ޕެކޭޖްތަކެއް ނުވަތަ އަގުތަކެއް ކިޔާފައި ފޮޓޯ ނަގަން ފެށުމުގެ ކުރިން ރީތިކޮށް ފޮޓޯ ނަގަން ދަސްކޮށް މީހުންގެ އިތުބާރު ހޯދުމަކީ މުހިންމު ކަމެއްކަން މިހާޒް ވަނީ ފާހަގަކޮށްފައެވެ. އެ ދާއިރާއިން ކުރިއަށްދާން ބޭނުންވާ ކޮންމެ ކުއްޖަކަށްވެސް އެހީތެރިވުމަށް މިހާޒް ހުރީ ތައްޔާރަށެވެ.
ލިބޭ އެންމެ ބޮޑު ހިތްހަމަޖެހުމަކީ ގިނަ ބަޔަކު މިހާޒްގެ މަސައްކަތް ބަލައިގަންނަކަން އެނގުން ކަމަށް މިހާޒް ބުނެއެވެ. ގިނަ ބަޔަކު އެތައް މަހެއްކުރިން ފޮޓޯ ޝޫޓުތަކަށް ބުކްކުރާއިރު ބޭނުންވާ ތާރީހަށް ބުކްނުކުރެވޭނަމަ ގިނަ ބަޔަކު ތާރީހު ބަދަލުކުރާކަން މިހާޒް ފާހަގަކުރިއެވެ. އެއީ ގިނަބައެއްގެ އިތުބާރު މި ދާއިރާގައި މިހާޒްއަށް ލިބިފައިވާ ކަމުގެ ހެއްކެކެވެ.
ފޮޓޯ ނަގާ މީހުންގެ ފަރާތުން ލިބޭ "ފީޑްބެކް"އަކީ މިހާޒްގެ އެންމެ ބޮޑު ހިތްހަމަޖެހުން ކަމުގައިވާއިރު އޭނާގެ ކަންބޮޑުވުމަކީ ފޮޓޯނަގަން ބޭނުންވާ އާލާތްތައް ރާއްޖެއިން ލިބެން ނެތުމެވެ. އޭގެ އިތުރުން ފޮޓޯގްރަފީގެ އެންމެ ބޮޑު އެއް މާކެޓް، ފަތުރުވެރިކަމުގެ ސިނާއަތު ބޮޑުތިލަދުންމަތީގައި ފުޅާވެފައި ނެތުމަކީވެސް މި ދާއިރާއިން ކުރިއަށްދާން ގޮންޖެހުމެއްގެ ގޮތުގައި މިހާޒް ފާހަގަކުރެއެވެ.
މިހާޒް ފާހަގަކުރި ގޮތުގައި އޭނާއަށް އެންމެ ބޮޑު އެއްބާރުލުމެއް ލިބެނީ އެކުގައި ފޮޓޯ ނަގަން އުޅޭ ފޮޓޯގްރާފަރުންގެ ފަރާތުންނެވެ. އެ ފޮޓޯގްރާފަރުންނާއި އަދި ދާއިރާގައި ކުރިއަށްދިއުމަށް އެކި ގޮތްގޮތުން އެކީ ތެރިވި އެންމެނަށް ވެސް މިހާޒް ވަނީ ޝުކުރު އަދާކޮށްފައެވެ.
ސޫރަ ކުރެހުމުގެ ތެރެއަށް މިކަން ވަންނާނެ. ވަރަށް ދެރަ ކަމެއް މީ ކުރަން.